شۊڕش چێوە دەسش پەنە کەرد
کۊبانۍ بێشکۍ شۊڕشوو ١٩ تەمووزینە، ساڵەو ٢٠١٤ بییە بە سیمبوڵێوە جیهانییە پەی کۊشیای دیموکراتیی دژوو سیستموو هەژموونگەرایی.
وەختۍ ساڵەو ٢٠١٠ وەهاروو گەلا جە هەرێمەکاو وەرکەوتوو دلێڕاسەینە، تونس و میسرۊ چەخمامخەش شانا، زەمینەیچ پەی شۊڕشوو سووریای وەش بی، ساڵەو ٢٠١١ جە گرڎوو پارێزگایەکاو سووریاینە سەرەورڎای دەسش پەنە کەرد، بڵێسەو ئی شۊڕشیچە جە ١٩ تەمووزوو ٢٠١٢ کۊبانێوە ورگیسیا، وەلۍ ئامانجەکێش جیاوازۍ بێنۍ.
جە ئاداروو ٢٠١١ینە جمیەرێوە سووریانە دەسش پەنە کەرد، گرڎوو پارێزگاکاو سووریاینە ڕاپیمای بە داواو 'ورشانایۊ ڕژێمی؛ بەبۍ ئەجیندێوە ڕۊشن، دەسش پەنە کەرد،
وەرنیشتنە دۊخەکە جیاواز بۍ، شۊڕش سەروو بنەمێوە شۊڕشگێڵنیۍ و فەلسەفیۍ بانگەوازوو فاڕای ڕژێمی کەرۍ.
ساڵەو ٢٠٠٤ سەرەورڎای قامیشلۊی دژوو دەسەڵاتوو بەعسی دەسش پەنە کەرد، ئینەیچ زەمینێوە بۍ پەی شۊڕشوو ١٩ تەمووزوو ٢٠١٢.
شۊڕش چکۊوە دەسش پەنە کەرد.
وەختۍ خەڵک تەماموو هێزە ئەمنییەکا و ناوەندەکاو حزبوو بەعسیشا کۊبانێنە بەرۍ پڕنۍ، شۊڕش چەخماخەش دا.
شۊڕش کۊبانێنە باڵەخانێوە حزبوو بەعسیوە دەسش پەنە کەرد، خەڵک لقوپۊپەکاو حزبوو بەعسیشا ناچارۍ کەرڎۍ وێشا بدا دەسۊ و شارەکەی جیا بازا. هەرپاسە بیناو ناوەندوو ڕۊشنویری و هێزەکاو حوکمەتوو دیمەشقی و سەرایا و وەقفوو هیتیارا و بیناو ڕاوەبەرڎەی هەرێمەکەی و بیناو دەزگاو لەشکری و دامودەزگا گرڎییەکاو هیتیارا و ڕاوەبەرڎەی دارایی و زینڎانی و چنڎین ناوەندۍ تەرۍ ئازاڎۍ کریۍ.
باڵاخانەو حزبوو بەعسی کۊبانێنە هێماو دەسەڵاتی ناوەندی بۍ، دماو شۊڕشی ئی باڵاخانە بی بە ناوەندوو ڕاوەبەریی کانتۊنوو کۊبانۍ. باڵاخانەکۍ تەرێچ فاڕیۍ پەی ناوەندوو خزمەتگوزاری و پەروەرڎەو گەلی.
ڕابەر عەبدوڵڵا ئۊجالان جە تەمووزوو ١٩٧٩ تورکیاش جێیا ئاست و لوا کۊبانۍ، چی شارۊ تاریخوو فاڕیای دەسش پەنە کەرد، دماو کۊبانۍ، خەڵک عفرین و قامیشلۊ و حەسەکەنە دامودەزگاکاو بەشاریشا شارەکانە بەرۍ پڕنۍ و وێشا ڕێک وست.
کۊبانۍ بێشکۍ شۊڕشوو ١٩ تەمووزینە، جە ساڵەو ٢٠١٤ بییە سیمبوڵێوە جیهانییە پەی کۊشیای دیموکراتی دژوو سیستموو هەژموونگەرایی.
جە ئەیلوولوو ٢٠١٤ چەتەکاو داعشی بە پەشتگیریی ڕاستەوخۊو دەوڵەتوو تورکیای دەوروو کۊبانێشا دا، دماو ئینەیە ڕابەرعەبدوڵڵا ئۊجالان سەفەربەرییش ئەرەیاونا، بە سەدان کناچۍ و کوڕۍ کوردی ڕووشا نییا کۊبانێوە، هەرپاسە کورڎۍ گرڎوو پارچەکانە و گەنجۍ جە وەڵاتە جیاوازەکانە مدرامانێوە تاریخییشا دەس پەنە کەرد، سەرەنجام پەی یوەم جاری داعش مەڕیا.
دماو ئی سەرکەوتەیە پڕۊژەو وێڕاوەبەرێتیی تەشەنەش سانا، کۊبانێوە پەی عەفرینی و جزیرەوە بەرەو دەوروبەروو ڕەقەی و تەبقای و مەنبەجی و دێرزۊری و گەڕەکەکاو شێخ مەقسوودی و ئەشرەفییەو حەلەبی لوا.
نەک هەر ئینە، بەڵکوم ئا شۊڕشە وەرڎەموو باڵاخانێوە کۊبانێنە گیسیانە، هەرمانێوەش کەرڎە، کە گەلوو پارێزگاو سوەیدەی پانیشتوو سووریاینە چنڎین جارۍ وێنیشانەدایشا کەرد و داواو شێوازوو وێڕاوەبەرییشا هامشێوەو سەرنیشتی و وەرکەوتوو سووریای کەرڎە.
س.ز
