سوپاو تورکی لە ١٧ نیسانوو ٢٠٢٢ وەختۍ دەسش بە هجوومی کەرد پەی سەروو زاپ، ئێمە لە مەیڎانوو مدرامانوو ‌سیداینە بێنمۍ. وەختۍ ئەرەگیرۍ هێزەکێشا ئارڎۍ سەروو چند تەپێوە زاپنە، جە تونێلەکاو جەنگوو سیدایجنە جموجووڵ دەسش پەنە کەرڎەبۍ. وەڵۍ هجوومەکەینە چا سەنگەرانە بەوەرفراوانی ئامادەکاریی بەرڎەوام بۍ. هەرچندە فرسەتۍ فرە کەمۍ بێنۍ، بە کەلوپەلوو وەرڎەسی هەرمانەو تونێلەکا کریۍ. یۊ چا سەنگەرا تونێلەکاو  جەنگوو گەشمەرڎە دۊغانی بۍ.  

وەڵۍ ئانەینە دوژمن وێش بیاونۊ بە سەنگەرەکا

کەشەکاو کارکەرینە، گەشمەرڎە ڕێبەر جە زنجیرە کەشوو مەڕەو بریندارا و جە مەیڎانوو دلێڕاسەو زاپینە، کە پێسە ساجای مشناسیۊ، وەروو ئانەی ڕا بە لە سوپاو تورکی نەدریا، ماوۍ فرە نەتاواش ڕووە کەرۊ مەیڎانوو سیدای. گەریلێکۍ جە سەنگەرەکاو گەشمەرڎە دۊغانینە ئانەشا فرە بەخاسی بەکار ئارد. هێنا. ماوەو مانگۍ پەی دووۍ مانگانە مەڕەکێشا فاڕۍ پەی تونێلەو جەنگی.

وەختۍ سوپاو تورکی زەمینۊ نەتاواش بیاوۊ ئا مەیڎانا هەرمانەکاو وەشکەرڎەی سەنگەرەکا بەرڎەوامۍ بێنۍ. وەلۍ بە فڕۊکەی جەنگی و کاتیوشا بۊردومانێوە دژوار کریۍ سەروو یاگەکۍ. ئا هجوومۍ پاگێرتەیرەشا سەروو تونێلەکاو جەنگوو گەشمەرڎە دۊغانی زیاتەر کەرد. وەختۍ جە سەنگەرەکاو جەنگوو گەشمەرڎە دۊغانینە بێنمۍ ئێمە دووەدڵی، بێورەیی و گومانێوە وچکلەما وەراوەروو سەرکەوتەی هامڕایامانە نەدی. پەوکای وەڵۍ ئانەینە دوژمن وێش بیاونۊ سەنگەرەکا، ئادۍ جەنگەکەشا بەرڎەبێوە.  

ئا وەختە سەرەمڕ گرد بەیانیێوە بەرەو تونێلەکۍ بەرەی سەرەکیی جە ڕاو فرۊکەی جەنگیوە بۊردومان کریۍ، تووشوو شەڕزان ماوای بیەیمۍ. جارێوە تەر بە بۊمبێوە دووەتەنی دریابۍ بەرەو تونێلەکۍ، بۊنەو خوڵووخاکیوە بەرەکەش گیریابۍ. سەرجەنۊ هەوڵێشا دۍ بەرەکەی کەراوە. ڕۊی دماین نیمەڕۊکەش تونێلەکێنە شەڕزانم جە هەمان یاگەنە دی. ڕۊی یەرەم دماو ئانەیە  فڕۊکەکۍ جارێوە تەر بۊردومانشا کەرد، شەڕزان جە هەمان یاگنە بۍ. هەوڵۍ دۍ بەرەکەی کەرۊوە. گەریلا بە دڵ و گیان هەرمانە تونێلەکانە کەرێنۍ. وەختۍ شەڕزان هەوڵۍ دۍ بەرەکەی کەرۊوە من پەنەم وات ،'هامڕا ئادۍ گرد ڕوۍ ئێگەی کەرا بە ئامانج، ئێمەیچ گرد ڕوۍ هەوڵۍ مدەیمۍ کەرمێشۊ. ئەگەر بەرەکە بەوزیایرە بمەنۊوە چێش بۊ' ئاد واتش، 'دوژمن مەتاوۊ سەروو ژیوای و جەنگوو ئێمە چێگەنە قەرار بدۊ. ئەگەر گرد جارۍ ئا بەرەیە نەکەرمێوە ئانە ئێمە دوژمنما قەبووڵ کەرڎەن. پەوکای هەتا کەراش ئامانج حەر کەرمێشۊ'.

سیدا فرە ستراتیژیک بێ

دماو ئانەی یووەم ڕووەکاو جەنگینە چابێنمۍ، ئێمە بەرەو هەرێمەکاو جەنگوو زاپی کەوتیمۍ ڕا. هامڕا شەڕزان و هامڕۍ تەرێچ چاگە سەنگەرەکاو گەشمەرڎە دۊغانینە ئامادەکاری کەرێنۍ. هامڕا شەڕزان و هامڕێکۍ تەرێچ گردڕوۍ واچێنۍ، 'ئێمە ئی سیدایە کە کەسی سەرسام مەکەرۊ، کەرمێش بە 'قەڵاو مدرامانی ' و خوومۍ. سیدا جە ساڵانی ویەرڎەنە فرەتەر بەرەی دماو جەنگی بۍ، پەوکای مەنەیۊ چەنەش کەس ورش نەچنۍ، ئەخلاقوو گەریلای چانەن دایم حەز کەرا وەڵۍ جەنگیوە با.

ئێساڵ جەنگ یاوابۍ سیدا و سیدا فاڕیابۍ پەی سەنگەرێوە فرە ستراتیژی، ئی جارە گردکەس حەز کەرۍ سیڎانە مەنۊوە.  

وەڵی لوایمانە جە زاپی شەڕزانمان دی، کە خۊڵەو تونێلەکۍ کەرۍ جبەر. سەروو پایاوە پەنەما وات 'ئەگەرش هەن چێگە مدرامانێوە فرە تند و گەورە ڕووە بدۊ، وەلۍ ئەگەر دوژمن وێش بیاونۊ وێگە هجوومی دژوار کەرۊ، با هاگاتا تەقایۊکا بۊ، فرە جە ڕاڕەوەکانە مەمەندێوە'. هامڕا شەڕزانیچ پێسە ئانەی کە قۊمیایەکاو جند مانگای تەری بزانۊ واتش، 'جە وەرخەلۍ، مامڕەشۊ، گەشمەرڎە شاهینیچ تەقایۊکۍ بێنۍ. وەلۍ  ئەنجامنە ئێمە سەرۍ کەوتیمۍ. ئێمە پاگیرێنمۍ بۊمبی ئەتۊمیچ بەکار بارا بهێنین دەس چی سەنگەرا ورمەگێرمێ".

١٥ مانگۍ تونێلەکانە وێگیرییش کەرد

جە ڕاو ڕاپۊرتەو ڕوانەو مەیڎانەکاو گەریلایۊ زاناما، کە شەڕزان ماوا جە ٤ تەمووزوو ٢٠٢٢سەنگەرەکاو جەنگوو سیداینە بە بۊمبی ئەتۊمی تاکتیکی گەشمەرڎە بییەن. هامڕا شەڕزان ١٥ مانگۍ بە بۍ ئانەی ڕۊشنایی وەرەتاوی وینۊ، دژوو چەکی کیمیاوی، تانک، کاتیوشا، فڕۊکە، حەفارەی و بانگەوازوو وێدەسۊدای دوژمنی وێش گێرت. کەی  گەرەکشا بیۍ تاوێنۍ بلا و جیا بازا. وەلۍ گیانبازۍ ئاپۊیی مەنەیۊ تا گەشمەرڎەبییەی بە هەرمانەو وێشا زانێنۍ. ئانەیچ هەستی شکۊمەندانەو ئادیشا کە چێش بە دوژمنی کەرۍ، جونکوم تاکە ئامانجشا مدرامان و ئازاڎی بۍ. وێشا وەراوەروو پارێزنای شکۊو گەلوو کوردیوە بە وەرپەرس زانا، سەنگەرەکێشا چۊڵۍ نەکەرڎۍ.

مدرامانوو سیدای هەڵای درێژەش هەن و ئەگەر سوپاو تورکی بەرڎەوامە بۊ چا تاواناو جەنگی ئگەروو گەشمەرڎا زیادتەری هەن، مشۊم چێگەوە گەلوو کوردی چەنی ئا ڕۊڵە بەنرخاشە بۊ، کە ئایندەو گەلەکەیشا دەسەبەر کەرا و پەی خاکەکەیسا گیان بەخشا. 

س.ز