بە ئامادە بییە و بنەیانە و گەشمەرڏا، ژەنی و جوانێ جە سەیرانگا و سەرچناری جە سلێمانینە، بە درووشموو 'بەڕۆحو ١٩و تەممووزی گلێرگێوە دیموکراسی و ئازادی گەلا بنیات منییەیمێ' یاڏ و ١٣ ساڵەو شۆرشو وەرنیشتی کریاوە. جە زەماوەنەکێنە ئامادەبییەیکێ بە جلوبەرگی کلتووریییۆ بەشدارێ بێنێ. دما و دەقێوە ڕێز ونە نییای جە گەشمەرڏا ڕا و ئازادی، پێوەرە درووشموو "گەشمەرڏە مەمرۆنە" وچیاوە.

وتارە و دەستپێکو زەماوەنەکێ جە لایەنو موحەمەد ئاڵا، نوێنەرو ئیدارەو وێڕاوەبەری جە پانیشتوو کوردوسانی ونریاوە و دما و ئامادەبییەی، واتش: "شۆرش زهنیەتش فاڕا و ئازادی ژەناش ڕەخسنا. شۆرشو ئازادی کوردەسانی جە ساڵەکا حەفتای سەدەو ویەردەی دەسش پنە مکەرۆ و جە ٢٠١١ ئەنجامگیر بۆنە.شۆرشو وەرنیشتی تەنیا هورشانایۆ سیستەمیکی نەبێ بەلکوم کلتورێوە تازەش چنی وێش خوڵقنا و گرڏ و پیکئامایەکاش گێرتێ وێ . کریۆ هەڵای کەموکوڕیی جە شۆرشەنە بۆنە بەڵام بەردەوام هەرمانەش سەر مکەرمێ تاکو زیاتەر وەڵێش وزمێ. جە ڕووانگە و ڕاوەبەردەیۆ هەرمانە سەر و ئانەی مکەرمێ سیستەمێوە ناناوەندی بنیات بنییەیمێ پەی تەمامو سوریای. پۆکەی لاماوە چانەن ئیدارەو وێڕاوەبەری تاوۆنە کەسایەتی و ئینسانێ تازە جە سوریانە وەش بکەرۆ".

دماو وتارە و پیرۆزبایی کۆنگرەو ستاری جەلایەن نوێنەرو کۆنگرەو ستاری جە پانیشتوو کوردەستان، ڕۆزا حەسەنێوە پێشکەشکریا. ڕۆزا حەسەنە جە کەسایەتی گەشمەرڏا شۆرشو وەرنیشتیۆ بە ڕێزۆ یاڏ و گەشمەرڏا ڕا و ئازادیش کەردۆ و ئاماژەش پانەی دا مۆدێلو وەرنیشتی تاکە مۆدێلێوە چارەسەرییا پەی ڕزگارکەردە و سووریای چا قەیرانا ئیناش چنە".

هەرپاسە ڕۆزا حەسەنە سەرنجش وست سەر و 'بانگەوازو ئاشتی و گلێرگە و دیوکراتیک'و ڕابەر ئاپۆی و ئاماژەش پانەی دا بانگەوازو ڕابەر ئاپۆی پەی ئیدارەو وێراوەبەری سەرنیشتوو وەرکەوتوو سووریای گرنگیێ تایبەتش هەن و جەختش جە خاوەنداریکەردەی جە بانگەوازەکەی کەردۆ.

دما و وانایۆ پەیامەکا، بەڵگە فلیمێوە دەربارەو ئەوەکۆشای ١٣ ساڵەو شۆڕشو وەرنیشتی نمایشکریا.

مەراسیمەکە بە گۆرانیێ و هورپڕای دمایش ئاما.