شارووو سلێمانینە هۊڵوو هۊتێل ڕاماداینە، سەنتەروو میترۊی پەی داکۊکی جە مافوو ڕۊنامەنویسا، ڕاپۊرتەو ساڵانەیش پەی پاشێلکارییەکا وەرانوەر بە ڕۊنامەنویسا پەی ساڵەو ٢٠٢٣ هەرێموو کورڎسانینە وەڵا کەرڎۊ.
ئارۊ، سه‌نته‌روو میترۊی پەی داکۊکی جە مافوو ڕۊنامەنویسا، ڕاپۊرتەی ساڵانێش بارەو پاشێلکارییەکا وەرانوەروو ڕۊنامەگەری و ڕۊنامەنویسا هەرێموو کورڎسانینە وەڵا کەرڎۊ و بە پاو ئامارەکا، ساڵەی وەڵینەنە ٢٤٩ پاشێلكاریۍ وەراوەر به ٢٤٧ ڕۊنامه‌نویسا و دەزگا میدیاییا کریان، جەختیچ کریاوە کە هەرێموو کورڎسانی ژیوگێوە خا نییا پەی هەرمانۍ ڕۊنامەوانیۍ و یاساو ڕۊنامەگەرییچ مەیاویۊ یاگێ.
حەر ئەوەڵۊ دیاری محەمەد، ڕاوەبەروو سەنتەروو میترۊی ڕه‌خنەش وەنەو ده‌سه‌ڵاتوو ڕاوەبەرڎەی هه‌رێموو كورڎسانی گێرت و واتش:"هەرێموو کورڎسانی ژیوگێوە خۊفناکا پەی هەرمانۍ ڕۊنامەنویسیۍ، هەرپاسە بە پاو ڕاپۊرتە میاندەوڵەتییەکاو ڕێکوزیاو پەیامنێرە بێسنوورا، CPJ و ڕێکوزیاو هیومان ڕایتس وۊچی پەی ساڵەو ٢٠٢٣، جەخت جە خراپیی ژیوگە و هەرمانۍ ڕۊنامەنویسیۍ هەرێم و عێراقنە کریێنۊ وبە ژیوگێوە خۊفناک پەی ڕۊنامەنویسا وەسفش کەرا."
قسەکاشەنە دیاری محەمەد، باسوو ئڕفانای سلێـمان ئەحمەدی، ڕۊنامەنویس و هەواڵسازوو بەشوو عەرەبی ئاژانسوو هەواڵوو ڕۊژنیوزیش کەرد و واتش: بەداخۊ تا ئیساتۍ بێسەروشۊنا و ڕا بە کەسی (تەنانەت خێزانەکەیچش) مەدریۊ سەرش بدا، بە پاو یاسۍ گەر تۊمەتەکێش کە دریێنۍ پاڵش حەرچیێچ با مشۊم پارێزنەرەکەش بوینۊش.
ئاماروو سەنتەروو میترۊی، کە ڕاپۊرتەکێنە ئامان : ساڵەی وەڵینە ٢٤٩ پاشێلکاریۍ وەرانوەر بە ٢٤٧ ڕۊنامەنویس و دەزگا میدیاییا تۊمارۍ کریێنۍ، پێسە ڕاگێریکەرڎەی و جیاکاری ١٣٤ حاڵەتۍ، زەوتکەرڎەی و ماڕای کەلوپەلە ڕۊنامەوانییا ٣٨ حاڵەتۍ، هجووم و هەڕەشۍ و سووکایەتی ٢٧ حاڵەتۍ، گێرتەی جبەروو یاسێوە ڕۊنامەنوێسی پەنج حاڵەتۍ، دەسبەسەرکەرڎەی بەبۍ بڕیاروو داڎگای ٣٧ حاڵەتۍ، هجومی ئەلیکترۊنی ٢ حاڵەتۍ، ماڕای کەلوپەلوو ڕۊنامەنویسی ٢ حاڵەتۍ، ورکوای سەروو یانەو ڕۊنامەنویسا ٢ حاڵەتێ.
