میدیا عەربییەكۍ جە بارەو کۊبیەیۆ پەنهانی ئیسماعیل هەنیەی سەرۆكوو مەكتەبوو سیاسی جمیەروو حەماسی و هاكان فیدانی وەزیروو جبەروو دەوڵەتوو تورکی زانیاری تازەشا وست ڕووە.

كەناڵوو سكای نیوزی وەڵاش کەردۆ، شەوەی ویەردۍ ئیسماعیل هەنیە سەرۆكوو مەكتەبی سیاسی جمیەروو حەماسی و هاكان فیدان وەزیروو جبەروو دەوڵەتوو تورکی دوور جە چەمۍ كامێراكا جە ئەنقەرە کۊبیەنۆ.

ئاماژە پانەیچ کریان، جە کۊبیەیۊکەینە باس جە ئازاڎكەردەی گیریایەکا حەماسی و غەززەی کریان، كە جە دماو ٧و تشرینی یووەم و ساڵەی ویەردێوە گیریێنۍ.

دمایین گفتوگۆو بەینوو ئیسماعیل هەنیەی و هاكان فیدانی گێڵۊوە پەی ١٦و تشرینی یووەم و ساڵەی ویەردۍ، كە ئا وەختە هەردووەلا پەیوەندیێوە تەلەفۆنیشا ئەنجامدا و شەنوو کەوو ئاژەو غەزەیشا کەرد.

جە دماو دەسپنەکەردەی جەنگوو بەینوو حەماسی و سوپاو ئیسرائیلی، ئەردۆغان سەرۆكوو دەوڵەتوو ئەرەگیروو توركی، پەشتیوانی ۋێش پۍ حەماسی نیشانەدا و واتش، حەماس تیرۆرست نیا، جە ۋەران ۋەرەنە  ئیسرائیل پەیامێوە تن و هەڕەشە ئامێزش وەڵاکەردۆ و واتش، حەماس گەر گەرەکش بۆ جە هەر وڵاتێوەتەرەنە ۋێشا شاراوە، چایچ کەرمێشا ئامانج، بە پاو ئی پەیامەیچە بۆ، توركیا بۆ بە یۆ جە ئامانجەكا ئیسرائیلی.

دەوڵەتوو تورکی سەرەڕاو ئانەی بە رواڵەت ۋێش پېسە پەشتیوانی فەلەستینیەکا نیشانە مڎۆ، بەڵام پەیوەندیێوە تنوتۊڵش چنی ئیسرائیلی هەن و تەنانەت جە دماو دەسپنەکەردەو جەنگوو غەززەیۆ بازرگانی جە بەینوو ئەنقەرە و تەلئەبیبینە نەک هەر کەمش نەکەردەن، بەڵکم بە ڕێژیوە فرە بەرزبیەنۆ.