کۊنفرانسوو "ژەنی، ژیوای، ئازاڎی" بە سەرمەشقایەتیی گلێرگەو ژەنە ئازاڎاو وەرکەوتوو کوردستانی (کژار) دەربارەو مدرامانوو ژەناو ئێرانی و وەرکەوتوو کوردستانی ستۊکهۊڵموو پایتەختوو سویدینە بەرڎەواما، مژارە سەرەکییەکاو ئارۊی "کاریگەرییە دینامیکە دلێی و جبەرییەکا سەروو شۊڕشی" و "کێشەکاو بەرڎەوامبییەی شۊڕش"ی و "شۊڕشوو ژەنی و جڤاک"ی.

ئەرەنیشتەی یوەموو ڕۊو دووەموو کۊنفرانسەکەینە، پەرلەمانتاری وەڵینوو ئەفغانستانی بەڵقیس ڕۊشەنە، زانکۊو کۊلێژ کۊرکوو ئیرلەنداینە ڕۊژین موکریانییە، بەریتانیاوە ئەکادیمیسیان سارا کرمانیانە، سویدۊ ئەکادیمیسیانە نەدا هۊشەنگە قسۍ کەرا.

لە کۊنفرانسەکەنە سەدان ژەنۍ کوردۍ و بەلوجۍ و ئەفغانۍ و فارسۍ ئامادۍ بێنێ.

ئەرەنیشتەکەو ڕۊو شەممەی، ژەنە چالاکۍ بەلوجییە فەریبە بارهانزەهیە قسێوە گرنگەش پێشکەش کەرڎە، ئاماژەش پانەیە کەرد، کە شۊڕشوو "ژەنی، ژیوای، ئازاڎی"ی فاڕیاێوە گلێرگەیی گەورەش وەرپا کەرد، هامپەیمانیێوە بەینوو بەلوجی و کوردی و عەرەبی و لوڕی و تورکمانی کۊ کەرڎۊ، کە بە درێژایی تارێخی هەوڵۍ وێپاریزنایشا دان.

هەرپاسە ئاماژەش پانەیە کەرد، وەختوو شۊڕشەکەینە، بەلوجییەکاو پاکستانی بە چنڎین وێنیشانەدایۍ سڵامشا وەنەو شۊڕشوو گەلاو ئێرانی کەرد، سەرەڕاو ئانەیە چنڎین ئینسانۍ سادۍ بەلوجۍ لاو هێزەکاو ئێرانیوە کوشیۍ وەلۍ گەلوو بەلوجی دژوو ستەمی و کوشتەی ژەنا ئەرەپڕۍ و ناڕەزایەتییشا بەروست. ئارۊیچ ئێران و پاکستان بە چەکی قورس هجوومۍ کەرا سەروو شارەکاو بەلوجستانی، ژەنی و زارۊڵۍ کوشا. بەلوجییەکۍ ئەوەخوایش کەراوە هامشێوەو شۊڕشوو "ژەنێ، ژیوای، ئازاڎی"ی پێویسیی ئیسەیش بە هامپەیمانیی مدرامانی دژوو نەژادپەرسان قەوەت کریۊ.