کۆمیتەو پارێزناو ڕۆنامەنوویسا (سی پی جەی) ئەرەیاۋناش، ھەرێموو کوردسانی ئینا ریزوو ئا وڵاتانە کە چنەشانە تۆمەتوو تیرۆری و دژە دەوڵەتبیەی وزیۆ پاڵوو ڕۆنامەنوویسا.
بەپاو گوزرشتێوە کۆمیتەو پارێزنای ڕۆنامەنوویسا (سی پی جەی)، ھەرێموو کوردسانی ھامشێوەو میسر، سعودیە، مەغریبی چی ساڵا دماییەینە تۆمەتەو وەڵاکەردەیۆ ھەواڵی ناڕاسی، تیرۆری و تۆمەتەو دژە دەوڵەتی جە دژوو ڕۆنامەنوویسا فراوانتەر کەردەن.
ئاماژە پانەیچ کریان، سەروو ئاستوو ۋەرکەوتوو دلېڕاسەی میسر خراپتەرین وڵاتا پۍ زینڎانیکەردەی ڕۆنامەنوویسا و ھامشێوەو تورکیای، پلەی ھەشتەمش جە جەھانەنە گرتەن بە گێرتەی ١٣ ڕۆنامەنوویسا و سعودیە ئینا ریزبەنڎی نۆیەمەنە بە گێرتەی ١٠ ڕۆنامەنوویسا.
ئانەیچ وزیان ڕووە، کە جە بەحرەین و سوریانە پەنج ڕۆنامەنوویسۍ ئینۍ زینڎانەنە، جە مەغریب و جەزائیر هیچ حاڵەتێوە تازەو زینڎانی کەردەی ڕۆنامەنوویسا تۆمار نەکریان و جە هەرێموو کوردسانیچ چوار ڕۆنامەنوویسۍ ئینۍ زینڎانەنە، کە کە حاڵەتێوەشا تازەن.
جە ئیسەنە حەریۆ جە ڕۆنامەنوویسا 'شێروان شێروانی، گوهدار زێباری و قارەمان شوکری بە تۆمەتەی جیاجیا ئینۍ زینڎاندانەنە و ماوەو نزیکەو یەرۍ مانگایچا سلێمان ئەحمەڎ جە تەرەفوو پەدەکەیۆ بڕفانیان و بێسەروشۊنکریا.
جە ماوەو چوارساڵی ویەردەینە فشارەکۍ پەدەکەی پۍ سەروو ڕۆنامەنوویسا و چالاکا زیاڎشا کەردەن و بەدەیان کەسۍ بە مەڵامەتوو رەخنەگرتەیۆ جە دەسەڵاتی جە تەرەفوو ئا حیزبەیۊ جە هۆلێر و دهۆکەنە گیریێنۍ.
فشاروو هجومەکۍ پەدەکەی پۍ سەروو ئازاڎیی ڕابەربڕیەی و ئازاڎیی ڕۆنامەنوویسا جە تەرەفوو فرەو رێکوزیای و ئەرەمەرزیایا میان نەتەوەییوە رووبەڕوو رەخنەی تنی بیەنۊ.
