جە ڕاوەبەرا جەمەو مافەکا مرۆڤی لقوو وانوو ئیهەدەی، پارێزنەر هەڤاڵ سینان ئاراس، ئاماژەش پانەی کەرد، بە گۆشەگیری سەروو ڕابەروو گەلوو کوردی عەبدوڵا ئۆجالانی، ڕا جە چارەسەرکەردەیۍ ئاشتیانە، دیموکراتیک و عەقڵانیی پرسوو کوردی گێرا.
ئاراس کە یۊنە جە ڕاوەبەرا جەمەو مافەکا مرۆڤی، ئیهەدەی لقوو وانی، ئانەش دەسنیشانکەرد، ئا گۆشەگیرییەی سەروو ڕابەروو گەلوو کوردی عەبدوڵا ئۆجالانیرە سەپیان، دژ بە یاساو سزادای تورکی و یاساو جابەجێکەردەین.
ماوەو ٣٥ مانگان حیچ زانیاریێوە جە ڕابەروو گەلوو کوردی عەبدوڵا ئۆجالانی و زینڎانیا تەروو ئیمراڵیوە نیا. جە گرڎوو دنیێنە جە چوارچێوەو هەڵمەتەو "ئازاڎیی پۍ ئۆجالانی، چارەسەری قۊرتە سیاسیەکا کوردی" چالاکیۍ ئەنجامدریێنۍ. حەرپاسە جە زینڎانیا سیاسیچ بە چالاکی مانگرتەی جە واردەی ماوەو ٥٥ ڕووان پەشتگیرۍ ئا هەڵمەتێنۍ.
پەیوەس پا مژاریۆ هەڤاڵ سینانی پارێزنەر پۍ ئاژانسوو هەواڵوو فوراتی (ANF)ی قسێش کەردۍ و ئاماژەش پانەی کەرد بەپاو یاساو جابەجێکەردەی، بە هۊرگێرتەی بەڵگێوە جە خەسەخانەو فەرمانگەو تیپی پزیشکی، متاویۆ سزاو زینڎانیا نەوەشی مردۆ و واتش: "داخەم مەشۆ چی مژارەنە دەوروو ماف دریان بە داواکاری گرڎیی، ئی مافە بەشێوێوە هەڕەمەکی دژوو زینڎانیا نەوەشی قەرار مڎۆ".
فشار سەروو چالاکا مانگرتەی جە واردەی هەن
پارێزنەر ئاراس، باسش چانەی کەرد مافەکاو مرۆڤی، جە ۋەران ۋەروو زینڎانیا مانگرتەینە جە واردەی، بە شێوێوە ۋەرچەم پاشێل کریۆ و واتش: " تورکیا بەپاو ئا پەیمانا مەجمۊوە کە ۋێش متێنێشەرە و مۆرەو ۋێش دێنێش ۋنە. دەستوری بنەڕەتی، یاساو سزادای و یاساو جابەجێکەردەی تورکی پاشێل کریۆ. چەمڎاری تەندروستی و چارەسەرکەردەی فەراهەم مەکریۆ. بە تایبەت سزاو دیسپلینی جابەجێ کریۆ و گۆشەگیری مسەپیۆ".
"جە ژوری تاکە کەسینە مازاشاوە"
پارێزنەر ئاراس ئانەش بەروست، جە گرڎوو زینڎانەکا تیپوو (ف) و (س)ینە بە ئاسایشێوە بەرزۆ، گۆشەگیری مسەپیۆ و واتش: " سزا سەروو سزۍ مسەپیۆ سەروو زینڎانیارە. جە ژوری تاکە کەسینە مازاشاوە و جە ڕوو ویرکەردەیۆ و هۆشیوە ئا مرۆڤا کوشا. کەسوکاروو زینڎانیا، بە ئاسانی مەتاوا سەردای زینڎانی کەرا".
"گۆشەگیری جە ئیمراڵینە نایاساییا"
پارێزنەر ئاراس گۆشەگیرکەردەی ڕابەروو گەلوو کوردی عەبدوڵا ئۆجالانی بە پێچەوانەو یاساو تاوانۍ و یاساو سزادای تورکیای نامۍ بەرد و واتش:" بەپاو یاساکۍ مشۊم چەمپنەکۊتەی بنەیانە و کەسوکار و پارێزنەرەکاش قەڎەغە نەکریۆ، ئی مافەیچە پاشێل کریان ئانە ٣٥ مانگێن ئی مافە ئاستەنگ کریان. "چوارچێوەی یاسایی چۍ جابەجێ مەکریۆ، بە گۆشەگیرکەردەی ڕابەروو گەلوو کوردی عەبدوڵا ئۆجالانی سەروو بنەماو سیاسەتوو جەنگی، گەرەکشانە قۊرتەو کوردی بە چارەسەرنەکریایی بازاوە. حەرپاسە بە گۆشەگیرکەردەی، چارەسەرێوە لۆژیکی، دیموکراتیک و ئاشتیانە پۍ پرسوو کوردسانی وزیانەرە".
