سەیرانگاو زەڵم-ی پاک کریاوە
بەسەرپەرشتی رێکوزیاو وارانی و بە بەشداری گەنجێ وێبەخشێ (زەڵم)ی و (ئەحمەدئاوا)ی، هەڵمەتو پاککەردەیۆ سەیرانگاو زەڵم-ی ڕێکوزیا.
بەسەرپەرشتی رێکوزیاو وارانی پەی گەشەپنەدای و پێوەرەژیوای هەڵمەتو پاککەردەیۆ سەرچەمە، دەرە، هامنەهەوار و سەیرانگاو زەڵم-ی ڕێکوزیا. جە هەڵمەتەکەنە گەنجێ وێبەخشێ دەگایەکانو (زەڵم)ی و (ئەحمەدئاوا)ی بەشدارێ بیێ و جە سەرچەوە تا دەرە و کۆجیێ و گوزەرەکێ هامنەهەواری و سەیرانگاکەیشان جە شەخەڵی و خاشاکی و ئەوامەنێ گەشتیارەکان پاکێ کەردێوە.
رێکوزیاو وارانی پەی گەشەپنەدای و پێوەرەژیوای سەرپەرشتیارو هەڵمەتەکەی ئاشکراش کەرد: ڕێکوزیاکەشان هەرمانە پەی بەکلتورکەردەی پاکەوکەردەیۆ یاگە گەشتیاریەکانو ھۆرامانی مەکەرۆنە و جەی ئی چوارچوەنە هەڵمەتێ و چالاکیێ جۆراوجۆرێ و جیاوازێ جە هەورامانەنە ئەنجامێ بڎۆنە و خەڵکی و گەشتیاەکان بە کلتورەکەی ئاشنێ مەکەرۆنە.
سەرچەمە و هامنەهەوار و سەیرانگاو زەڵمی سەر بە شارو (خورماڵ)و هەرێمو (هۆرامان)یەن و ساڵانە دەیان هەزار گەشتیارێ سەردایش مەکەرانێ. بەهۆکارو ئانەی گەشتیارەکێ ژیوگەکەیش نمەپارێزنان، سەیرانگاو زەڵمی بییەن بە وێرانە و شەخڵگا. جە وەرانوەرەنە حکومەت و خەڵکو ناوچەکەی بە تایبەتی دوکاندارێ و بازرگانەکێ کەمتەرخەمێنێ و ڕاکارەکێ پارێزانای ژیوگەی نمەگێرانێنەوەر.
