تاژێ ئەرەیاۋناش، پەدەکە جە ڕاو گلېرۆبیەیێوە جە ئەڵمانیانە گەرەکشا پاکانۍ پۍ ۋەرپرسیاری ۋێش جە قڕکەردەی سەروو ئێزدییەکا کەرۆ و جەختیچش کەردۆ کە ئانەی ڕەڎکەراوە. جەختیچش کەردۆ کە هامشێوەو پەیمانەو ٩و تشرینی یووەمی، ئا حۊڵەیچە پوچ کەراوە.
قەرارا ئارۆ جە پەرلەمانوو ئەیالەتوو نۆردراین وێستفالیای ئەڵمانیاینە بە نامونیشانوو "رێککەوتەی و ئاشتەوایی" گلېرۊبیەیۍ بە بەشداری پەدەکەی جە بارەو کۊکوشی ٣/٨/ ٢٠١٤ یۆ سازکریۆ. جە ۋەران ۋەرەنە گلېرگەو ئێزدی بەتایبەتی شەنگال ماچا تا ئا ژەنۍ کە بڕفانیێنۍ ئازاڎۍ نەکریا و قەبرە بەکۆمەڵەکۍ هۊرنەدریاوە و ۋەرپەرسا کۊکوشیەکەی دادگایی نەکریا، حیچ ڕێککۊتەیۆ بیەیش مەبۆ، هەرپۊکەی دژش مرداوە.
جمیەروو ئازاڎیی ژەنا ئێزدی (تاژێ) جەبارەو مژارەکەیۆ جە ئەنجومەنوو گەلوو دگورێی شەنگالی کۆنفڕانسێوە رۆنامەوانیش سازکەرد و چنەسەنە واتەواچەو تاژێ ریهام هجۆ ئەرەیاۋنېوەش ۋەناوە و داواش جە گرڎ لېوە کەرد بەشداری ئا گلېرۊبیەیشا نەکەرا.
جە ئەرەیاۋناکەینە گلېرۊبیەیەکە شەرمەزار کریا و ئا هەنگامۍ پېسە پیلانگێڵنیێوە جە دژوو گلېرگەو ئێزدیی نامۍ بریا.
ریهام هجۆ واتش، "ۋێش جە ۋێشەنە گرڎ کەس پانەی مزانۆ کە بە چ شێوێوە قڕکەردەی دژوو ئێزدیەکا کریا. ئانەی ئەمرەکێش جابەجۍ کەردە داعش و هامکارەکۍ داعشی بێنۍ. ئانە ڕاش پۍ قڕکەردەکەی وەش کەرد، شەنگالش بە بێ پارێزنای جیائاست، پێشمەرگەکۍ پەدەکەی بێنۍ. ۋەرپەرسی دووەمیچ دەوڵەت و حکومەتوو عێراقی بۍ کە کەمتەرخەمۍ بێنۍ ۋەران ۋەر بە شەنگالی. هامپەیمانی ئا هێزا جە دژوو ئیراڎەو ئێزدییەکا، پېسە درێژەداین بە کۊکوشیەکەی".
ریهان هجۆ ئاماژەش بە پەیمانەو ٩و تشرینوو یووەموو ٢٠٢٠ کەرد جە دژوو شەنگالی و ئانەش وست ڕووە ئامانجوو ئا پەیمانۍ بێ ئیراڎەکەردەی گلېرگەو ئێزدییا و گەرەکشانە گلېرگەو ئێزدی گێڵناوە پۍ وەڵۍ ساڵەو ٢٠١٤ی، حەرپۊکەی دژش مردێنێوە.
ئانەیچش وست ڕووە، کە گلېرگەو ئێزدی کێشەش چنی حیچ نەتەوە و ئایینێوە نییا و ئەرەیاۋناش، "حیچ کێشێوە جە بەینوو ئێزدی و عەرەبەکانە نییا. بڕۍ کەسۍ یاخوڎ عەشرەتۍ لووۍ دلۍ داعشی، ئێمە ۋنەپەرسایۆ جە کەسایەتی یاخوڎ عەشیرەتەکا کەرمۍ. ۋنەپەرسای جە گلېرگەی مەکریۆ و حیچ کێشێوە پا جۆرەما نییا. دیارا چا کۆنفڕانسەینە کە چێروو نامۍ رێککۊتەی و ئاشتەوایینە کریۆ، تەرەفێوە کە ۋێش چنەشەنە مشارۊوە پەدەکەن. پەدەکە گەرەکشا ۋێش بە بێتاوان نیشانە بڎۊ و پاکانۍ پۍ دەوروو ۋێش جە کۊکوشیەکەینە کەرۆ، گەرەکشا ۋێش جە خیانەتوو ٣ۍ ئابینە بێ بەری کەرۆ و کردەوەکاش پەردەپۆش کەرۆ. ئێمە ئانەی رەڎکەرمېوە و ئانێچ بەشداری ئا گلېرۊبیەیە کەرا بە هامبەشوو تاوانۍ منیەیمێشارە".
ریهام هجۆ داوایچش کەرد کە حیچ ئێزدی، کریستیان و مسوڵمانێوە بەشداری ئا گلېرۆبیەیە نەکەرا، چونکی پېسە چنی دژوو پەیمانەو ٩و تشرینوو یووەمی مردێوە و ئانۍ بەشداربێنۍ چا پەیمانێنە بە نەیارۍ گلېرگەو ئێزدی نریێرە، بەهەمان شێوە گلېرۊبیەکەو ئەڵمانیایچ ڕەڎکەراوە و بەشدارا ئا گلېرۊبیەیە بە نەیار و دوژمنوو گلېرگەو ئێزدی منیارە. جەختیچش کەردۆ کە حیچ رێککۊتەیۍ جە بەروو ئیرادەو گلېرگەو ئێزدیۆ قبوڵ مەکەرا و جە لېوەتەریچۆ دوژمنایەتیشا چنی حیچ نەتەوێوی نییا تا بەیا و ئاشتەوایی کەرا، دوژمنوو ئێزدیەکا دیاربۍ، ئا لایەنێچە هامکاریی ئا دوژمنەیشا کەرد دیاربێنۍ. حیچ کێشێوەشا چنی حیچ گلېرگێوەنیا و گلېرگەو ئێزدی سەروو بنەماو واڵە و برایەتی گەلا، وەشەسیای و یۊترین قبوڵکەردەی خەبات کەرۆ. پۊکەی جارێوەتەر ئەرەیاۋنمېش کە ئا پیلانگێڵنیۍ رەڎکەرمېوە، حەجگیز سەرمەگێرۆ و حەرکەسیچ بەشداری چا کۆنفڕانسەنە کەرۆ بە ۋەرپرسیارش منیارە.
کۆنفڕانسە رۆنامەوانیەکە بە دروشمەکا 'بژیۋۆ مدرامانوو شەنگالی'، 'ژەنی، ژیۋای، ئازاڎیی' و ' مرۆ خیانەت' دمایش پنە ئاما.
