تەڤگەری ئازاڎیی ژەنا ئێزدی (تاژێ)، بۆنه‌و ١١ه‌مین ساڵیاڎو ئاخېزو ۋەرنیشتیۊ، ئەرەیاۋناش، "گرڎو گه‌لا و ئایینه‌كا چېرو چه‌ترەو ئاخېزو ۋەرنیشتینە یاگۍ گېرا و به رۆح و ئیراڎە و ئه‌قڵێوە هامبه‌ش ۋېشا ڕاۋەبەرکەرا".
تەڤگەری ئازاڎیی ژەنا ئێزدی (تاژێ)، بۆنه‌و ١١ه‌مین ساڵیاڎو ئاخېزو ۋەرنیشتیۊ ، كه جە ڕۊو ١٩و ته‌مووزو ساڵەو ٢٠١٢ ی چه‌خماخه‌كه‌ش دریا ۋنە، ئەرەیاۋنېۋەش ۋەڵا کەرڎۊ.
جە ئەرەیاۋناکەو تاژێنە ئامان، جە ١١ه‌مین ساڵیاڎو ئاخېزو ١٩و ته‌مووزینە، مبارەک بایی ئا ئاخېزیە جە گرڎوو گەلەکەیما جە ۋەرنیشتوو سەرنیشتو و ۋەرکەوتوو سوریای کەرمۍ و به وەشەۋیسیۊ سڵام جە گه‌له‌كه‌یما کەرمۍ. جە كه‌سایه‌تی گەشمەرڎا لېمان شوێشۍ، یوسرا ده‌روێشۍ و فورات تومانینە گرڎو گەشمەرڎا ئاخېزی به ڕێز و پنەزانایۊ یاڎ کەرمېۋە.
تاژۍ ئاماژه‌ش پانەیچ کەرڎەن، ئاخېزو ۋەرنیشتی كه پېسە ئاخېزو ژەنا ۋەڵۍ کۊت، جە ١١ه‌مین ساڵیاڎشەنە ۋەڵېکۊتەیۍ گۊرەش نیشانە دا و بی به نموونه پۍ گرڎو مرۆڤایه‌تی. بێگۆمان ئا ۋەڵۍ کۊتەیە جە ئاکامو کۊشیایۍ گۊرەینە ئاما ئاراوه و ژەنی دەورو سەرمەشقیشا چا ئەرەکۊشاینە گېڵنا. ئاخېزو ۋەرنیشتی پېسە ئاخېزو ١٩و ته‌مووزی لۋا دلۍ تاریخیۊ. جە ١٩و ته‌مووزینە ئا چه‌خماخۍ کە جە كۆبانێنە دریاۋنە، سه‌رانسه‌رو ۋەرنیشتی و فرەو یاگا تەرو سوریایش گېرتۊ. ئارۊ ئاخېزو ۋەرنیشتی پۍ گرڎو ژەنا جەهانی بیەن بە هیواو ڕۊشنایی.
جە به‌شێۋە تەرو ئەرەیاۋناکەو تاژێنە ئامان، دژ بە سیستمو نه‌ته‌وه-ده‌وڵه‌تی كه سات به سات گەرەکشا مرۆڤایه‌تی دلېنە بەرۊ، ئاخېزو ۋەرنیشتی گرڎوو مرۆڤایه‌تیش پارېزنا. جە هه‌مان وەختەنە ئاخېزو ۋەرنیشتی به په‌یڕه‌وی کەرڎەی جە سیستمو نه‌ته‌وه‌ی دیموكراتیكی، بی به نموونېۋە جوانو پېۋەرە ژیای گه‌لا. سیستمو نه‌ته‌وه ده‌وڵه‌تی كه به ئه‌قڵییه‌تێۋە پیاسالاری ئاماڎەکریان، گرڎ ڕۋۍ دژ بە ڕژېمو ئاخېزو ۋەرنیشتی هجوم ئه‌نجام مڎۊ. جە ۋەران ۋەرو ئا سیستمه‌ینە پرۆژه‌و ڕابه‌رایه‌تیما به‌نامۍ نه‌ته‌وه‌ی دیموكراتیكی، ڕاش به گه‌ل و ئایینه جیاجیاكا ۋەرنیشتی دا کە پېۋەرە بژیۋا. ئانەیچ بەرش وزۊ كه سیستمو نه‌ته‌وه‌ی دیموكراتیكی، چن بەقوەتا.
تاژۍ ئاماژه‌ش به گرنگی دەورو ژەنا جە ئاخېزو ۋەرنیشتی کەرڎ و ئەرەیاۋناش، ژەنی جە ئاخېزو ۋرنیشتینە جە مېڎانو سه‌روازی حەتا مېڎانی سیاسی، جە كایه‌ی كۆمه‌ڵایه‌تی حەتا كایه‌ی دیپلۆماسی، جە گرڎو بواره‌كا ژیاینە، نموونۍ گۊرەو ئازایشا نیشانەدا و خۊتانکەرڎەیشا جە ئاخېزو ۋەرنیشتی کەرڎ. ئانۍ کە زیاتەر چانەی یاۋېنە كه ئاخېزو ۋەرنیشتی به ڕه‌نجو ڕابەر ئاپۆی بنیاڎ نریان، ژەنۍ بېنۍ. ئه‌گه‌ر ئارۊ ڕا جە هه‌ڕه‌شه‌كا داعشی گیریان، جە سایەو ژەناۋەن، ئارۊ ئا ژەنه ئازۍ جە لایەنو ئه‌قڵییه‌تی فاشیستی ئاكه‌په-مه‌هه‌په‌یۋە کریانە ئامانج و گرڎوو هێزه‌كا جەهانی ۋەران ۋەر پی ئاژەیە بێده‌نگېنۍ.
تاژۍ سه‌رنجش وست سەرو ئانەی،كه "چېرو چه‌ترەو ئاخېزو ۋەرنیشتینە گرڎوو گه‌لا و ئایینه‌كا یاگېشا گرتېنە و به رۆح، ئیراڎه و ئه‌قڵی هامبه‌ش ۋېشا ڕاۋەبەرکەرا. ئاخېزو ۋەرنیشتی نه‌ته‌نیا پۍ گه‌لوو كورڎی، پۍ گرڎوو گه‌لا ۋەرنیشتی و سوریای بی بە هیواو ڕۊشنایی. جە دژوو ئه‌قڵیه‌تی تاك ڕه‌ویی و فاشیستی، ئا رۆحه هامبه‌شه تا ئارۊ ئاخېزو ۋەرنیشتیش گۊرەتەر کەرڎەن.
جە به‌شێۋە تەرو ئەرەیاۋناکەینە ئامان، سیستمی ئەرەگیر پۍ ئانەی هجوم کەرۊ سەرو بەدەسئامایەکا ئاخېزو ۋەرنیشتی، گرڎ جۆره شێوازێۋە قیزه‌ونش به‌كارئارڎ، دماین نموونه‌یچش به‌ڵایۍ پېسە داعشی بۍ. جە ۋەران ۋەرو داعشینە كه بیەبۍ به به‌ڵا پۍ گرڎو مرۆڤایه‌تی، به سەرمەشقی ژەنا مدرامانۍ گۊرە ئه‌نجامدریا و به ده‌سو هێزه‌كا مدرامانو ۋەرنیشتی، مرۆڤایه‌تی جە به‌ڵایۍ پېسە داعشی نەجاڎ دریا.
تاژۍ تەئکیدیچش کەرڎۊ، ئاخېزو ۋەرنیشتی جە بنیاڎنیای سیستمو نه‌ته‌وه‌ی دیموكراتیكی جە شه‌نگال پېسە نموونەی هۊرگیریا. حەرپاسە ڕۆحو ئاخېزو ۋەرنیشتی، كاریگه‌ریېۋە فرەش سەرو ئەرەمەرزناو تاژۍ جە شه‌نگال بۍ. ئاخېزو ۋەرنیشتی كه ئارۊ پۍ گرڎوو مرۆڤایه‌تی بیەن بە سه‌رچەمەو ئیلهامی، پۍ شه‌نگالیچ گرنگیېۋە فرەش هەن.
جە دمادمایی ئەرەیاۋناکەیچەنە ئامان، جارێۋەتەر مبارەک بایی ١١ه‌مین ساڵیاڎو ئاخېزو ١٩و ته‌مووزی کەرمۍ و قەناعەتما پاسەن كه سه‌ركۊتەی گۊرەتەر پۍ گه‌لا ۋەرنیشتی به‌دی مارۊ.
هـ . ش
