تەڤ-دەم جە دژو تاوانەکا دۊڵەتو تورکی بانگەوازش کەرڎ
ئەنجوومەنو ئەرەیاۋنای تەڤ-دەمی هرووژمەکۍ دۊڵەتو تورکیش جە ۋەرا ۋەرو ڕۆنامەنوویسانە بە تنی شەرمەزار کەرڎ و واتش: "ئینە جارێوەتەر تەرسەو دۊڵەتو تورکی جە ئەرەیاۋنای ئازادی، نیشانە مڎۆ".
ئەنجوومەنو ئەرەیاۋنای تەڤگەرو گلېرگەو دیموکراتیکی (تەڤ-دەم) دەربارەو هرووژمەکا دۊڵەتو تورکی ئەرەگیری پەی سەرو ڕۆنامەنوویسا ئەرەیاۋنێوەش وەڵاکەرڎۆ.
ئەنجوومەنو ئەرەیاۋنای تەڤ-دەمی سەرنجش وست سەرو تاوانە و هرووژمەکا دۊڵەتو تورکی ئەرەگیری جە دژو هەرێمو سەرنیشت و ۋەرکۊتوو سووریای و تەئکیدش کەرڎۆ کە ڕۆنامەنوویسا هەرێمەکەی شایەتۍ تاوانەکا دۊڵەتو تورکی فاشیستینۍ.
جە ئەرەیاۋناکەینە ئامان: "ڕۆنامەنوویسا بە کامێرە و گوزارشتەکاشا دروۍ و بانگەشەکا جەنگی دەروونی دۊڵەتو تورکی ئەرەگیری وزا ڕووە. هەرپاسە ڕۆنامەنوویسا مڎرامانی ئەفسانەیی قەسەدەی و ئیرادەی بەهێزو گەلوو سەرنیشت و ۋەرکۊتوو سووریای و پېوەس بە گەلی و دەسکەوتەکاشۆ ئەرەیاۋنا. ۋەرو ئینەیچ بانۍ بە مەرامو دۆڵەتو فاشیستی کە تەمامو یاسا مېیاننەتەوەییەکا پاشێل مکەرۆ".
جە بەردەوامی ئەرەیاۋناکەینە یاڎ وزیانۆ کە جە سەرەتاو جەنگینە جە بەنداوو (تشرین)ی چڼین ڕۆنامەنوویسۍ بیێنۍ بە ئامانجی ڕاسەوخۆو دۊڵەتو تورکی ئەرەگیری و وچیا: "ڕۆنامەنویسا جیهان بیلگینە و نازم داشتان سەرو ڕاو بەنداوو تشرینی و شارو سرینو کۆبانێنە جە هرووژمێوە دۊڵەتو تورکی ئەرەگیرینە گەشمەرڎۍ بیۍ. هېزی (١٥و شوباتو ٢٠٢٥) ڕۆنامەنوویس و شارو عەفرینی ئەرەگیرکریای عەگید ڕۆژ جە بەنداوو مڎرامانی ( بەنداوو تشرین)ینە جە لایەنو دۊڵەتو تورکی ئەرەگیریوە گەشمەرڎە کریا. ئینە جارێوەتەر تەرسەو دۊڵەتو فاشیستو تورکی جە ئەرەیاۋنای ئازادی کە دڕندەیی ئاڎیی ئاشکرا مکەرۆ، نیشانە مڎۆ".
جە ئەرەیاۋناکەینە قەولو شۊنکۊتەی هێڵۊو گەشمەرڎا ئەرەیاۋنای ئازادی دریا و بێدەنگی هێزە مېیاننەتەوەییەکا جە ۋەرا ۋەر بە هرووژمەکا دۊڵەتو تورکی ئەرەگیرینە شەرمەزار کریا. ئاماژە پانەی کریا کە بێدەنگی زیاتەر هانی دۊڵەتو تورکی مڎۆ پەی ئانەی تاوانەی زیاتەرە بکەرۆ.
جە دما دمایی ئەرەیاۋناکەینە بانگەواز جە ئەرەمەرزیا یاسایی، مرۆیی و نەتەوەیۆگێرتەکا کریا کە شۊنیرەلوای و هۊرسەنگنای پەی تاوانەکا دۊڵەتو تورکی ئەرەگیری جە دژو هەرێمەکەی و بە ئامانج گېرتەی ڕۆنامەنوویسا کۆمیتێوە سەربەخۆ ئەرەمەرزنارە.
