دەسەو ڕاوەبەری تەڤگەری ئازاڎیی گلېرگەو کوردسانی سەبارەت بە سەرداکەو تەیب ئەردۆغانی سەرۆککۆماروو تورکیای پەی عێراقی ئەرەیاۋنېوەش وەڵاکەردۆ و چنەشەنە ئەرەیاۋناش: " پڕۆژە و نیەتوو ئەردۆغانی،  زینڎەکەردەیۆ میساقی میللیا كە ئاڎیچ گېڵایۆ نەخشەو سیاسیی دەوڵەتوو عوسمانییا جە مەنتیقەکەنە،  کە خودوو ئەردۆغانی حۊڵش پەی مڎۆ و گەرەکشا ئی پرۆژە ئەرەگیریە جا بەجێ بکەرۆ، هەر پەی ئانەیچ سڵ جە حیچی مەکەرۊوە و سەرە کەرۆ گرڎ یاگېرە، بێگومان ئا دەسەڵاتە فاشیستەو تورکیای، جە بەینوو هیچ كوردێنە جیاوازیی مەکەرۆ."

ئاماژەش پانەیچ کەردەن:  ئێمە پېسە تەڤگەری ئازاڎیی گلېرگەو كوردسانی، مردایۆ جە ۋەرا ۋەروو هەر هجووم و پەلامارێوە ئەرەگیریێنە، پەی سەروو خاک و سەروەریی پانیشتوو کوردسانی، بە ئەركێوە ئەخلاقیی و  نەتەوەیی و نیشتیمانیی ۋێماش مزانمۍ و دژش مردمېوە. چېگۆ داوا جە تەماموو گەلەکەیما و ئازاڎییوازا و  گرڎوو هێزە سیاسییەکا ھەرێموو کوردسانی و عێراقییەكا مکەرمۍ، دژوو ئی پڕۆژە مەترسییڎارەو دەوڵەتوو توركیای ساعیب ھەڵوێسۍ با ".

دەقوو ئەرەیاۋناکەو دەسەو ڕاوەبەری تەڤگەروو ئازاڎیی گلېرگەو کوردسانی:

ئامای ئەردۆغانی پەی عێراقی و هەرێموو كوردسانی، پەی دلېنەبەردەو دەسکۊتەکا گەلوو کوردی و ئاژاوەگێڵنییا.

دەوڵەتوو تورکیای جە ماوەو ٢٢ساڵا دەسەڵاتوو ئەردۆغانینە، گەورەتەریین هجوومی سەروازیی و دیبلوماسیی و  ئەرەیاۋنای جەنگی تایبەتیی ۋەرا ۋەروو  گەلوو كوردینە جە ھەر چوار بەشوو كوردسانینە ئەنجامداوە. بە ئاشكرا و ۋەروو چەما گرڎوو جەهانیۆ، عێراق و سوریانە پەی دژایەتیی گەلوو کوردی ھامکاریی داعشی و  گرووپە تیرۆریستییەکاش کەرد؛ ئەرەگیرکەردەو عەفرینی و سەرێکانی و مەنتیقەکا تەروو ۋەرنیشتوو کوردسانی، بەھامکاریی چەتە بەکرێگرتەکاش ئانە نمونەو ئا کۆمکوشیی و کاولکارییە.

ئا دەوڵەتە فایشست و دژە کوردە، حەرپانەیۆ نە مردان هجووم بکەرۆ سەروو گەریلاكاو هێزوو پارېزناو گەلی، بەڵکم دەسش جە مەردمی سڤیلی و ژەنا و زاوڵایچ نەپارېزنان، بەشێوێوە دڕندانە بە چەكی قەدەغە كریا، هجوومش کەردەن سەروو ناوەندە خزمەتگوزاریی و مەدەنیی و تەندروستییەکا، بە ھەزاران  ھامووڵاتیێش گەشمەرڎۍ و زامڎارۍ کەردێنۍ. پانیشتوو کوردسانینە ڕۊنیا  ھاموڵاتییۍ مەدەنیۍ گەشمەرڎۍ نەکەرۆ و باخۍ و دارسانەکا کاول نەکەرۆ. سەرەڕاو ئانەی دەوڵەتوو توركیای، بە بێ جیاوازیی دژایەتیی كوردی مکەرۆ، بەڵام پەدەکە بێ شەرمانە، بێ ئانەی دەرس جە ۋییەردەی هۊربگېرۆ، بە گرڎوو دەرفەتوو ۋێشۆ هامكاریی ئی ئەرەگیری و  هجوومە دوژمن كارییە پەی سەروو گەریلاكاو ئازاڎیی كوردسانی مکەرۆ، کە جە گرڎھەلو مەرجێوەنە گەریلاو ئازاڎیی، ئاماڎەو پارېزناو گەلوو کوردسانی و دەسکۊتەکاشا بە ھەرێموو کوردسانیچۆ. ئاشکران پڕۆژە و نیەتوو ئەردۆغانی،  زینڎەکەردەیۆ میساقی میللییا كە ئاڎیچ گېڵایۆ خەریتەو سیاسیی دەوڵەتوو عوسمانییا جە مەنتیقەکەنە،  کە خودوو ئەردۆغانی حۊڵش پەی مڎۆ و گەرەکشا ئی پرۆژە ئەرەگیریە جا بەجێ بکەرۆ، هەر پەی ئانەیچ سڵ جە هیچی مەکەرۊوە و سەرەکەرۆ گرڎ بەرێرە، بێگومان ئا دەسەڵاتە فاشیستەو تورکی جیاوازی جە بەینوو حیچ کوردێوەنە مەکەرۆ.

هەر پۊکەی مردایۆ جە ۋەرا ۋەروو ئا سیاسەتە شۆڤێنیی و ئەرەگیرییەینە، ئەركوو گرڎ تاكێوە خاوەن کەرامەتوو كوردیا، كە بلۊوە گژۍ ئا سیاسەت و هجوومارە؛ عالتەرین جوابیچ جە گرڎ ئاستێنە هەڵوێسی یۊگێرتەیی و نەتەوەییانەن. تەنانەت لایەنە سیاسییە عێراقیەكێچ، ۋەرپەرسېنۍ جە پارێزناو سەروەریی خاكوو عێراقینە، جە ۋەرا ۋەروو پڕۆژەو ئەرەگیری و لەناو دلېنەبەردەینە، چونکی جە بەروو پروژەو ئەرەگیری و پارچە کەردەی خاکینە،  چەمەڕاو هیچ كارێوە تەری جە ئەردوغانی مەکریۆ.

ئێمە پېسە تەڤگەری ئازاڎیی گلېرگەو كوردسانی، مردایۆ جە ۋەرا ۋەروو هەر هجووم و پەلاماردایۍ ئەرەگیرینە، پەی سەروو خاکی و سەروەریی پانیشتوو کوردسانی، بە ئەركێوە ئەخلاقیی و  نەتەوەیی و نیشتیمانیی ۋێماش مزانمۍ و دژش مردمېوە. چێگۆ داوا جە تەماموو گەلەکەیما و ئازاڎییوازا و  گرڎوو هێزە سیاسییەکا ھەرێموو کوردسانی و عێراقییەكا مکەرمۍ، دژوو ئی پڕۆژە مەترسییڎارەو دەوڵەتوو توركیاینە ساعیب ھەڵوێسۍ با، جیای ئانەی پێشوازیی و ھامبەشیی کەرا چنیش،  دەموودەس داواو بەرکەردەی سوپا ئەرەگیرەکېش دلۍ خاکوو عێراقی و ھەرێموو کوردسانینە ۋنە بکەرا. مشۊم ھامکاریی و پەشتیوانییەکا ئەردوغانی پەی داعشی و گرووپە تیرۆرستییەکا جە یاڎ نەکەرمۍ کە پاسشە کەرد ھەزاران  ھامووڵاتیۍ عێراقیی بە کورد و عەرەب،  ئێزیدی و کریستیانیی بیۍ بە قوربانیی جە شەنگال و موسڵ و مەنتیقەکا تەروو عێراقینە، ئەردۆغان نەک هەر ئاوەڎانیی و ئاشتیی، بەڵکم تەنیا نەهامەتیی و کاولکاریی چنی ۋێش مارۆ!

نەخێر پەی ئامای بکوژوو ھەزاران ھاموڵاتییا بێتاوانی، نەخێر پەی جەنگی و ئەرەگیری، بەڵێ پەی ئاشتیی و چارەسەری دیموکراتی، سەركۊتەبۆ ئیرادەو ئازاڎییوازیی گەلوو کوردی."