جە ئەرەیاۋنێوەنە هامسەرۆکۊو گرڎینەو دەم پارتی تولای حاتەمئۆگیولاریە ئەرەیاۋنانش، "کەس نمەتاوۆ کە پاگیری و قسەکاما پەی ئاشتی پێچەوانە و چەواشە بکەرۆ. گرڎو کۆششەکاما پەی ئاشتیێوە شکۆمەندانەینۍ. تەمام".

ئەرەیاۋنانیچش: "قسەکۍ هێزیم جە ئامەدەنە جە لایەنو بڕۍ دەزگایا ئەرەیاۋنای و میدیای دیجیتاڵیوە پێچەوانە کریێنێوە و نەواخنەکاشا بەر ئامان. پا جۆرە بانگەشەشا کەرد کە پەی 'هەڕەشەکەردەی'نۍ من ئا قسێمە کەردێنۍ.

ئا پێناسە و مامەڵەکەردەیە هیچ عیلاقێوەشا بە قسەکاو منۆ نییا. جە پاسە ئاژێوە هەستیار و گرنگەنە مشۆم بزانیۆ کە ئێمە بە ۋەرپرسیاری و هەستیارییوە مامەڵە مکەرمۍ.

ئانەی ئارۆنە مشۆم بکریۆ، ئانەنە کە دلۍ سنوورەکاو تورکیایچ و جە ۋەرکۊتوو مېیامینینە پرسو کوردی بە شێوێوە دیموکراسیانە و ئاشتیانە چارەسەر بکریۆ. پەی چارەسەرکەردەی پرسو کوردی کە هامکات رەهەندێوە هەرێمایەتیش هەن، پېسە پارتەکەیما چێشما دەسەنە بۍ ئاماڎێنمۍ بکەرمێش و ئانەیچ جە گرڎوو قسەکامانە وزمێنە ڕووە. چارەسەریی ئاشتیانە تەنیا ڕاو رزگارینە جە گرڎ جۆرە کاولکاریێوە. ئا مژارەی گەرەکم بۍ واچووش ئینەنە

ئێمە ئا پارتەنمۍ کە بە ئەزمونو ۋێمانە مزانمۍ، جە سەردەمێوە پی جۆرەنە زۋانی زبر و هەڕەشۍ چارەسەریش چنە مەگنۆوە. پرسو سەرەکی ئێمە ئانەنە کە پەی چارەسەریی دیموکراتیکی و ئاشتیانەی هەنگام بنریۆ".