جمیەرو ژەناو کوردی ئەوروپانە (تەژەکە-ئە) سەبارەت بە ١و ئایاری ڕۆو پەشتیوانی، کۆشیای، یۆبییەی کرێکارا بەیاننامێوەش وەڵا کەردۆ.  

کەژەکە-ئە، ڕۆو کرێکاراو جیهانیش مەبارەک کەرد و واتش: "سیستمو دەوڵەتداریی پیاسالاری، جە سەدەو ٢١ بە زیاتەرکەردەی یاساکاش، پاشێلکاریی هەرمانێ سەرو پێکئامایەکا و ژەنا گەرەکشا سیستمی پاشلکاریی و مافوەری زیاتەر قەوەت بکەرۆ. سیستم هەوڵێ مدۆ بە مافوەری ژەنا جە کایێ سیاسی و کۆمەڵایەتیینە دوورێشا بوزۆوە.  

 بەیاننامەکەنە ئامان، کە ژەنی جە کایێ سیاسی، کۆمەڵایەتی، ڕۆشنویری و جەماوەریینە، جە ڕووەو ورگێرتەی هەقدەسی و جوابدایوە هەرمانێوە یەکسانێ نمەوینیا و ئانەیچ وزیان ڕووە، ژەنی چی بوارۆ بەراوەردەکاو سیستمیشا پووچەڵە کەردێنۆ و بە  قوەو وێشاوە ڕێکوستەی وێشا قەوەت کەردۆ.

درێژەو بەیاننامەکەینە ئاماژە بە کۆشیای ژەناو کوردی و دیای 'ژەنی، ژیوای، ئازادی'ی کریاوە و وچیاوە، "پەرسپکتیڤێو موزۆ ڕووە کە ژیواێوە ئازاد و دیموکراتیک بۆ بە بنەماو کۆشیای ژەنا و سەدەو ٢١ بۆ بە سەدەو سەرکەوتەی ژەنا، ڕۆ بە ڕۆ زیاتەر ئی مانێ مدۆنێ، پەوکای بە وەرفراوانکەردەی هەڵمەتەکێما، بە کۆبییەیوە دەورو ئازادیی ڕابەرایەتیما، جە ١و ئایارینە، ڕۆو کرێکاراو جیهانی بە کۆبییەیوە دەورو شناسنامە، کولتوور و زوانیما، گرد بە سیستمو سەرمایەداری دژو ژەنا ماچا 'نا'. بە دروشمو 'ئازادیی ڕابەرایەتیما ئازادی ئێمەن'، دژو سیاسەتە قڕکارییەکا مدرمێوە و داوا وەنەو گردو ژەنا مکەرمێ بە ڕەنگ و عەلەمەو  وێشاوە ١و ئایارینە مجیارە مەیدانەکا."