تەڤگەرو ژەنە کوردا ئەورووپای (تەژەکە-ئە) بۆنەو هەردووی کۆمکوژییەکا پاریسیۆ بە مەبەسو ئەنجامدای چالاکی جە ٩ و ١١و کانوونو دووەمینە ئەرەیاونێوەش وەڵاکەردۆ و دەسنیشانش کەرد سەرو ڕێچکەو سارێ و، ڕۆژبینە و ئەڤینەکانە جە کەسێتی ساکینە جانسز-سارێنە درێژە بە ئەرەکۆشای مرەیمێ و جە دژو هرووژمە سیستەماتیکەکا سەرو ژەنا سەرمەشقی مدرمێ.

جە بەردەوامی ئەرەیاوناکەینە ئاماژە کریان پانەی پێسەو ژەنا شۆڕشگێڵێ ئەورووپای ماوەو ١٢ ساڵان داواو سەپناو دادپەروەری مکەرمێ و ئامان: "١٢ساڵێن جە ئەنجامداو کۆمکوژییەکەینە بە دەیان هەزار کەسێ جە مەیانەکانە بە درووشمو 'دادپەروەری کۆرا'، 'تا دادپەروەری جابەجێ نەکریۆ، فەرەنسا بەشێوەن جە تاوانەکا'... داواو دادپەرەوەری مکەرمێ بەڵام بێ جواب مەنێنمێ و پلانمچیەرێ کۆمکوژییەکا دادگای نەکریێنێ."

هەر جە ئەرەیاوناکەینە ئاماژە کریان کە چالاکییەکێ ئێساڵی ٩ و ١١و کانوونو دووەمی بە ڕاپیمای وەرفراوان و بە دروشمو "بکوژ دیارا! فەرەنسا چی بێدەنگا؟" چالاکییەکاشا ئەنجام مرا.

ئەنجامداو چالاکی

جە ئەرەیاوناکەینە ئاماژە بە کات و یاگێ ئەنجامداو چالاکییەکا کریان و ئامان: "جە پاریسەنە سەعات ١١:٠٠نە جە مییانو کلتوری کوردی ئەحمەد کایا کە هەمڕاو ئەڤین گۆیێ، عەبدولرەحمان کزل و میر پەرەوەرش چنە تیرۆرکریا هەتا نوسینگەو ئینفۆرمانسیۆنو کوردو پاریس کە یوەم کۆمکوژی پاریسش چنە ئەنجامدریا ڕاپیمێوە ئەنجام دریۆ. هامکات جە وڵاتا تەرو ئەورووپاینە کە کونسوڵخانەکا فەرەنسایش ئینێ چنە چالاکی جەماوەری ئەنجام مڏانە.

هەرپاسە ئا چالاکیێ جە ٢٣و کانوونو یوەمیۆ دەسما پنەکەردێنێ، جە ١١و کانوونو دووەمی ڕۆو شەممەی سەعات ١٠:٠٠نە بە دەسپنەکەردەو ڕاپیمای وەرفراوان و گەڕەو دووەمو ئێشکگیری دمایش مێ."

جە دما دمایی ئەرەیاوناکەینە جەخت سەرو بەردەوامیدای جە چالاکییەکا کریانۆ تا ئەنجامداو ونەپەرسایۆ جە بکوژا و داوا جە  گرڏو بەش و پێکئاماکا سەر بە تەژەکە-ئەی، تەمامو ژەنا کوردی جە ئەورووپا و گەلو کوردی و هێزە دیموکراسی وازەکا کریان بەشداری چالاکییەکا ٩ و ١١و کانوونو دووەمی بانە.