تەژەئا ناڕازیبییەیش نیشانە دا وەراوەروو تیرۊرکەرڎەیی فریال خالد سلێمانۍ و واتش: "با خاکوو کورڎسانی ڕووەو هێزە فاشیستەکارە وزمێرە. زیهنیەتوو هاوکاری، کە ڕا پەی بۊ کۊکوشی خاکوو کورڎسانینە کەرۊوە، شەرمەزار کەرمێ".
ژەنە چالاکەو خەڵکوو حەسەکەی فریال سلێمان خالدە شاروو کەرکوکوو پانیشتوو کورڎسانینە تیرۊرە کریا. پێوەس بە ڕوودایەکەی تەڤگەروو ژەنە ئازاڎا (تەژەئا) ئەرەیاوناێوە نویسیاش وەڵا کەرڎۊ.
ئەرەیاونایەکە بە ناموونیشانوو "پەنەوازا بەرەو خاکوو کورڎسانی دەمودەس وزیۊرە ڕووەو ئا زیهنیەتیرە، کە دوژمنایەتی ژەنا کەرۊ".
ئەرەیاونایەکە ئاماژە پانەیە کەرۊ، ئانۍ ژەنی پێسە ڕۊسا و ساکینە و سێڤۍ و ناگیهان و ئەڤین گۊیی و دەنیز پۊیرازێشا تیرۊرۍ کەردۍ جارێوە تەر لە کەرکوکنە ڕووەو وێشا نیشانە دا.
ئەوەخوای کریانۊ کە ئا هێزۍ وەڵتەرۍ وەرنیشت و وەرکەوت و سەرنیشت و ئەورووپانر ژەنی تیرۊر کەرێنێ، بە هەمان شێوە فریالەشا تیرۊرە کەرڎە، ئەرەیاونایەکە هەرمانەو ئاشکراکەرڎەی تاوانەکەی و بەسزایاونای بکوشا وزۊ گەرڎەنوو حکومەتوو هەرێمی و ماچۊ: "پەنەوازا دەمودەس بەرەو خاکوو کورڎسانی ڕووەو زیهنیەتی فاشیستی و نائینسانانە و نەیاراو ژیوای ئازاڎیرە وزیۊرە و کەسێتیی فریال سلێمان خالدێنە تەماموو کۊکوشییە سیاسییەکا شەرمەزار کەرمێ.
ئێمە ئا زیهنیەتە کە بەرەو کورڎسانی پەی کۊکوشییەکا کەرۊوە شەرمەزار کەرمێ. حیچ هێزێوە مەتاوۊ بە کۊکوشی و تیرۊرکەرڎەی کۊشیای ئازاڎیی ژەنا دلێنە بەرۊ. دژ بە دەسەڵاتوو زیهنیەتوو پیاسالاری کۊشیایما بەرڎەواما. جە ڕاو کۊشیای ئازاڎیی ژەنێوە، خاکوو کورڎسانیچ ئازاڎ کەرمێ. دمایی بە تیرۊرکەرڎەی ژەنا مارمۍ".
