ڤارتینیس: كۊکوشیێوە کە موازیۊ په‌رده‌پۊش بكریۊ
داڎگا و ده‌سه‌ڵاتوو توركی، بكوشاو ٩ ئه‌نداماو بنه‌یانێوە، كه ڕۊو ٣ تشرینوو یوەموو ساڵەو ١٩٩٣ مەنتێقەو ڤارتینیسینە كوشیۍ، داڵده مڎۊ و به‌ره‌و ئانەیە هەنگامە منیا، كه ماوه‌و دۊسیەکێشا سه‌ر بشۊ.
٣٠ ساڵۍ ملوو كۊكوشی ڤارتینیسیرە ویەرۊ، كه یۊن جە كۊكوشییه‌كاو كوردسانی و دلیشنە به سۊچنای یانەکەیشا، ٩ ئه‌ندامۍ بنەیانیێوە به نامۍ (ئۊغوت) کوشیۍ. قەرارا داڎگاییكەرڎەی بكوشاو ئه‌نداماو ئا بنەیانەیه، ڕۊژو ٣ تشرینوو یوهموو ئێساڵی دماییش بۍ.
ڕۊو ٣ تشرینوو یوهموو ساڵەو ١٩٩٣، دەگاو ڤارتینیسوو سه‌ر به تێلی، پارێزگاو موشی، ٩ ئه‌ندامۍ بنه‌یانەو ئۊغوت به سۊچنای یانەكه‌یشا گیانشا جه‌ده‌س دا. ١٦یه‌مین ئەرەنیشتەی داڎگای په‌یوه‌ست به "دۊسیه‌و ڤارتینیس"ی، كه دماو ورشانایۊ قەراره‌كه‌و داڎگاو باڵای، جارێوە تەر ده‌سش پەنە کەرڎۊ، ڕۊو ٥ ته‌مووزی جه لقوو یه‌كوو داڎگاو تاوانه قورسه‌كاو كڕككاله‌ینە لوا ڕاوە.
بكوشی بەرشیە، بوڵه‌ند كارائۊغڵو، كه فه‌رمانەو كۊكوشییه‌كه‌یش دێنە، ٣٠ ساڵێن لاو ده‌وڵه‌توو توركی‌وه داڵده مدریۊ. كارائۊغڵو به بەهانۍ ئانەیۊ نه‌گیریان، ئاماده‌و ئەرەنیشته‌كهی نه‌بی. سه‌رباروو قەراروو "به‌ڵگه‌ی سوور"ی، كه جە تشرینوو یوهموو ساڵەو ٢٠٢٢ دریابۍ و جە مانگەو شوباتوو ٢٠٢٣، لاو وه‌زاره‌توو داڎیوە په‌سه‌ند كریابۍ، ئاماده‌و ئەرەنیشتەکەی نه‌بۍ، دۊسیه‌كۍ پەی ڕۊو ٨ ئابی دما وزیا.
ئه‌گه‌ر بكوش، كارائۊغڵو نه‌گیریۊ و نه‌لۊ وه‌رده‌موو داڎگای، تەرسەو ئانەی هەنه"دۊسیۍ ڤارتینیس"ی ڕۊو ٣ تشرینوو یوه‌می ماوه‌كه‌ش سەر بشۊ.
کۊکوشیی ڤارتینیسی
بانگەشەو ئانەیە کریا، کە پله‌دارێوە چا جەنگ و داییۊترینینە کە ٢ تشرینوو یوەموو ١٩٩٣ ده‌وروبه‌روو ڤارتینیسینە ئاما ئاراوه، كوشیان. ئا سەروازۍ دماو جەنگەکەی ئامۍ جەنازەو پله‌داره‌كه‌ی به‌را، وەختۍ دلۍ ڤارتینیسرە ویەرێنۍ، تەقەشا ئاسمانرە كەرد و به واتەی "ئێشەو مەیمۍ دەگێکێتا سۊچنمێ"، ئاگەشا جیا ئاست.
ڕوۍ دماتەر یانۍ ٣ تشرینوو یوەموو ١٩٩٣ ئا سه‌روازۍ لوۍ دەگێکۍ بە بەهانۍ ئانەیۊ کە "هامكاریی ڕێكوستەیشا كەرڎەن"، ئاویروو دەگێکێشا دا. ئیتر دووۍ هاوسه‌رۍ به نامەکاو ناسر و ئەشرەف ئوغوت چەنی ٧ زارۊڵاشا مەرڎۍ.
جا بنەیانەیە تەنیا ئایسه‌ل ئۊغوت، کە چا وەختنە یانەنە نەبۍ، ڕزگارش بی. دماتەر ئۊغوت چ‌ندین سکاڵۍ تاوانکارییش سەروو ئا کۊکوشییە تۊمارۍ کەرڎۍ.
س.ز
