ڤیلدان دۆغانە، هام واتەواچەو دەبەپەو هەرێمو مەرمەڕەی، ئاماژەش بە هروژمەکاو دەسەڵاتداری ئاکەپەی پەی سەرو وەرنیشتی کەرڎ و واتش: "پەنەوازا نەک هەر کورد، بەڵکم مشۆم هێزەکا ئۆپۆزسیۆنو تورکیای جە دژو هجوومەکا مرداوە."
ڤیلدان دۆغانە، هام واتەواچەو دەبەپەو هەرێمو مەڕمەڕەی ئەرەیاوناش؛ دۆڵەتو تورکی هامکات چنی کوشتەی کەسانی مەدەنی، هرووژم مکەرۆ سەرو دامودەزگا مەدەنییەکایچ و ئاماژەش پانەیەدا، کە مشۆم ئا حەقیقەتەیە جەویر نەکریۆ: "پێسە ئێژا عەبدوڵا ئۆجالان وەڵتەرێ واتەبێش،'چەمکو دۆڵەت نەتەوەی دێر بۆ یان زوو وڕۆنە' ئی حەقیقەتە جارێوە تەر بە وڕناو ڕژێمو بەعسو سوریای دیما.
ڤیلدان دۆغانە، جە چەمپنەکەوتێوەنە چنی ئاژانسو فوراتی ئەرەیاوناش؛ بەمەڵامەتو هرووژمەکا ئی دماییە، وڕناو ڕژێمو دیکتاتۆری بەعسی جە ماوەو ١٢ ڕووانە بیی بە وەرپرسیاریەتیێ جدیی. پەی ئانەی چی پرۆسەیە خاس بیاومێنە، مشۆم فرەو یاگاوە مەسەلەکێ هۆرسەنگنایش پەی بکریۆ و واتش: "هرووژمو ٧و ئۆکتۆبەرو حەماسی، هەرپاسە هرووژمەکۍ ئیسرائیلی پەی سەرو حەماسی و حیزبوڵای، ئایێربەس جە لوبنان و کیشیایۆ ڕووسیای و ئێرانی جە سوریانە، هامکات بێدەنگی ئەمریکای گرد پەنەوازیشا بە هۆرسەنگنێوە وردی هەن."
'مەرامو دۆڵەتو تورکی دلێنەبەردەی دەسکۊتوو کوردان'
دۆغانە جە میانو قسەکاشەنە واتش: "تورکیا چی کاتەنە دەسش بە هرووژمەکا دژو دەسکەوتەکا گەلو کوردی کەردەن، بێگومان دۆڵەتو تورکیا بەردەوام بۆنە جە هرووژمەکاش پەی سەرو مەنتیقەکا پەی ئانەی بەدەسئامایەکا گەلو کوردی دلێنەبەرۆ. چی کاتەنە ڕژێم وڕان، دۆڵەتو تورکی فرسەتش ئاردەن. مشۆم ئانەما ویر بۆ کە وەڵتەرێ ئێژا عەبدوڵا ئۆجالان واتەنش چەمکو دۆڵەت نەتەوەی دێر یان زوو وڕۆنە، ئی حەقیقەتەما بە وڕناو ڕژێمو بەعسی سوریانە وینا."
'پەنەوازا گردما پێوەرە دژو هرووژمەکا مردمۍ'
دۆغانە جە دما دمایی قسەکاشەنە ئەرەیاوناش؛ دۆلەتو تورکی بەردەوام بۆنە جە هرووژمەکاش پەی سەرو کوردی و ئاماژەش پانەیەدا کە بە تایبەتی مشۆم هێزەکا ئۆپۆزسیۆنو تورکیای ۋەرنیشتی پارێزنا و چی پرۆسەنە دژو هرووژمەکا مرداوە. دۆغانە ئانەیچش وات: "ڕۆشنا ئا دۆڵەتە گەرەکش نیا کۆبانێ و منبج بە ئازادی بژیوا و سەرو بنەماو دمای ئاردەی بە کوردی ئەرەمەزیانەرە، پۆکەی هرووژمەکێش چڕتەرێ کەردێنێ، پۆکەی نەک هەر کورد، بەڵکوم مشۆم هێزەکا ئۆپۆزسیۆنو تورکیای، چێردەسێ، گەلا گرد دژو هرووژمەکا مرداوە."
