بە مەبەستوو مەبارەککەرڎەی ١وو تشرینوو دووەم/نۊڤەمبری ڕۊو جیهانیی کۊبانۍ جەماوەرێوە فرە ڕووەشا کەرڎە کۊبانۍ. بە بەشداریی سەدان کەسا، کە نوێنەراو ڕێکوزیا و ئەرەمەرزیایەکاو ئیدارەو وێڕاوەبەری و پێکئامایەکا هەرێمەکەیشا چەنەبۍ، وەرڎەموو ئەنجوومەنوو بەیاگەیاونای هەرێموو فوراتی ئاهەنگێوە ساز کریا. ئاهەنگەکەنە دروشموو 'بژیوۊ مدرامانوو کۊبانێ' وچیاوە.

دماو دەیەقێوە بێدەنگی پەی ڕێزگێرتەی جە گەشمەرڎا، بریندارێوە جەنگی بە نامۍ ئیسماعیل محەمەدیوە قسێش کەرڎۍ و واتش، "گەرەکشابۍ پا هجووما کۊبانۍ سەروو نەخشەیۊ سڕاوە و گردوو ئانیشا داواو ئازادیی کەرا دلێنە بەراشا. گەرەکشابۍ گردوو گەلا کەرا بە کۊیلە و بە کۊیلایەتی باراشارە. وەلۍ ئێمە بە هزر و فەلسەفەو ڕابەر ئاپۊی و بە ڕۊحوو نەتەوەی دیموکراتیکی ئا تاریکییەو داعشیما دلێنە بەرد و سەرکەوتیمێ".

یاگەداروو هامسەرۊکایەتیی ئەنجوومەنوو بەیاگەیاونای هەرێموو فوراتی مزگین خەلیل واتش، " ساڵەو ٢٠١٤ینە هجوومێوە دڕندانە کریا سەروو کۊبانۍ. ئا هجوومیچە سەروو دەساو چەتەکاو داعشی و بە هامکاریی دەوڵەتوو تورکی کریا. گەرەکشابۍ ناوەندوو شۊڕشوو وەرنیشتی دلێنە بەرا. وەلۍ بە گیانبازیی ئارینی و ڕەفێقەکاش، ئێمە واوەی ژیواێوە ئازادما خوڵقنا.  ئیتر وێما سەلەمنا کە ئێمەی کورد متاومۍ وەراوەروو ئا تاریکییە سیاوەینە وێگیری کەرمێ".

هامسەرۊکایەتیی شارەوانیی مەنتێقەو سرینی مستەفا موسلمیچ واتش، "بە ڕۊحوو نەتەوەی دیموکراتیکی تارمایی داعشیما دلێنە بەرد.  ڕۊو جیهانیی کۊبانێنە ئێمە دیسان داوا کەرمۍ، کە مشۊم واوەی بە یەکدەسی وەراوەروو هجوومە بەرڎەوامەکاو دەوڵەتوو تورکیوە مردمێوە و هەڵوێس ورگێرمێ".

ئاهەنگەکەنە گۊرانیۍ وچیۍ و ورپڕای کریا.