پەرلەمانتارو بازنەو رحاو دەم پارتی عومەر ئۆجالان وردەکاری و زانیاریەکاش جەبارەو دیدارەکەیش جە ٢٣ۍ ئۆکتۆبەرینە جە ئیمراڵی چنی ڕابەر ئاپۆی و وردەکاری پێشئامایەکا پەی چارەسەری پرسو کوردی جە پەرلەمانەنە ئاشکرا کەرد.

عومەر ئۆجالان باسش چانەیە کەرد کە سوریا بە قۆناغێوە تازەرە ویەرۆ و ناڕەزاییش وەراوەر بە هرووژمە ئەرەگیرییاکا نیشانەدا.

عومەر ئۆجالان زانیاری و وردەکاری دیداریش چنی ڕابەر ئاپۆی پەی یووەمجاری ئاشکرا کەرد. عومەر ئۆجالان ئانەش وستڕووە کە ڕابەر ئاپۆ جە چەمپنەکەوتەکەینە جە سوڵتان سەنجۆ تا مەلەکشا، جە ئیدریس بەدلیسیۆ تا یاڤوز سەلیم، جە عەبدولحەمیدخانۆ تا مسەفا کەمال پەیوەندییەکێ کورد- تورکیش هۆرسەنگنێنێ و واتش، "هامپەیمانیەکۍ کورد-تورکەکاش هۆرسەنگنۍ. ئانەش هۆرسەنگنا کە کورد و تورک چنین پێوەرە یاوێ ئی ئاستە، پەیوەندی و ئا کێشا کە ماوە ماوە ڕووەمڎا ئانێشە بە ئاشکرا هۆرسەنگنێ. پێشنیازش پەی چارەسەری بێ. چنی ئانەیچ واتش، 'ئێمە تاومێنە ئا کێشا بە رێبازو دیالۆگی چارەسەر بکەرمێنە".

عومەر ئۆجالان باسش چانەیە کەرد کە جە چەمپنەکەوتەکەینە ڕابەر ئاپۆ واتەنش، "جە حەقیقەتەنە ئێمە تاوێنمێ ساڵەو ٢٠٠٠ ی کێشەکەما چارەسەر بکەرمۍ. ساڵەو ١٩٩٩یچ من واتم، خزمەت بە چارەسەری پرسو کوردی-تورکی مکەرو. جە ساڵەو ٢٠٠٠یچەنە من واتم، ئیسەیچ ماچو. بەڵام بابەتەکە لێوەتەرەرە برییا. واتشا، 'ئاپۆ پەی ئانەی وێش رزگار بکەرۆ ئانەیە مکەرۆ'. ئێمە هەڵای ئینایمۍ چا خاڵێنە، هەڵای ئا بابەتەی جە پەرلەمانەنە قسێش جەبارۆ مکریۆ ئانەنە. ساڵەو ٢٠٢٤، هەڵای جەنگا، ناچارەسەرییا".

عومەر ئۆجالان ئانەش وستڕووە کە ورەو ڕابەر ئاپۆی فرە خاس بۍ، پەڕ قوە بۍ، بە عالی ئاگاڎارو رۆژەڤی و بابەتە گەرمەکا بۍ و بە ئاشکرا واتش، ئاماڎەن جە پرسو چارەسەرینە دەس وەڵێوستەی گیرۆ ئەستۆو وێش. عومەر ئۆجالان پیی جۆرە بەردەوام بی: "ئێژا ئۆجالان واتش؛ 'بێگومان کاتێنە جە پەیامەکامەنە باس جە هەلومەرجی مکەرو، من باس جە هەلومەرجو کەسیی وێم نمەکەرو. من پەی هەلومەرجی کەسیی وێم نمەواچو؛ من پەی ئاماڎەکەردە و رەخسنای بارودۆخو چارەسەری ماچو. بڕێ رۆنامەوانێ کە وێشا پێسەو ' میدیاو ئۆپۆزسیۆنی' نیشانە مڎا قسەکا چەواشە مکەرا. بڕێچشا باس جە وڵاتا یەرەمی مکەرا، بڕێ باس جە وڵاتا گەرنتیکاری و بڕێ بە پاو وێشا هۆرسەنگنای جیا جیا مکەرا. بێگومان میدیاو دەسەڵاتیش جەلاو وێشۆ هەوڵمڎۆ ئا چەمپنەکەوتەیە تولەڕارە بەرۆ، بەڵام پەرسەکە جددییا. قۆناغێوە تاریخی ئینا وەردەممانە؛ ئێمە متاومێنە جە لایەنی ئەرێنییۆ، جە لایەنی پۊزەتیفۆ ئا قۆناغێ و پرۆسەیە فاڕمێنە پەی قۆناغێوە گۆرەی و ئاشتیێ شکۆمەندانەی. وێش جە وێشەنە کەس گەرەکش نییا جە سەری ئانەیۆ ویر بکەرۆوە".

عومەر ئۆجالان پاسە درێژەش بەقسەکاشدا: "بێگومان سەرو غەززەیچ قسێش کەردۍ، هەرپاسە سەرو وەرکەوتوو دلێراسەیچ و ئیسرائیلی قسێش کەردۍ، سەبارەت بە کوردا پانیشتی، وەرنیشتیوو  سوریایچ هۆرسەنگنایش کەرد، پێشنیارەکێش، پێشنیارێ گونجیێ و ئەنەیاواینۍ بێنی. حکومەتو تورکیای یان دەسەڵاتدارا تورکیای ئایا چی پرسەیە نزیکێ باوە یان نا؟ هەرپاسە دەرفەتش پەی ڕەخسنا یان نا؟ پرسەکە چێگەنە تا ڕادێوە مدران. سەبارەت بە وەرنیشتی قسێش کەردۍ، شۊنیرەلوای پەی دۆخو سوریای مکەرۆ جە ڕاو چن کەناڵێوە میدیایۆ و جە ڕۆژەڤو وێشەنە نییانشەرە."

عومەر ئۆجالان جە درێژەو قسەکاشەنە پی جۆرە واتش: "سەبارەت بە ئەرمەن و سوریانی و ئێزیدیەکا هۆرسەنگنایش کەرد. جە حەقیقەتەنە سەبارەت بە تەمامو وەرکەوتوو دلێڕاسەی هۆرسەنگنایش کەرد. جە ڕوانگەو ئێژا ئۆجالانییۆ گرڎ جیاوازیێوە بە دۆڵەمەنیۆ موینۆ. تەماشەکەردێ ٥٠ ڕوێ سەرو ٢٣ۍ ئۆکتۆبەریرە ویەرد. چوار ساڵێ و نیم سەرو چەمپنەکەوتەی وەڵینیرە ویەرد. چارەسەری بە ڕێبازو سەپنای گۆشەگیری و بە سیاسەتو تەسلیم کەردەی بەدەس نمێ. ئاماژەش پانەیچ کەرد، "زەرەرۍ فرە ڕووەش دان و هەڵای مرۆڤەکێ ژیوای وێشا جەدەس مڎا."

عومەر ئۆجالان هۆشداریشدا چانەیە ئیسە گەلو کوردی باوەڕیش بە چارەسەری دیموکراتیکی نەمەنەن و واتش: "جەلێوۆ گەرەکشانە بڕواشا بۆ، بەڵام لێوەتەرۆ تەماشەو وەرنیشتی مکەرا و وینا بۆمبواران کریا. تیرۆر ئەنجام مڎریۆ و پی جۆرە باوەڕیشا بە چارەسەری نمەمەنۆ. ئێمە پێسەو پارتێوە گەرەکمانە دەورێ دیموکراتیک چی خاکەنە وینمێ. جە ئەرەیاوناکانە قسە و باس هەن. ئێمە جە چوارچێوەو سیاسەتی دیموکراتیکی و جە چوارچێوەو دەستوورینە سیاسەت مکەرمۍ. هەرپاسە جمېیەرو (پەکەکە)یچ ئەرەیاوناش کە بە گرڎ جۆرۍ جابەجێکارۍ قەرارەکا ئێژا ئۆجالانینۍ.بەڵام بڕێ لایەنێ هەوڵو گرژکەردەی دۆخەکەی مڎا."