ماڵپەڕوو میزانی سەر بە دەسەڵاتوو دادوەری ئێرانی وەڵاش کەردۆ، سەرسەعبوو ڕۊو یەرەشەممەی سزاو جە قەنارەدای محەمەد قوبادلوی یۆ جە گیرییایا وێنیشانداکەو ساڵەو ٢٠٢٢ جە زینڎانوو قزڵحیساری کەرەجینە جابەجێکریان.

ئەرەیاۋنانیچش، قوبادلو بە تۆمەتەو ئانەی کە بە ترۊمبێل کارمەندێوە پۆلیسش کوشتەن و پەنج پۆلیسۍ تەرێش زامڎارۍ کەردێنۍ، سزاو جە قەنارەدایش سەرەرە سەپیابۍ و سزاکۍ جە دیوانوو باڵای پەشتڕاس کریێبێوە.

ئەمیر رەئیسیان پارێزنەروو محەمەڎ قوبادلوی ئەرەیاۋناش، جە قەنارەدای موەکیلەکەیش نایاساییا، چونکی چی قۆناغەنە مافوو تەمیز کەردەیشۆ بۍ.

بە قسۍ بنەیانەکەیش و بە پەشت بەستەی بە گوزارشتەو پزیشکی محەمەڎ قوبادلو نەوەشی دەرونیش بیەن و ماوێوەیچ چێروو چارەسەری دەرونینە بیەن، بەڵام دادگا گرڎوو ئا بەڵگاشە پەشتگۆش وستەن و سزاو جە قەنارەدایش سەرەرە سەپنان.

ڕۊو دووەشەممەی ٢٢/١/٢٠٢٤ ی پارێزنەر و بنەیانەو قوبادلوی جە ئەگەروو جابەجێکەردەی سزاکۍ ئاگاڎارکریێبێنۍ و دما بە دماو ئانەیچ چالاکا و رێکوزیاکا داکۆکیکەری جە مافەکا مرۆڤی حۊڵەکێشا چڕکەردێبێنۍ پۍ ڕاگێرتەی جە جابەجێکەردەی ئا سزۍ.

رێکوزیاو چنەویەردەی میان نەتەوەیی بە چن سەعاتێوە وەڵۍ جە قەنارەدای ئا وێنیشاندەرەیە ئەرەیاۋنابێش، " قوبادلو کە نەوەشی دەرونیش بیەن و جە میانوو وێنیشانداکاو ژەنۍ، ژیۋای، ئازاڎینە گیریابۍ، چێروو ئەشکەنجەینە ناچار بە دڎان نیایپۊرەی کریان".

چا ۋێنیشانداینە کە بە سەرهۊردای ژەنۍ، ژیۋای، ئازاڎی ئشناسیا و سەرانسەروو ئێرانی و ۋەرکەوتوو کوردسانیش گێرتۆ، زیاتەر جە ٥٠٠ وێنیشاندەرا جە تەرەفوو هێزەکاو دەوڵەتیوە کوشیۍ و بەهەزاران کەسۍ تەریچ گیریۍ، کە بڕێشا سزای قورسەو زینڎانی و جە قەنارەدایشا سەرەرە سەپیان.

وەڵتەر هەشت وێنیشاندەرۍ تەرۍ جە قەنارە دریێبێنۍ و مەتەرسی جە قەنارەدای بەشێوەتەریچشا ئینا ئارانە.

جە دماو دەسپنەکەردەو ۋێنیشانداکا جە ١٦/٩/ ٢٠٢٢ێوە رێژەو جابەجێکەردەی سزاو جە قەنارەدای جە ئێرانەنە زیاڎشا کەردەن و چا ساڵێنە ٥٨٢ کەسۍ و جە ساڵەو ٢٠٢٣ێچەنە زیاڎ جە ٧٠٠ کەسا چا وڵاتەنە جە قەنارە دریێنۍ.

بە پاو ئامارەکا رێکوزیاو مافەکا مرۆڤی جە ئێرانەنە ماوەو ٢٢ ڕووا سەرەتاو ئێساڵینە لاو کەمیۆ ٤٩ کەسۍ چا وڵاتەنە دریێنۍ قەنارە.