وریشە مورادیە، زینانییەی سیاسیەو کوردی و ئەندامەو جەمەوە ژەنا ئازادی وەرکەوتوو کوردەسانی، کەژار، کە سزاو جەقەنارەدایش سە٤ەرە سەپیان، بۆنۆ و ٨و ئاداری ڕۆو جەهانی ژەنا، نامێوەش پەشتەو حەسارەکا زینانو ئێڤینیۆ تارانەنە وەڵاکەردۆ. وریشە مورادیە جە نامەکەنە سەرەرەڕاو موبارەک کەردەو ئا ڕووەیە جە گرڏو ژەنە ئازادیوازا، پاگیریش سەرو  مڏرامانی و ئەوەکۆشای بەردەوامو ژەنا پەی ئاشتی و دیموکراسی کەردەن.

وریشە مورادیە جە تازەترین نامەکەشەنە ئاماژەش بە سزاو جەقەناردەای پەی وێش و بڕێ جە زینانیا تەری دان  و بە دیاریکریای ئانەیشش یاڏوستیمه کە زەینەب جەلالیانە، ژنە زینانییەو سیاسییەو کوردی کە ١٧ ساڵێن ئینا زینانەنە جە مافە سەرەتاییەکاش بێبەشە کریێنە.

دەقو نامەکەو وریشە مورادیێ پاسەن:

پەی گرڏو ئانیشا گیانو وێشا بەخت کەرد پەی ئانەی کەسێ تەرێ هەناسێوە تازە هورلوشا

پەشتەو حەسارەکا زینانیۆ، کە مشۆم ڕۆشنای مەشک و دڵو مرۆڤینە گێڵۆ، موبارەک بایی ٨و ئاداری جە ژەنە ئەوەکۆشاکا و سەرمەشقەکا مکەرو، حەر یاگێ ئی گەردووینەینە بانە. ئێساڵ دلێ گەرمەو چالاکیی ژەنێنە پێشوازی جە ٨و ئاداری مکەرمێنە، تەماشەو حەر یاگێوە بکەرو، بووەو شیرینی دەستکەوتەکا ژەنا مکەرو، دڵوەشەنا کە جە سەدەو ٢١ینە زنجیرەو خەباتو ژەنا ڕۆ بە ڕۆ بەردەوامتەر بۆنە.

فرەو جاری باس چانەی کریان کە سەدەو ٢١سەدەو ئازادیی ژەنان و حەر بە ئازادیی ژەنێن کە ئازادیی گلێرگەی بەدی مێنە.

جەنگو جەهانی یەرەمی ئینا ئارانە و ئینەیچ فاڕییا و سەرجەنۆی متەیرەی وەرکەوتوو دلێڕاسەیش ونە گنۆوە، جەنگێ کە زلهێزەکێ جە خزمەتو سیستمێوە دژو ژەنی و رەگەز پەرەستینە ئەنجامش مدانە، نەک حەر داواکا گلێرگەی و بەتایبەت ژەنا جابەجێ نمەکەرۆ، بەڵکوم ژیوای ئایشا وسۆنە تەرسێوە.

ساڵەو ٢٠٢٤ گەلا و حکوومەتەکێ زیاتەر تووشو ناکۆکی چنی یۆیی بیێ، حەرچنە سیاسەتو ڕەگەز پەرەسی زیاتەر تەشەنە کەرۆ، بەڵام مڏارامانیش زیاتەر و زیاتەر چڕ بییەینۆ! جە کاتێنە کە دۆڵەت نەتەوەکێ ئایێرو جەنگی بەرز مکەراوە، گلێرگە پەی ئەرەمەزنارەو ئاشتی و دیموکراسی خەبات کەرێ.

 

ناسیۆنالیزم و دینگەرایی بییێ سەرەتایترین سیاسەتو ڕژێمەکا، بەڵام جە وەراوەرەنە گلێرگە پاگیری سەرو یەکسانیی جیاوازییە نەتەوەیی – ئایینەکا کەرێ و وەشبەختانە ژەنێ سەرمەشقایەتی ئی  پرۆسە ڕزگاریوازەیە بێنێ.

بێگومان حکوومەتو ئێرانیچ چینەیە بێبەری نییا و ساڵەو ٢٠٢٤نە جەنگی هەمەلایەنە چنی گلێرگەی و سەرمەشقەکا کەرێ.

زینانەکێ ئێرانی پەی سەقێوەیش جە هرووژمەکا ڕێژیمی ڕزگارشا نەبییەن. سزاو جەقەنارەدای سەرو من و بڕێ جە زینانیا تەری سەپیا. بڕێ جە ژەنایش جە زیانانەکا تەرینە، دلێشانە زەینەب جەلالیانە، جە کولانە ترین مافو سرووشتی وێش بێبەشە کریا. بەڵام جە وەراوەرو ئی هەڵوێسە نامرۆڤانەنە، ویناما کە زینانەکێ بیێنێ وانینگەو ئەندێشە و ڕامان و کریێ سەنگەرو ئەوەکۆشای و مڏرامانی، من و هەمڕێکێم جارێوە تەر گەرەکما بێ نیشانەش دەیمێ کە گرڏ ڕوێ پەی ئێمە ٨و مارسین.

ئایا کریۆنە ڕووبەڕووو هرووژمی بیۆ و وەرگری جە وێت نەکەرینە؟ ئایا متاومێنە جە وەراوەرو ستەمینە بێدەنگێ بیمێ؟ ئایا تاومێنە ئێش جە چەمو زاڕۆڵەو و ژەنێ و جوانێ و گرووپە چەوسیێوەکێ تەرێ وینمینە و چەما جە خەباتی وسمێرە؟ بە دڵنیاییۆ نا!

تاریخ فێرس کەردێنمی کە هەنگامەکێ خەباتی حیچ کۆسپ و تەگەرێوە و بەردەڵانێ مەشناسۆنە. باوەشەو گەرمو خەباتی پەی حەر کەسێ کە دڵش پەی ئازادی مڏۆوەنە و تامەزرۆو فڕای بۆنە، کریانۆ و ئێمەچ نەوێ ئی تاریخە پەڕ جە وێڕاگیرییە و خەباتەینمێ. تەنانەت جە تاریکترین یاگێنە چەمەگێما دوور وینانە و بڕوا چانێنە ئاسۆمان هەڵای درەوشاوەن.

من جە ڕەچەڵەکو ژەنێوە ئامێنا کە گرڏ دەقێشا پەڕ بییەن جە خەباتی و مڏارامنی، هەمان ئا ژەنێ ئەلفوبێی خەباتیش فێرکەردیمێ جە دژو چەوەسنایۆ.

چێوە دەسو گەرمو وێم درێژ مکەرو پەی گرڏو ئا ژەنا کە چنی هیواو بەرقەرارکەردەی ئاشتی و هیوا پەی بەدیئاردەو ئازادی و سەردەمێوە دوور جە ستەم و چەوسنایۆ کۆشکاری.

من گرڏ کاتی ئینای چنیتا و بڕوام چانێنە خەبات بە هیچ سنوورێوە کات و یاگێوە مەبەسیۆوە و پەی ئانەی ئازادی بەدی بێنە و ئی ڕووە جە کات و یاگێ ئازادەنە بەرز ڕاگیریۆنە، پەی ڕێزگێرتەی جە یاڏو گرڏو ئازادیوازا جە ویەردەنە تا ئیسە، مەبۆ پەی دەقێوەیش پشوو دەیمێنە.

بژیۆنە ٨و ئاداری

بژیوۆنە مڏرامانو ژەنا

ژەنی، ژیوای،  ئازادی

وریشه مورادیە