موزەفەر بزورگ ئومێد، مامسا و وەشنویس و شێوەکاری هەورامانی، بە چەنڎ بەرهەمێ هونەریێ ناوازێ، بەشداریش جە جەژنەوارەو (کالینتۆن)ی جە وڵاتو هندستان کەردەن کە یۆن جە جەژنەوارە نامی و دیارەکان.
بەپاو زانیاریێ کە جە ئێران و وەرهۆرزو هەورامانی بەدەستێ وزیێنێ، مامسا مزەفەر، میانو سەدان جە بەشداربییەکانە تاوانش پلەی دووەم پەی وێش مسۆگەر بکەرۆنە و خەڵاتێوی گرنگی میاندەوڵەتی چەنی وێش پەی هەورامانی باوەرۆنێوە.

موزەفەر بزورگ ئومێد، تەمەن ٢٨ ساڵێ، خەڵکو دەگاو ئەسپەرێز-ی سەر بە شارستانو سەڵواوا-و هەرێمو هەورامان-ین و جە ئیسەنە ئەرەنیشتەو شارو مەریوان-یەن و ساڵانێوی دوور و درێژەن هامتەریب چەنی هەرمانەو مامسای هونەری جە وانگایەکانو مەریوان-یەنە، کار و کوشای هونەری مەکەرۆنە. جە بوارەکەو وێشەنە خاوەن بڕوانامەی بەرزەن و هاموەخت ئەندامەن جە چەنڎین ئەنجومەنێ هونەریێ ئێران-یەنە.

ئی مامسا و هونەروەرە هەورامانییە، تا ئیسە ژمارێوی فرێ خەڵاتێ ئێران و جیهانیش بەدەستوستێنێ کە گرنگتەرینێشان ئینێنێ:

ساڵەکێ ٩٦ و ٩٧ی وەرەتاوی جەژنەوارەو فەجر-ی
جەژنەوارەو ئیاتی جیهانی ساڵەو ٩٧ی وەرەتاوی
جەژنەوارەو یاس یاسین-ی ساڵەو ٩٨ی وەرەتاوی
پلەی یەکەم جە جەژنەوارەو وەقف-و ئێرانی ساڵەکێ ٩٦، ٩٧ و ٩٨ی.
هەرپاسە ١٨ خەڵاتێ و پلێ تەرێش جە جەژنەوارە جیا جیاکێ ئێران-یەنە مسۆگەرێ کەردێنێ.