١٢ تەمووزینو چێرنویسوو کەناڵێوە جەنگیی تایبەتوو دەوڵەتوو تورکینە هەواڵوو مەرڎەی سەروازێوە بە نامۍ ئەرڎەم کاڤالاکی کە هەرێموو ئۊپراسیۊنوو پەنجە قفڵینە بەسەختی بریندار بی، وەڵا کریاوە. دماو وانایۊ ئا هەواڵەیە دلۍ وێمانە واتما ' ئا ئەرڎەمە یان وێش کوشتەنۊ، یان پەرڎەش سەروو چیویوە لادانو کوشتەنشا'. هۊکاروو لەیەکدایۊکەیچما ئانەبۍ کە وەڵتەرۍ هەواڵوو مەرڎەی سەروازەکا پێسە 'بە ڕووەدای چەکی مەرڎێنۍ، بەرزاییوە  کەوتێنێرە وار، چێوی وارڎێنۍ، ئاوینە خنیکیێنێ' وەڵا کریێنێوە.  فرەو وەختی دییەنما یان ژنیەنما کە بە چە سیندرۊمێوە بەرەو مەرڎە پەلکێشۍ کریێنۍ یا کوشیێنۍ. ١٣ تەمووزی ڤیدیۊو قوربانیۍ سوپاو تورکی بە نامۍ ئەرڎەم کاڤالاکی، کە گلەیێش جە فەرماندەکاش کەرڎێبێنۍ وەڵا کریاوە.

لاکەرڎەیۊیۍ تیژ چا سەبەبا بیۍ مایۍ ڕووەدای ڕووەداکەی ئەرڎەمی کاڤالاکی

سوپاو تورکی  ٢٣ نیسانوو ٢٠٢١ دژوو هەرێمەکاو پارێزنای مێدیای دەسش بە ئۊپراسیۊنێوە  وەرفراوانی کەرد. ئا ڕوۍ  ئۊپراسیۊنەکەش دەس پەنە کەرد، ئەرڎۊغان و وەزیرە چەتەکێش ڕۊو دماییئارڎەی ئۊپراسیۊنەکەیشا دیاری کەرد و چا ڕووەوە بە پۊزێوە قسێشا کەرڎۍ. تەسەور و لەیەکدایۊشا ئانەبۍ کە ماوەو دووۍ مانگانە هەرێمەکاو پارێزنای مێدیای بەتەمامی گێرا. سەرواز بەزەڕئامێکۍ و باڵاتەرین فەرماندەکێشا بەشدارییشا  ئۊپراسیۊنەکەنە کەرد. وەزیروو تاوانەکاو جەنگی ئا وەخت کەناڵە تەلەڤزوێنییەکاوە بە هات و هاوارۊ ڕیکلامش پەی ئۊپراسیۊنوو پەنجە قوفڵی کەرد، وەلۍ دۊخوو سەروازاو تورکی زاپ و ئاڤاشیننە پاسنە نەبۍ کە وچیۍ.  

وەڵتەرێچ سەروو خەتەو زاگرۊسیوە ئۊپراسیۊنۍ فرۍ  کریۍ. پەشتیان بە قەرەقۊڵی و بەرەکاو جەنگیشا، کە بە تەکنەلۊژیای و ئامێری وەڵیکەوتەی بەستێبۍ کە ئۊپراسیۊنوو جبەروو سنووریشا کەرد. ٢٣ نیسانوو ٢٠٢١دا دەسشا پەنە کەرڎا، دماتەر پەیشا بی بە سیندرۊم. ئەرڎۊغانوو سەرڎەسەو فاشیستەکا گرد ڕوۍ واچۍ ئاندە کیلۊمەترۍ لوێنمۍ وەڵیوە، وێش پێسە جیهانگیرێوە وەرکەوتوو دلێڕاسەی ئەرەیاونۍ، وەلۍ سەروازاو تورکی وەراوەروو ئا مەیڎاناوە کە گەریلا پێسە قەڵێشا پەنە کەرڎێبینۍ ئندەو  سەرۊکەکەیشا متمانێشا بە وێشا نەبۍ.  

دماتەر زاناما بابەتەکە نیایرەی سەروازەکا نەبۍ، بەڵکوم گێڵنایۊ و فاڕایۊشا بۍ

سەروازاو تورکی کە ساڵەو ٢٠٢١ بە گۊرانی و سروودۍ سەرکەوتەیۊ بەرەو زاگرۊسەکا لوێنۍ، یوەم جار مامڕەشۊنە شۊکۍ بیۍ و تاسیۍ. پەوکای گەریلا کە شارەزا بۍ جە جەنگوو سەرڎەمینە، پیسە وەڵۍ جەنگ نەکەرێنۍ. تونێلەکاو جەنگی کە بە ڕەنجوو چند ساڵەی وەشۍ کریێبێنۍ. بیۍ یاگۍ مدرامانی شکۊمەندانەو گەریلای و سوپاو تورکی تووشوو شۊکی بییە. شەوەوی چانێبۍ  زیاتەر جە ٥٠ جارۍ سەروازۍ وەزنێنێرە. ئێمەیچ واچێنمۍ گێرا کەلوپەل و ئامێر و جبەخانە گێرارە، وەختۍ بەیانی ورێستیمۍ سەروو  کەشوو مامڕەشۊیۊ کۊڵۍ کەلوپەل و ئامێرۍ و چەکی قورس وینمۍ. وەلۍ بەیانی ئا ڕووەیە سەروازەکا وەزنێنێرە، جگە سەروازەکا هیچی تەر نەوینیا.  دماتەر یاوایمێنە بە تەنیا سەروازۍ نارێنۍ فاڕینێچۊ، شەوانە سەروازە کوشایەکاشا کەشوو مامڕەشیۊ فاڕێنێوە پەی قەرەقۊڵی ڕوبارۊکی و سەروازۍ تازۍ ئارێنۍ یاگێشا. ئادۍ بە سکۊرسکی نەک هەر جەنازەکۍ، ئا سەروازایچە فاڕێنیوە کە وەرگەو دوۍ ڕوا جەنگی نەگێرێنۍ. سوپاو تورکی گرد شەوۍ فاڕێشا.  

تەنیا سەربازێوە بێزار جە گرد چێوی، بە بۍ چەک و بەڕووتی مەیڎانەکاو جەنگینە سووڕیۊوە

ڕاسیی مەیڎانەکەی و پڕوپاگەندەو 'مەهمەتچیکە قارەمانەکا' کە تەلەڤزوێنەکاوە کریۍ، یۊی نەگێرێوە. سەروازی بە دروۍ ئانەیە کە "ئاگە دوۍ مانگێنە تەمامیۊ و گێڵدۍ یانەو تاتەیتا"  قایلۍ کریێنۍ. وەلۍ ئا هەرمانۍ ئانا دووۍ ساڵێن هەنە.  زاگرۊسەکۍ یاگێوە عاسییەنە، زمسان و هامنێوە تاقەتپڕووکنش هەن، تەنیا ئانۍ متاوا ئیدارەش چەنە کەرا کە جەئەدابیۍ ئاگەینۍ. ئا سەروازۍ کە  ساڵەو ٢٠٢١ بە گرد کەلوپەلێوە و  مەیڎانەکەنە نریێرە جە مانگەکاو هامنینە  بە بۍ جل و بە بۍ چەک چاگە سووڕیێنێوە. سەروازێوە کە چند ساڵۍ پەروەرڎە کریان سەروو ویشارتەیۊ و بە هۊشیاری مامەڵەکەرڎەی و جموجووڵ، چێش یاونۊش ئا دۊخە؟ تەنیا سەروازێوە کە دەسێش جە وێش شتێنۍ و جە گیانوو وێش بێزارا بە بۍ چەک و بە ڕووتی مەیڎانەکەنە سووڕیۊوە. ئانەی کە بێزارش کەرڎەبۍ تەنیا هەوای گەرموو هامنی نەبێ؛ مدرامانوو گەریلای و سەرنەکەوتەیشا ئاستشانە. هەڵبەت سەربازێوە کە ئەنجاموو هجوومیوە ناسەرکەوتەینە، فەرماندەکەیچش وێش  تووڕە کەرۊ وەنەش گنۊ ئا دۊخە دەروونییە قورسەوە.  

لێوە تەرۊ سوپێوە گیانبازەو گەریلای، کە بە بیرڎۊزی، پەیوەسبییەی بە ئامانجەکاشۊ  گرد ڕوۍ گیانوو وێش دەبەخشۊ. سوپێوە کە شۊننکەوتۍ زیلانێنە کە واتەبێش 'وەشڵەی جگە گیانوو وێم خۊم چێوۍ تەرم بیۍ بەخشێم'. بە دەیان گەشمەرڎێمالە کەشەکاو کوردستانیشا ئشناسۍ، کە وەختۍ هامڕاکەش گەشمەرڎەبۍ پاڵشنە نەمۍ تفەنگەکەیش و یەکسەر کوۍ سەروو دوژمنی و خاستەر گژیێوە. بە دەیان جەنگەوانێما دییۍ، کە جەسەی پارچەپارچەکریاو ڕەفێقەکەیشا زەنگۊڵێش شلۍ نەکەرڎۍ و هەنگامەکێش سستۍ نەکەرڎۍ. سەقامگیریی جەنگی و وەڵیوەلوای گەریلای چێوە سەرچەمە گێرۊ.  چێوە سوپاو تورکی و گەریلا بەراورد مەکریا. فرە سەیر بۍ چا مەیڎانانە کە  چالاکییش چەنە کریۍ و سکۊرسکی  ئۍ تا کوشیایەکاشا بەرۊ نەک هەر جەنازۍ بەڵکوم ٢٠ سەروازۍ چەنی وێش بەرۍ و تازۍ ئارێوە یاگێشا، سکۊرسکییەکۍ گرد شەوۍ ئانیشا فاڕێنێوە، ئا سەروازە تورکۍ کە ئامادەیی دەروونیشا پەی جەنگوو گەریلای نەبۍ دڵ و مەژگشا وەرگەو جەنگوو گەریلای نەگێرۍ.  

ئا هێزەو سوپاو تورکی کە فرە جە گیانوو وێشا بێزارۍ بێنۍ، ئانە بۍ کە کەشوو وەرخەلێنە بێ

سەروازاو تورکی بە هەمان باری دەرونیوە بەشدارییشا جە ئۊپراسیۊنوو ١٧ نیسانوو ٢٠٢٢  زاپ و ئاڤاشیننە پەنە کریا. وەلۍ ئا ڕاسییە  کە  پارەکەی جموجووڵشانە دیما، ئێساڵ بە دەموو وێشا ژنیما. ئاهێزەو سوپای تورکی کە زیادتەر جە گیانوو وێشا بیزارۍ بێنۍ ئانیشاو کەشوو وەرخەلۍ بێنۍ. گەریلێکۍ گۊششا دەنگیشاوە بییەبۍ، پێسە قسۍ بەینوو سەروازۍ و فەرماندێوەشا گێڵناوە: "فەرماندەکە بە سەروازەکەیش واتەبۍ 'دەی نۊرەو تۊن، دەی شێرەکەم لوە دلێوە و دماتەر ئاسانا، سەروازەکەیچ واتەبۍ 'گیانم نەبییەن ملم من مەلوو با ئاد بلۊ' یانۍ ڕەفێقەکەش بلۊ.

پێسە گژیێبێنۍ وێگێراو  وەرخەلۍ  واچێنۍ دایم پیسە دلۍ وێشانە  گردڕوۍ گژیێنۍ، ئجۊم سەدەم ڕۊو مدرامانوو وەرخەلۍ بۍ فەرماندێوە سوپاو تورکی داوێوە وزۊ وەرڎەموو گەریلاکا. نەک پەی وێتەسلیمکەرڎەی نا، واتەبێش، "یاوایمێنە وێتا مەدەیدۍ دەسۊ، هیچ نا. ئی سەنگەرەیە  چۊڵ کەرڎۍ و لوودۍ نە ئێمە دەنگ و نە شمە دەنگ. ". چا قۊناغەنە چێوۍ چانۍ ملوو سەروازاو سوپاو تورکیرە ئامێبێنۍ، بۍ ئانەیە هاگاشا وێشا بۊ، واچێنۍ بە گەریلای ئا هەرمانا کەرا تا ئاسانتەر نەجاتشا بۊ. ئانۍ کە ویرۍ وارڎەو دەسوو ئەدیشا کریابۍ بێزارۍ وارڎەو وتووا بێنۍ، ئانۍ کە سەرەشا نەشتەبۍ، ئانۍ ویرۍ دەزگیرانەکاشا کەرێنۍ، ئانۍ حەرەسیاتنە ووسێنۍ و قافنە گیریێنۍ، ئانۍ بە جلۍ چێریوە سەنگەرنە بێنۍ، بێگومان مەتاو ملوو گیانبازتەرین سوپاو گەریلاو ئاپۊییرە سەرۍ گنا!

هەر سەربازێو چەنی گەریلای جەنگ کەرۊ، بەدڵنیاییوە مشۊم بلۊ سەنتەروو خاسسازیی دەروونیوە

ئینسان تاوۊ باسوو فرەو چێوا دلۍ سەنگەری کەرۊ. گەرەکما واچوو کە جە هەرێمەکاو پارێزنای مێدیاینە دۊخوو سەروازاشا هیچ خاس نییا. پا دەرڎاوە بەرگنا کە ئارۊ سەلەمیێنۍ. ئەرڎەم کاڤالاک کە جە ئەنجاموو 'ڕووەداێوەن مەرد' یاکوشیا، واتش 'چێگەنە  هەر چیوێم سەر بۍ، فەرماندەکە وەرپەرسا. ئانەیچ ئەنجاموو مدرامانی گەورەو زاپی و ئاڤاشینین. نەک هەر ئەرڎەم کاڤالاک، چارەنویسوو فرەو سەروازا کە واتشا بە نۊعی جیا جیا مەرڎێنۍ، جە ڕاسینە دیار نییا،  مەرڎێنۍ یا کوشیێنۍ. فرەو سەروازاشا چێروو باری دەروونیی ئا جەنگینە بەر نامۍ و وێشا کوشتۊ. یان وەروو ئانیشا کە پی دەرڎێشا بەردیو وستێشا ئا مەوقیفۊ تووشوو شڵەژیای و سیندرۊمی بیۍ، هەوڵۍ وێکۊشتەیشا دۍ، جارۍ تەر نامیوە دلۍ گلێرگەی. هەر سەربازێو چەنی گەریلای جەنگ کەرۊ هەرێمەکاو پارێزناینە، بەدڵنیاییوە بۍ ئیلاو ئەولا مشۊم بلۊ سەنتەروو خاسسازیی دەروونیوە. بە نموونەو  دۊخی پێسەو 'ڕووەدایەکاو' حاڵەتەکەو ئەرڎەم کاڤالاکی کە مەیا ئاراوە، ئەگەریچش هەن ئیسەنە فرەتەرۍ ڕووە بدا.

س.ز