ژان نوێل بارۆ، وەزیرو جبەرو فەرەنسای ئەرەیاۋناش، کە مېیانجی جە بەینو هېزەکاو سووریای دیموکراتی (قەسەدە)ی و تورکیاینە مکەرۊ و پەشتیوانی فەرەنسایش پەی کورڎی واوەی کەرڎۆ.
ژان نوێل بارۆ، وەزیرو جبەرو فەرەنسای جوابو نامێوە سیناتۆر پاسکال ساڤۆدێلیش داوە، کە چنەشەنە ئاما بۍ: فەرەنسا نمەبۆ دەسبەردارو ئیدارەو ۋېڕاوەبەری سەرنیشت و ۋەرکۊتوو سووریای بۆ، بارۆ ئاماژەش پانەی دا، فەرەنسا کورداو سووریای پارېزنۆ و بەردەواما جە هەوڵە دیپلۆماسییەکاش پەی سەقامگیری ناوچەکەی.
نامەکەو وەزیر بارۆی پەی سیناتۆر ساڤۆدێلی پی جۊرەنە:
"پەنەوازا دڎان بە مافو گرڎو کوردارە بنریۆ"
فەرەنسا گرنگیێوە تایبەت بە ئاژەو کوردی جە سووریا-هامپەیمانە تاریخیەکەما جە جەنگو دژ بە تیرۆرینە مڎۆ، فشاری تن و ۋناوی بەشار ئەسەدی جە دژو گەلەکەیش کە جە ساڵۊو ٢٠١١ـیۆ بەردەواما، بی بە مەڵامەتو ئانەی کە مەترسییەکا تیرۆرو داعشی ڕووە جە زیاڎ بیەی بکەرا، جە ۋەرا ۋەرو ئی هەڕەشێنە پېسە فەڕەنسای جە چوارچێوەو هامپەیمانی مېیاندۊڵەتینە شانبەشانو هێزەکا سووریای دیموکراتیکی سەرەمڕە جەنگما کەرڎەن، وڕای ڕژێمو ئەسەدی جە سووریا جە ٨ـو کانوونو یووەمو ٢٠٢٤، هومېڎێوە گۊرەش وەشکەرڎ، جە سووریای تازەنە کورد مشۊم بەتەمامی و پېسە هاموڵاتیێوە یەکسانی بەشداری جە بنیاڎنیایۆ گلېرگەو سووریاینە بکەرۆ، داراو شووناسو ۋێش بۆ و بەتایبەتی مافە کەلتوورییەکێش بشناسیا.
پرۆسەو فاڕایۊ جە سووریانە مشۊم گشتگیر بۆ
فەرەنسا سوورا جە یاوای بە قۆناغێوە فاڕایۆ سیاسی ئاشتییانەی و گشتگیری. ئینە جە لایەنو سەرۆککۆماریماوە جە گلېرۊبیەکەیشەنە چنی ئەحمەد شەرعی سەرۆکو کاتی سووریای جە ٧و ئایارینە جە پاریس تەئکیدکریاوە. ئی پرۆسەو فاڕایۆ سیاسییەیچە مشۊم گرڎو پێکئامایەکا گلېرگەو سووریای کۊبکەرۆوە.
بەردەوام پەیوەندیم چنی مەزڵووم عەبدی هەن
ئا پەیماننامە گرنگەی کە جە ١٠و ئادارینە جە ما بەینو دەسەڵاتو سووریای و هێزەکاو سووریای دیموکراتینە ئیمزا کریا، هەنگامېوە ئەرێنییەنە، چا ڕوانگۆ بە ۋېیەرنای کاتی مشۊم یۊگێرتەیۆ سووریای و یۊگێرتەی کوردەکا بەدی بۍ. ئێمە پېسە فەرەنسای بە میانجی و پەشتیوانی گفتوگۆ بەشداریما چی پڕۊسەنە کەردەن و بەردەوامێنمۍ جە پەشتیوانیکەردەی گفتوگۊیەکا پەی ئانەی ئی پەیماننامە بە تەمامی جابەجێ بکریۆ. چا چوارچێوەنە، جە ٢٤و نیسانینە چنی مەزڵووم عەبدی، فەرماندەو گرڎیی هێزەکاو سووریای دیموکراتی جە هەولێرنە گلېربیانیۆ و بەردەوام ئینایمۍ پەیوەندینە، جە میانو دیدارەکەینە باسما جە ڕا و ڕێبازەکا کەرڎ پەی دەسەبەرکەردەی ئاسایشو ئەرەنیشتا کوردی جە سەرنیشتوو ۋەرکۊتوو سووریای.
مېیانجیما جە ما بەینو تورک و کوردانە کەرڎەن
هەرپاسە هەوڵمڎەیمۍ کە یۆوستەی کوردا سووریای چنی ناوچەکا دەوروبەری مسۆگەر بکەرمۍ، مېیانجیما جە ما بەینو کوردا سەرنیشتی و ۋەرکۊتوو سووریای و دەسەڵاتدارا تورکیاینە کەردەن. جە گفتوگۆ سەرەمڕەکامانە داوا جە دەسەڵاتدارا تورکیای مکەرمۍ هانو کەمکەردەیۆ گرژییەکا بڎا، دمایی بە ئاژەو جەنگی بارا، داوایچ جە گرڎو لایەنەکا مکەرمۍ کە شێوازێوە گونجیا بێزاوە. هەرپاسە هەرمانەما کەردێنە پەی ئاسانکاری گفتوگۆکا بەینو کوردا سووریای و کوردا عێراقی."
