باخچەو پیشەسازی وانی جە ساڵەو ١٩٨٨یوە وەشکریان. ئاکەپەییەکۍ دەسشا سەرو ئا مەحاڵېرە گرتەن کە چا وەختۊن پېسە باخچەی بەکارمۍ.

دماو ئانەی بورهان کایاتورک پېسە پەرلەمانتارو ئاکەپەی وانەنە هۊرچنیا، بە ڕاپنەداو شارەوانی توشبای ئاکەپەیی، کۊمپانیاو بیناسازی بایرام کایاتورکی کە برازاو بورهان کایاتورکین دەسش بە هەرمانەکاش کەرڎ. ئاکەپەییەکۍ نیازشانە جە ٣٨٥ کەسا کە زەمینەکېشا کۊتېنۍ چواردەورو باخچەکەی زەمین هورگېرا و جە حەر کامێوەشا ٣ پۍ ٧ مەترا زەمین بسانا. حەرپاسە کۆمپانیاکە وەعدش بە دوکاندارا دان کە دوکانشا پۍ وەشکەرۊ.

بەمەڵامەتو ئانەی دوکاندارەکۍ سەردای داڎگایشا کەرڎەن. پەنجەمین داڎگاو ئاسڵیەی وانی قەرارش دا کە هەرمانەکا بیناسازی مەحاڵەکېنە مرڎنۊ. بەڵام سەرەڕاو قەرارو داڎگایچ بریکارو سەرۊکو شارەوانی توشبای ئاکەپەیی بە وەرپەرسا کۆمپانیاکەیش ۋاتەن، 'شمە سەرو هەرمانەکېتا وەردەوامۍ بیدۍ، قەرارو داڎگای گرنگ نییا' و پی جۊرە هەرمانەکۍ بیناسازی چا مەحاڵېنە وەردەوامېنۍ. سەرەڕاو ئانەی وەرپەرسۍ شارەوانی و لایەنە پەیوەنڎیدارەکا تەری ئامۍ پۍ مەحاڵەکۍ و چېرو نامۍ رێککەوتەینە چنی دوکاندارەکا کۊبیېوە، بەڵام دوکاندارەکۍ نەلۍ چېرو باری و داواکاریەکېشا رەڎکەرڎېوە.

ئا ئاکەپەیۍ دەسشا سەرو زەمینی و باخچەو دوکاندارەکارە گرتەن، پۍ ئانەی دلۍ باخچەکەینە دەس بە وەشکەرڎەو دوکانی نایاسایی کەرا دەسشا پنەکەرڎ و بەمەبەسو هورگېرتەو پەشتگیری سەردای بورهان کایاتورکی پەرلەمانتارو ئاکەپەیشا کەرڎ و ئاڎیچ داواش ۋنەکەرڎېنۍ بە زوویی هەرمانەکاشا بیاۋنا ئەنجامو تەمامش کەرا.

پا مەڵامەتۊ جارێوەتەر دوکاندارەکۍ سەردای داڎگایشا کەرڎۊ و داواشا کەرڎ هەرمانکەرڎەی چا باخچەنە مرڎۊ. دوکاندارەکۍ چەمەڕاو قەراری تازەو داڎگاینۍ چا بارۊ.

هـ . ش