زیاڎ جە مانگێوە سەرو بانگەوازییەکەو ٢٧و شوباتو ڕابەر ئاپۆیرە ۋېیەردەن، دما بە دماو بانگەوازییەکەی جە ١و ئایارینە پەکەکە ڕاستەوخۆ ئاېێربەسش ئەرەیاۋنا و بە ئیساتێچۆ ئینا قۆناغو ئاېێربەسینە، بەڵام ئانەی سەیرا ٢٧و شوباتیۆن دۊڵەت حیچ هەنگامېوە پراکتیکیەش نەنیێنە پەی پراکتیزەکەردەی بانگەوازییەکەی. ئانەی هەن سەرو ئاستو زارەکیی مەنەنۆ. ئی بێهەڵوێسی و حیچ نەکەردەو دۊڵەتی دلۍ گەلینە ناڕەزایش چنەکۊتۆ، چی بارۆ ئەرەنیشتۍ شارو ئامەدو کوردەسانی پەی ئاژانسو هەواڵوو فوراتی (ANF)ی قسێشا کەردۍ.

'مشۊم بە مافو هیوایۆ، ئازادی بەڎەنی ئېژا ئۆجالانی پێکبۍ'

مەجید ئورگای: گرڎ کاتێ ڕابەرو گەلو کوردی عەبدوڵا ئۆجالان ڕۊشن و سەریح بیەن. گرڎ کاتێ بە دڵسۆزیۆ نزیکو ئاشتی بیەنۆ. گرڎ جارۍ واتەنش، ئاماڎەو ئاشتی و چارەسەریییا. بەڵام دۊڵەت حیچ وەختۍ دڵسۆز نەبیەن. گەلو کوردی بە بێ حیچ مەرجێوە ئینا چنی پەیامو ئېژا ئۆجالانی. حەرپۊکەی هەمیشە ئېژا ئۆجالان جە دڵۆ لایەنگرو چارەسەری بیەن. داخەم نمەشۆ دۊڵەت گرڎ کاتێ شۊنکۊتەو مەرامی ڕوانەی بیەن، نەک چارەسەری دوورمەودا و هەمیشەیی. پۊکەی چی پڕۊسەنە لاو ۋێشۆ حیچ هەنگامېوەش نەنیێنە. وەڵۍ گرڎ چێوێنە مشۊم مافو هیوای جابەجێ بکەرۆ و ئازادی بەڎەنی ئېژا ئۆجالانی پێكبارۊ.

'مشۊم دۆڵەت دڵسۆز بۆ'

فەیسەڵ ئاتلی: چەوەتی هەنمۍ ئینایمۍ دلۍ قەیرانی و جەنگینە. پرۆسەو چارەسەریی پەی گرڎ لێوە ئەرێنییا. ئیتر جەنگما گەرەک نیا. جە لېوە باس جە پرۆسەو چارەسەری مکریۆ، جە لېوەتەرۆ جەنگ ئینا ئارانە. ئینە یاگۍ قبوڵ کەردەی نییا. مشۊم دۊڵەت جە ئاستو پرۆسەکەینە دڵسۆزبۆ و جە دڵۆ هەرمانە بکەرۆ. سەرمەشقۍ کوردا هەن، ئاڎیچ ئېژا ئۆجالانا. ئېژا ئۆجالان هەنگامەش نیا، کەچی دۊڵەت هەڵای بێدەنگا. ئیترجەنگما گەرەک نیا.

'هەنگامنیای ڕۆشنە و کاریگەرەما گەرەکەنە'

محەمەد ساڵیح کزل: قسەکەردەی نا، ئیتر هەنگامنیای ڕۆشنەو کاریگەرەما گەرەکەنە. جە لېوو باس جە ئاشتی مکەرا و جە لېوەتەرۆ فڕۊکەی جەنگی نمەمردۆ. ئیتر چنی باس جە ئاشتی بکەرمۍ؟ دۊڵەت حیچ هەنگامېوەش پەی ئاشتی نەنیێنە. مشۊم دۊڵەت هەنگامە بنیۆ. ڕابەر ئاپۆ ۋەرپرسیاری ۋێش جابەجۍ کەرڎ ئانەی مەنەنۆ ئینا ملو دۆڵەتینە.

'باوەڕیما بە دۊڵەتی نەمەنەن'

حاجی تانرڤەردی: زەحمەتا جە دووۍ یەرۍ مانگێنە ئی پرسە وچیۆوە. ئا کینە و نەفرەتییەیی ماوەو زیاڎ جە چل ساڵان بەردەواما، کاریگەریش سەرو گرڎیما نیانەرە. ئیتر جەنگما گەرەک نیا. بە کوشتە و بڕیەی حیچ چێوۍ بەدەس نمۍ. جەنگ تەنیا دماما وزۆ. پاڵپشتی ئی پرۆسەیە مکەرمۍ، بەڵام گرفتە گۊرەکە ئانەن؛ چنی باوەڕ بە دۊڵەتی بکەرمۍ؟ باوەڕیما بە دۊڵەتی نەمەنەن.