یەرۆمین نیشتەیرەو دەسەو ڕاوەبەرانوو یانەو فەرهەنگ و ئەدەبوو بێسارانی هەورامانی بە بەشداری گردینوو ئەنداما  ئارۆ دوەشەممەی ڕاکەوتوو 6و ئارگاو 1400 کۆچی ڕۆجیاری لوا ڕاوە.

چی کۆمەنە وەرپرسوو یانەی خێر ئامای ئازیزانوو بەڕاوەبەروو یانەیش کەرد و چەنی لوا ڕانەو هەرمانەکاو دماڕۆی یانەی بەحسانێوی وەرچەمێش وستێ وەرو سەرنجێ و پەی بەش بەش کەردەو هەرمانەکاو یانەی؛  کۆمیتەو شعرێ و  کۆمیتەو داستانێ  بە هامفکری شووراو دەسەو ڕاوەبەری جیا کریاوەو وەرپرسیشا سپاریا سەرو شانەو کاک ئازاد مورادی  و کاک ئێرشاد ئەزەغی.
هەر پاسە دماو دەس وەشی جە بەشداری خاتوو سەمیرا ئەدوای چی ماوەو هۆرچنیاو تازەو یانەی  فاڕ و جمێوی حەقۆقی بە وازیاری  دەبیرەو ئەنجۆمەنی، بە بۆنەو سەرقاڵی تەحسیلی ئاکادمیکی موسیقاییوە بە قبووڵ کەردەو ئیستیعفا موولەت دارەکێ ئی خاتوونێوە جە لایەنوو جەماوەرو دەسەو ڕاوەبەرو یانەی هۆرسەنجیاو و چەنەش قبووڵەما کەردە.
 ئەرکوو هەرەقەتینوو دەبیری ئەنجومەنی بە بەشداری" پەروین ئیبراهیمی" سپاریا سەرو شانەو  ئەندامەو ششۆموو ئینتیخاباتی و بیە یاگەگیرەو خاتوون ئەدوای. 

درێژەو ئەرەنیشتەیرەکەینە بە نۆبەت  بەحسانێ کریەی و هەر کام بە پەیلواکانشان پڕۆگرامێ ئی وەرزو زمسانی کەوتێ وەرو لەیەک دایوەو بە نۆبەت: 

هەرمانەو ئەنجومەنی بەردەی ڕاوەو کارگایێ زانیارانێ و دەوام دارێ  ڕازوان و ڕانویسی یۆگیرەو گردینوو هەورامانی بە بەشداری گردو خەمەوەرانوو ئی هۆویەتی، نەک تاقمێوی جیاواز دیاریە کریا. 

لوا ڕانەو کارگاو فێرکاری شێعری و ئارایە ئەدەبیەکا بە بەشداری فرەو ساحیب ئەسەراو ساحیب پلە و زانیارانەو ئی هۆویەتی دوەم داوازو یانەی بی.
 
بەردەی ڕاوە کارگاو داستان نویسی و ڕاز وەنایوە و کۆ کەردەیوە ‌‌ئەدەبیاتی دەمواچی  جە شارو مەریوانی بە  مودیریەتوو کاک ئێرشادیوە ئەرکێ تەرو وێما زاناما. 

بەرز گرتەو حورمەت نیایرە بە شێوەو سەردای و ژناسناو هۆنەردۆسا و شاعێرا و خزمەتکارا یۆتەر جە ئەرکەکاو ئەنجومەنی بی. 

بەحسوو شۆنگرتەی کەڵاسێ فێرکاری ڕانویسوو ئەدەبیاتوو گۆرانی( هەورامی) جە دەگاو کەماڵایوە  کەوت وەرو بەحسی و پاڵپشتی ئی هەرمانێ بی بە ئەرکوو یانەی.

خاڵێوەی سەرنج کیشەو ئی یەرۆمین کۆموو دەسەو ڕاوەبەری ( هامدڵی و یۆگیری ئاوەزمەندانە چەنی گردینوو ئەنجومەنە خزمەتکارەکاو هەورامانی " جە ڕاساو خزمەتی هەرەقەتین پەی ئی هۆویەتی و ئی هەورامانی" داواکاری گردو حازرینوو تاقمەو ڕاەبەرو ئـەنجومەنی بی.)