گەریلۍ یەژا ستاری بێریتان دێرسیمە سەرنجش وست سەروو دڵسۆزی و هامڕایی حەقی قەراری پەی ڕابەروو گەلو کوردی و ئاماژەش پانەی دا حەقەو هامڕا حەقی قەراری جە سیستەمی کریانۆ.

گەریلۍ یەژا ستاری بێریتان دێرسیمە جە ٤٨ەمین ساڵوەگەڕوو گەشمەرڎەبیەو حەقی قەرارینە بە ڕێز و پنەزانایۆ یاڎش کەردۆ و ئاماژەش پانەی دا گەشمەرڎە هێزوو کۊشیای و مەعەنەویەتیا. جە قسەکاشەنە دەرسیمە واتش: " سەرەڕاو ئانەی هامڕا حەقی جە نەتەوەو تورکی بۍ، هامڕێوە دڵسۆز و بەوەفابۍ پەی ڕابەرایەتی. پېسە هەڤاڵێوە ئەنتەرناسیۆناڵی پەی گەلوو کوردی و گەلا ۋەرکەوتوو دلېڕاسەی کۊشیایش کەرد و کاریگەریش سەروو ئینسانەکا وەش کەرد. دڵسۆزیێوە فرە تایبەت و جیاوازش بۍ، قوڵیەتی هامڕایش چنی ڕابەرایەتی بەروزوو ئی دڵسۆزییە بۍ. پۊکاتی جوابی هەرە گەورەو ڕابەریما جە ۋەرا ۋەروو گەشمەرڎەبیەو هەڤاڵ حەقینە، ئەرەمەرزناو پەکەکەی بۍ. پی جۆرە حەقەو گیانوو هامڕا حەقی جە سیستەمی و فاشیستی بکوشی کریاوە.

'هومێڎێوە گەورەو ئازاڎیی ئاما ئاراوە'

دێرسیمە ئانەش دەسنیشانکەرد بە ئەرەمەرزناو پەکەکەی دلۍ گەلا چێردەسینە هومێڎێوە گەورەو ئازاڎیی ئاما ئاراوە. ژەنی پۆل پۆل بەرەو کەشەکا کۊتۍ ڕا، بەشدارۍ دلۍ ڕیزەکاو کۊشیای ئازاڎیی بیۍ. ئەرەمەرزناو پەکەکەی هۊرگیروو تایبەتمەندیێوە ئەنتەرناسیۆنالیستیا. هەر جە دروسبیەیشۆ جەمۍ ئەرەمەرزنەرۍ سەرەتاو یۆبیەی ئەرەکۊشای گەنجاو کورد و تورکی، ساحیب و ئامانجوو کۊشیای ئازاڎیی گرڎوو گەلا بێنۍ. هەر جە سەرەتاوە تا ئیساتۍ چنڎین گەنجۍ ئەنتەرناسیۆناڵی پەی ژیۋایۍ ئازاڎی و یەکسانی کۊشیێنۍ و پەی ئانەیچ گەشمەرڎۍ بیێنۍ. سیستمی دەسەڵاتداری گەلا جە یۊترینی مکەرۆ، هیچ پېوەرەژیۋایۍ فرە ڕەنگی قبوڵ مەکەرۆ، وەڵینگەو چێردەسا دلێنەبەرۆ. جە ۋەرا ۋەروو ئی سیستمە فاشیستەینە، ئایدۆلۆژییاو ڕابەرایەتیما بیەن بە هیوا و ڕۆحیەتێوە گەورەو گەلاو جەهانی."

ئەنەیاوای جە هامڕایی دلۍ پەکەکەینە

دێرسیمە جە درێژەو قسەکاشەنە ئاماژەش پانەی دا ئاشنابیەیی بە حەقی قەراری ئاشنابیەین بە پەکەکەی. ئەنەیاوای جە هامڕایی ئاڎیی بە ڕابەرایەتی، ئەنەیاواین جە هامڕایی پەکەکەی و واتش: "دوژمن بە گەشمەرڎە کەردەی هەڤاڵ حەقی گەرەکشابۍ ڕا جە کۊشیای ئازاڎیی بگێرا. جە ۋەران ۋەرەنە ڕابەر ئاپۆ بە ئازایێوە تاریخیۆ تەڤگەری ئازاڎیش ئەرەمەرزنا. دلۍ کۊشیای ٥١ساڵەو ئەرەکۊشای تەڤگەریمانە گرڎ بە بێ جیاوازی ئاین، زۋان و نەژادی دژوو سیستمی سەرمایەداری ئەرەکۊشیێنۍ، پەکەکە بی بە هیواو ڕۊشنایی گەلا. یاڎکەردەیۆ گەشمەرڎا و بەتایبەت گەشمەرڎە حەقی قەرار میراتێوە کۊشیاین کە هەمیشە بە زینڎەیی مەنۆوە. سەرچەمەی هەرە ئێژا دلۍ کۊشیای ئازادیمانە دڵسۆزی و هامڕاین."