ئه‌دهه‌م بارزانی، سه‌ركرده‌ی وەڵینوو په‌ده‌كەی ئاشكراش کەرۊ، هامسەرەکێش بازگێوە په‌ده‌كه‌ینە گیریێنە و مۊبایله‌كه‌یش ده‌سش ملەرە گیریان، هاموەخت داوا جە گرڎوو لایه‌نه‌كا و حوكمه‌توو عێراقی کەرۊ، سنوورێوە پەی تاكڕه‌وییه‌كاو په‌ده‌كەی بنیارە.
ئه‌دهه‌م بارزانی، سه‌ركرده‌ی وەڵینوو په‌ده‌كەی په‌یامێونە كه فه‌یسبوكوو وێشەنە وەڵاش کەرڎەنۊ، ئاماژه‌ش پانەیە کەرڎەن "رۊژی یەرەشەممەی 18_7_ 2023 خێزانم، ئەداو ھیڤی، پەی سەرڎای کوڕی و کناچە و نەوەکاش پەی مەسیفی لوێنە و بە ڕێککەوت و ئەوەڵ بازگەو مەسیفینە دیموو کۊڕێ-وە زیاتەر جە سەعات و نیمێوە مردنێنەشا و گرڎوو پێویسی و کەلوپەلەکاشا بەوردی وشکنێنە، دماو ئانەیۊ سەری ڕەشۊ ئەمرە مۍ ئینخا مازا بلۊوە پەی یانەی. وەلۍ مۊبایلەکاو ئەداو هێڤی و ئانیچ کە چەنیش بیێنۍ، کە کەرۊ 11 دەزگۍ، مۊبایلشا چەنە ورگیریۊ و تا ئیساتێچ لاشاوە مەنێنێوە تا چێوەکاو دلێشا کۊپی کەرا.".
ئه‌دهه‌م بارزانی باسوو ئانەیچش کەرڎەن، "دماو زیاتەر جە ساڵۍ و دووۍ مانگا ئاوارەیی و دەربەدەری، کە بۊنەو ھەڵوێستەکامۊ دژ بە ئەرەگیریی کورڎسانی، نادادپەروەری و نەبییەی ئازادی، بە دەستوروو سەرۊکوو پارتی سەروو خاکوو تاتە و بابایامۊ بەناهەق بەرکریانا".
ئا سه‌ركرده وەڵینەو په‌ده‌كه‌یە، جە به‌شێوە تەروو په‌یامه‌كه‌یشنە داوێوەش جە حوكمه‌توو عێراقی كەرڎێنە، "سنوورێوە پەی ئی تاکڕەوییە جە خاکی مەبارەکوو کورڎسانینە کە خاکوو گەشمەرڎان و دەیان ھەزار شۊڕشگێڵنۍ و کۊشەرۍ پیسە منش چەنەنۍ بنیارە".
ئه‌دهه‌م بارزانی واتیچش: "ئەگەر گرفتێوەتا چەنی من ھەن چەنی من بیدۍ بە تەرەف، نەک چەنی خاتوونێوە، کە تەنیا پەرۊشەو دیەی زارۊڵەکاش بیێنە، کە زیاتەر جە ساڵێوەن جە دیەیشا بێبەشەنە و ئانە بییەن بایسوو ئانەیە کە پا وزۊ ئا زۊنە وەرتەسکەیۊ".
ده‌قوو په‌یامه‌كه‌و ئه‌دهه‌م بارزانی:
بە نامۍ خودای گەورەی و میھرەبانی
بۊ/ ڕای گرڎینەو کورڎسانی
بەڕێزا:
حوکمەت و پەرلەمانوو عێراقی
سەرۊکایەتیی ھەرێمی
حزب و لایەنە سیاسییەا
باڵیۊز و کونسوڵخانەکا و نوێنەروو وەڵاتا و نەتەوەیۊگێرتەکا و رێكوزیایەکاو مافوو ئینسانی عێراق و کورڎساننە
شمەی بەڕێزی هاگاڎار کەرووە دماو زیاتەر جە ساڵۍ و دووۍ مانگا جە ئاوارەیی و دەربەدەری، بۊنەو ھەڵوێستەکامۊ دژ بە ئەرەگیریی کورڎسانی و نادادپەروەری و نەبییەی ئازادی. بە دەستووروو سەرۊکوو پارتی سەروو خاکوو تاتە و بابایامۊ بەناهەق بەرکریانا.
ڕۊو یەرەشەممەی ١٨-٧-٢٠٢٣، خێزانم ئەداو ھیڤی، پەی سەرڎای کوڕ و کناچە و نەوەکاش بەرەو مەسیف لوێنە و بە ڕێککەوت و جە ئەوەڵ بازگەو مەسیفینە جە دیموو کۊڕێ-وە پەی زیاتەر جە سەعاتۍ و نیمۍ گێرتێنەشا و گرڎوو پێویسی و کەلوپەلەکاشا بەوردی وشکنێنە دماو ئامای ئەمرۍ سەری ڕەشۊ جا ئاستەنشا بلۊ. مۊبایلەکاو ئەداو هێڤی و ئانیچ کە چەنیش بیێنۍ، کە کەرۊ 11 دەزگۍ، مۊبایلشا چەنە ورگیریۊ و تا ئیساتێچ لاشاوە مەنێنێوە تا چێوەکاو دلێشا کۊپی کەرا. من داوا جە گرڎوو لایەنەکا و حوکمەتوو عێراقی کەروو، سنوورێوە پەی ئی تاکڕەوییە جە خاکی مەبارەکوو کورڎسانینە کە خاکوو گەشمەرڎان و دەیان ھەزار شۊڕشگێڵنۍ و کۊشەرۍ پیسە منش چەنەنۍ بنیارە.
جە ھەمان وەختنە بە گرڎوو ھاموەڵاتە وەشەسیایا ماچوو ئانۍ، کە ئی ڕفتارەشا چەنی خێزانیم کەرڎەن چە ئی خاتوونۍ بۊ چە خاتوونەو ھەر ھەژارۍ و گەشمەرڎێوە بۊ لاو منۊ پیسەنۍ یۊی، وەختۍ سەیارەنە وەزنێنێشارە و یۊ بەیۊ کەلووپەلە تایبەتەکێشا وشکنێنۍ. ئاخۊم چێش بە خەڵکی تەری کەرا و کەرڎەبۊشا، وینمۍ کە سەراو بەعسی بە خێزانەکاشاوە موعەزز و موکڕەم جە پایتەختمانە سووڕیاوە .
ئینە جە وەختێوەنە کە من ھیچ پەیوەندیێوە سیاسی و حزبیم پۊشاوە نەمەنەن و ئەگەر هەرمانێوە سیاسییە جە مەیدانوو کورڎسانی و عێراقینە کەروو مافی ڕەواو وێما و کەرووش پێسە هەر هاموەڵاتێوە، کە یاساکاو کورڎسانی و دەستووروو عێراقی بە گرڎ لاێشا دان.
ئەگەر گرفتێوەتا چەنی من ھەن چەنی من بیدۍ بە تەرەف، نەک چەنی خاتوونێوە، کە تەنیا پەرۊشەو دیەی زارۊڵەکاش بیێنە، کە زیاتەر جە ساڵێوەن جە دیەیشا بێبەشەنە و ئانە بییەن بایسوو ئانەیە کە پا وزۊ ئا زۊنە وەرتەسکەیۊ، جە ھەمان وەختەنە من سپاسوو ھێزە ئەمنییەکاو زۊنەکەی تەری کەروو، کە بە ڕێز و ئیحترامێوە فرەوە ڕاییشا کەرڎێبێنۍ.
براتانـ ئەدھەم عوسمان شێخ ئەحمەد بارزانی
س.ز
