جە پارتوو (Sînn Feîn)وو ئیرلەنداینە، ئەندامەو پەرلەمانوو ئەورووپای کریس ماکمانۆسە قسێش پەی میدیا خەبەری کەردێ و واتش: "ئێمە موازمێ ئی کێشە درێژخواینێ چارەسەرێوە سیاسییشا پەی وێزیۆوە و گەلوو کوردی وێش بەرۆ ڕاوە. پەی ئینەیچە هەنگامەی یوەمە ورگێرتەی گۆشەگیریی ڕەهاو سەروو ئۆجالانین و ئازاڎییشا. پی شێوە ئاشتیێوە درێژخواین و مسۆگەر پەی گەلوو کوردی و وەکەوتوو دلێڕاسەی مڕەخسیۆ".

ئینجا واتش: " پێسە سەرکردێوە سیاسی مشۆم ئۆجالان چەنی گەلەکەیش بۆ، پەوکای پەنەوازا دەمودەس ئازاڎ کریۆ، ئەوەڵ مشۆم دەمودەس ئۆجالان ئازاڎ کریۆ، تا تەڤگەروو کوردی بەرۆ ڕاوە، تا ئاشتی و دیالۆگی سیاسی پێویس وزۆ وەڵێ تا گەلوو کوردی وێش بەرۆ ڕاوە. ئازاڎیی ئۆجالانی بۆ بە هەنگامێوە ئەوەڵی و حەرە گرنگە پەی ئاشتی".

ئاخرۆ واتش: "گردوو ئانیشا گەرەکشانە کە هەرێمەکەنە ئاشتی و ئارامی بێ دی پێویسا ئۆجالانی ئازاڎ کەرا، گەلوو کوردی گەرەکشا ڕابەرەکەیش بەرۆ و لاو گەلیوە وینۆ، پێسەیچ ئۆجالان هەرمانەی پێویسە پەی ئاشتی کەرۆ. پێسە واتم، وەڵێ گرد چێوێنە گەرەکمانە ئازاڎیی عەبدوڵا ئۆجالانی وینمێ ".

هەرپاسە ئەندامەو پەرلەمانی لیدیا ماسارڎە، ئاماژەش پانەیە کەرد، هەرمانەو پەرلەمانوو ئەورووپاینە مافەکاو ئینسانی پارێزنۆ و واتش: " پەوکای ماچمێ پێویسا عەبدوڵا ئۆجالانیچ ئیسفادە جە مافەکاش کەرۆ. پەنەوازا بتاوۆ پەیوەندیی بە بنەیاکەیشوە کەرۆ و زانیارییشا پەی کیانۆ. پێویسا بنەیانە و هامڕاێش زانیاری بارەشۆ بزانا".

ئاخرۆ واتش: "حیچ سەبەبێوە پەی مەنەیۆ ئۆجالانی زینداننە نییا. پێویسا چارەسەری سیاسییچ پەی جەنگی بوێزمێوە، ئی چارەسەریچە بە ئازاڎیی ئۆجالانی مێ دی. تا ئۆجالان ئازاڎ نەبۆ، چارەسەرێوە درێژخواین وەش مەبۆ".