جە فەسڵەکا پاییزو زمسانینە دەرفەتوو ئەنجامدای چالاکی ۋەرفراوانی جە تەرەفوو گەریلاکاو ئازاڎیی کوردسانیوە زیاتەرۍ با. ئانەیچ جە قۆناغەو دووە مانگی ویەردەینە بە ڕۊشنی وزیان ڕووە. جە مەتینا، زاپ وخواکورکەنە ئۆپراسیۆنی شۆڕشگێڵنی ۋەرفراوان ئەنجامدریۍ و سوپاو تورکی زیاڎ جە ١٠٠ کوشیایاش بێنۍ. بەهەمان پێرفۆرمانس و بە ئەزمون هۊرگێرتەی جە ئۆپراسیۆنەکاو ویەردەینە، هێزەکۍ گەریلای جارێوەتەر جە ١٢و کانوونوو دووەمینە ئۆپراسیۆنوو شۆڕشگێڵنی گەشمەرڎە هەڵمەت دێرەلوکیشا ئەنجامدا. کاریگەری ئا ئۆپراسیۆنەیە نەک هەر جە هەرێمەکەنە، جە سەرانسەروو جەهانی و بە تایبەتی جە تورکیانە فرە ئاشکرا بەرکۊت. ئینەیچ پا مانێنە کە ئۆپراسیۆنێوە سەرکۊتانە بە شێوۍ سەردەمیانە ئەنجامدریان.

نامۍ هەڵمەتی جە ئۆپراسیۆنەکەی نریا

ئا ئۆپراسیۆنە چێروو نامۍ گەشمەرڎەی نەمری هەڵمەت دێرەلوکینە ئەنجامدریا. گەریلا هەڵمەت جە ٢٣ۍ کانوونوو یووەم و ٢٠٢٣ېنە جە مېڎانوو مدرامانوو ئامێدی جە ئۆپراسیۆنۍ شۆڕشگێڵنینەکە گورزێوە گۊرێش جە ئەرەگیرا شانا و گەشمەرڎەبی. گەریلا هەڵمەت رۆڵەو زاپی و دێرەلوکی بۍ. هەر چا هەرێمەنە گەورە بیەبۍ و وەرگەو ئانەیش نەگێرت کە ئەرەگیرا سەروو خاکەکەیشۆ بوینۆ. ۋەرو ئانەی پۍ ئەسایۆ حەقەو هامڕاکاش، بەشداریش جە ئۆپراسیۆنی شۆڕشگێڵنینەکەردەبۍ. ئاڎ خۊتان هەڵوێسێوە ڕۊشن بۍ، قینۍ فرێش جە دوژمنی بۍ. تا ئاخر بڕواش بە سەرکۊتەی بۍ و پەیوەستبۍ پۊشۆ. بەمەڵامەتوو ئا تایبەتمەندیا گەریلا هەڵمەتی و پۍ سانایۆ حەقەو ئاڎیی، ئۆپراسیۆنەکە نامۍ ئاڎیش ۋنە نریا. یانیچ سەرکۊتەی ئا ئۆپراسیۆنەیە مژارۍ بۍ کە پەیوەس بۍ پا نامېوە.

جمیەری ئازاڎیی ئەرەیاۋنابێش

ڕاوەبەرا جمیەروو ئازاڎیی فرەو جاری هەڵوێسوو گەریلاکاشا جە ۋەران ۋەروو ئەرەگیرینە ئەرەیاۋنابۍ. فەرماندەکۍ ناوەنڎوو پارېزنای گەلی واتەبێشا: "یا ئا سەروازە ئەرەگیرۍ چۍ ملا، یاخوڎ مرا". جە ڕاسینە چی ئۆپراسیۆناو دماییەینە ئانە فرە بەڕۊشنی ئاشکرا بی. شەپۆلێوە ۋەرفراوانوو چالاکی گەریلای لواوە گژۍ ئەرەگیرارە و تەفروتوناش کەردۍ. بەتایبەتی ئۆپراسیۆنوو ئی دماییە جە کەشوو ئامێدی پېسە زلـلێوە جە میاچەماو سیستمی فاشیستی دریا و تووشوو خورپەیش کەرڎ.

قەڵاکۍ مدرامانوو ئامێدی

مزانیۆ کە هەرێموو ئامێدی سەر بە زاپی ماوەو یەرۍ ساڵان ئینا مدرامانەنە. یاخوڎ ئا چالاکیۍ ئەنجامدریېنۍ، کتوپڕ نامېنۍ ئاراوە. بیەو گەریلای چا هەرێمەنە حەجگیز کەم نەبیەنۆ و باڵادەسیش قەد نەکۊتەن دەسوو دەوڵەتوو تورکی. چا هەرێمەنە و جە گرڎ کەشێوەنە قەڵاو پۊڵاینەو مدرامانی بیەیش هەن. قەڵای پا جۆرەنۍ کە سوپاو ئەرەگیری جە ۋەران ۋەرشانە کۊتەن تەنگوچەڵەمۆ. ئێمە عال مزانمۍ، تەماشەو ساڵانی ویەردەی کریۆ ئانە وینیۆ کە جموجوڵوو هێزەکاو گەریلای بەردەوام بیەن و باڵادەسیێوە بێکەموکوڕیشا سەروو هەرێمەکەیرە هەن. جە بنەڕەتەنە ئانەی چا هەرێمانە قفڵ بیەن، خودوو سوپاو تورکین.

تاکتیکی تازە ڕاچارەکۍ ئەرەگیراش بێ مەعنا کەردۍ

ئۆپراسیۆنوو گەشمەرڎە هەڵمەت دێرەلوکی بە شێوېوە فرە پلانپۍ مجیایرەی ئەنجامدریا. پلانەو ئۆپراسیۆنەکەی هەم ئەنەیاوای گەریلای، وەڵۍ وستەی تاکتیک جە ئاژێوە دژوارەنە، فرە بە شێوێوە ورد ئەنجامدریا. گرڎوو فاکتەرەکا سەرکۊتەی جەنگی بە رێکوپێکی جابەجێ کریۍ. گەریلا پێرفۆرمانسێوە فرە بەرزی هجومبەریش نیشانەدا. جە بنەڕەتەنە ئا چێوۍ کە چی ساڵاو دماییەینە وینمېشا، بەرهەموو پڕۆژەو سەرجەنۆ وێڕێکوستەیۆ هەپەگەی و یەژاستارین کە چی ئاخرەنە یاوان قولەپۊپە.

چی ئۆپراسیۆنەنە وەڵێوستەی تاکتیکی مژارێوە فرە یەکلایکەرەوەن. بە تایبەتی سەرەڕاو تەکنەلۆژیا، ئەڵخام و تەلبەنڎی بەڵام حیچ کاریگەرییەکۍ سەروو هێزەکاو گەریلای پۍ لوای دلۍ سەنگەرەکا نەنیارە و ئانێشا گرڎ ویەرنۍ. یاخوڎ چێگەنە شارەزایێوە هەن. پی جۆرە ملا دلۍ سەنگەرەکا و هەر جە ساتە وەختی یووەموو دەسپنەکەردەو هجومەکەیۆ نیمەو سەرکۊتەی مسۆگەر کریۆ.

رۆحوو تیمە هەماهەنگەکا

بابەتێوەتەر کە چی چالاکیەنە وزیاڕووە، ژمارەی فرەو تیمەکا گەریلای و هەماهەنگی دلېشانە. هەپەگە و یەژاستار چا ئۆپراسیۆنەنە بە ژمارێوە فرە جە تیمە پسپۆڕەکا ئی چالاکیەیەشا کەرد. چێگەنە مژاروو هەماهەنگی فرە ئیناوەڵێنە. بە شێوێوە هاموەخت هجومکەردەی سەر ئەرەگیرا یۊ جە فاکتەرە گرنگەکاو ئی چالاکیە بۍ. بە تایبەتی شێوەو دایونەی پېسە هەرورەترێشقەی کە دوژمنی تاسنۆ یەکلاکەرەوەن. ئانەیچ بەرش وزۆ کە پرۆژەو هەپەگەی و یەژاستاری، پۍ سەرجەنۊی وێڕێکوستەیۊی یاوان بە ئاستێوە بەرز.

دژواریەکێچ نەبیۍ بە لەمپەڕ

چالاکیۍ دلۍ هەلومەرجی دژوارینە ئەنجامدریۍ. جە تەرەفێوە ئاژەو کەشوهەوای سەردی و سیاوای و جە تەرەفێوەتەریچۆ تەوقەی تنە و ۋەرفراوانەو هێزەکاو پەدەکەی کە بە ئامانجوو ئانەی گرڎوو ڕا لۆجستیکیەکا وزۊرە، ئینا ئارانە. چا ئاژەنە چالاکیێوە چا ئاستەنە مژارێوە ئاسایی نییا. سەرەڕاو ئانیشایچ، هێزەکۍ گەریلای ئانەشا جە ۋێشا نەکەرد بە وەربەس و ئەرکوو پارێزنای خاکوو کوردسانیشا بە پا گیریوە جابەجێ کەرد. بەڵام ئێمە موینمۍ کە دەوڵەتوو تورکی ئەرەگیری و ئەرەیاۋنای جەنگی تایبەتیش ئا شکسەو سوپاکێشا بە ئاژەو کەشوهەوایۆ بەساوە. جە بنەڕەتەنە ئانەی بینیشانە مەنەنۆ و مەتاوا باراش سەروو زۋانیشا ئانەن کە سەروازەکێشا بێ ئیراڎۍ بێنۍ و مەتاوا جەنگ کەرا. ئا دیمەنەی جە هەرێمکەنە یەرۍ ساڵێن نەخشیان ئارۊنە فرە بە ڕۊشنی پۍ رای گرڎیی ئاشکرا بۆ.

جە ئاکامەنە ئا کەشەی کە جە تەرەفوو هێزەکاو گەریلایۆ کریابۍ ئامانج، بە تەمامەتی جە دوژمنی پاککریاوە و سەنگەرەکۍ ئەرەگیرا دلېنەبریۍ. یانی بە گرڎی چا ئۆپراسیۆنەنە کەشەکە کۊت دەسوو گەریلای. چا ئۆپراسیۆنە شۆڕشگێڵنیەنە کە هێزەکۍ گەریلای پېشا یەکلایی بیەنۆ ٦١ ئەرەگیرۍ سزادریێنۍ، هاموەخت دوو ۍگەریلۍ ئازاڎیچ بە گیانبازی جەنگشا کەرد و یاوۍ بە قافڵەو گەشمەرڎا.

شۆکی گۊرە نەک جە ئامێدی، بەڵکم جە ئەنقەرەنە بۍ

کاریگەری ئا چالاکیە سەروو دەوڵەتوو تورکیۊ هەر جە ئەوەڵ ساتۆ بەرکۊت. شۆکە گۊرەکە نەک جە ئامێدی، بەڵکم جە ئەنقەرەنە بۍ. تەماموو ۋەرپەرسا کتوپڕ سڕۍ و دەسەوسانۍ بیۍ. چنی ئەفسانەو تەکنەلۆجیاو ئاسمانیشا هۊرشێوناوە، چنی هێزە تایبەتەکێشا نەتاواشا ۋەران ۋەر بە هێزەکاو گەریلای جەنگ کەرا. جە ڕۊی یووەمەنە گرڎوو پلانەکا دەوڵەتی جە بارشیۍ و گلېرۊبیۍ ئەمنیۍ نائاساییۍ ئەنجامدریۍ. میا چەما گرژ و مۆنەکاشا جە گلېرۊبیەکەینە بەرش وزۍ کە ئا شەوۍ ویەرنێنەشا شەوە نەبیێنە. ئا سوپۍ کە تەنیا هیواو ئاستەیۆ دەسەڵاتەکەیشانە سەروو پەیاوە، بێ کەسایەتی و سەنگ مەنێنۆ.

ئیجارەیچە سەرجەنۆ ئەرەیاۋنای جەنگی تایبەتی جارێوەتەر دەسبەکار بیۆ و بە ئەرەیاۋنای ئشناسنامەو ئا گەریلایا کە ساڵانی ویەردەنە گەشمەردۍ بیېنۍ پېسە ئانەی جە ئاکاموو ئۆپراسیۆنوو میتینە گەشمەرڎۍ بیۍ با، بە رای گرڎیی نیشانەدریۍ. بەڵام ئا حۊڵەشا بە هەواڵ و ئەرەیاۋناکا جمەری پوچۍ کریېوە و ئامانجشا نەپێکا. پۍ ئانەیچ ئیسە حۊلدای دەوڵەت ئەرەگیری ئانەن کە جە بڕۍ سووچێوە گورزە جە گەریلای بڎۆ و پی جۆرە ۋێش سەروو پەیاوە مردنۆ.

خەڵکوو بادینانی جارێوەتەر پەشتیوانیشا پۍ گەریلای بەربڕیەن

کاریگەری ئی ئۆپراسیۆنەی سەروو خەڵکوو هەرێمەکەی فرە زیاڎ بیەن. بە تایبەتی خەڵکوو هەرێموو ئامێدی، دێرەلوکی و شێلادزێ ورێوە گۊرەشا هۊرگێرت. فرەو کەسا پەشتیوانی ۋێشا پۍ گەریلای بەربڕی و هەڵوێسی نەتەوەیی ۋێشا جە کۆڕ و گلېرۆبیەینە بەربڕی. یاخوڎ پېسە گرڎ وەختۍ خەڵکوو ئا هەرێما هیواو رزگارییەیشا جە ئاکاموو ئا جەنگەی گەریلا کەرۊش، جە دەس نەڎان. بەڵام پېسە تەسەور کریۍ هێزەکۍ پەدەکەی کە حۊڵ مڎا جە گرڎ ڕوانگێوە جە دەوڵەتوو تورکی بشا، ژمارێوە فرە جە ئەرەنیشتا ئا مەنتیقاشا گێرتۍ. هاموەخت سەرچەمە هەواڵگرییەکاو ۋێچشا جە مېڎانەکا گەریلاینە زیاتەر کەردۍ. راستەوخۆ ئا زانیاریۍ کە بە دەسشا مارا چنی دەوڵەتوو تورکی هامبەشیشا پنەکەرۆ. پەدەکە جارێوەتەر سەلمناشۆ کە راستەوخۆ هامکاروو ئەرەگیران چا هەرێمەنە.

جە ئاکامەنە چنی گرڎ ئۆپراسیۆنێوە گەریلای ئەرەگیروو تورکی بەرەو مەڕیای و دلېنەشیەی ملا. هاموەخت جە گرڎ ئۆپراسیۆنێوەنە هێزەکۍ گەریلای تەجروبەشا زیاتەر بۆ و ئەنجامی گۊرەتەر بەدەسمارا. پۍ ئێمە پېسە گەلوو کوردی مایۍ فەخرین کە ساحیبوو سوپێوە پەروەردەکریای و پسپۆڕی پی جۆرەینمۍ. هەپەگە و یەژاستار سەلەمناشا کە دلېنەبەردەی ئەرەگیرا دوور نییا. ئا پەیامەی چی ئۆپراسیۆنۆ دریا، بریتیا چانەی کە مشۊم گرڎ لایۍ ئەرکوو ۋێشا چی قۆناغێنە گێڵنا و جە ئاخێزوو کوردسانینە بانۍ بە کەسێوە چالاک. هاموەخت گەریلا پەیاموو ئانەیش ئەرەیاۋنا، کە جە هەر سات و وەختێوەنە جە هەر یاگێنە کە سوپاو ئەرەگیری هێزە هۊرچنیەکاش وزۆ ئامادەباشیۆ، متاوا دلېشانە بەرا و سیستموو دەوڵەتوو فاشیستی دلېنەبەرا.