جە بەیاننامەو ڕێکوزیاو مافو مرۆڤی ئێرانەنە (ÎHR) کە مییانش ئینا نەروێژەنە ئەرەیاوناش، ڕۆو چوارشەممەی جە زینانو وەکیل ئابادو شارو مەشهەدی پەنچ کەسێ بەبێ ئاگادارکەردەیۆ بنەیانەکاشا یان ڕا بە سەردان کەردەیشا چنی بنەیانەکاشا جە قەنارە دریێنێ.

مەحموود عامری-موقەدەم، ڕاوەبەرو ڕێکوزیاو چەمدێری مافەکا مرۆڤی، ئەرەیاوناش ئا ٥ کەسێ کە جە قەنارەدریێنی 'زینانێ سیاسیێ' بیێنێ و ئاماژەش پانەیە کەرد، "ئی زینانیێ ڕووبەڕوو ئەشکەنجەدای قورسی بیێنێ، بە شێوێ نادادپەروەرانە دادگایی کریێنێ و سزاو جەقەنارەدایشا سەرەرە سەپیان."

بەپاو هەمان بەیاننامەی، چوار چا کەسا ئەندامو ڕێکوزیاو موسڵمانو سوننەی بیێنێ کە جە کۆمارو ئیسلامو شیعەو ئێرانینە کەمینێنێ. هەرپاسە کەسی پەنەچەمیش شیعە بییەن.

شایانو باسین ئێران جە جەهانەنە هەن، دماو وڵاتو چینی تەنیا وڵاتێوەن کە فرەترین ژمارەو جەقەنارەدایش دلێنە جابەجێ کریۆنە. بەپاو ئامارەکا هیومان ڕایتس ئۆچ، جە سەرەتاو ئێساڵیۆ بەلانی کەم ٢٤٥ کەسێ جەقەنارەدریێنێ. IHR ئەرەیاونانش کە ژمارەو جەقەناردایرکا بە شێوێ وەرچەم جە ئێرانەنە زیاش کەردەن.