ئەردۆگان دماو دوانزە ساڵا بەغدانە چەنی وەرپەرساو عێراقی کۆ بیوە
سەرۆککۆمارو تورکیا ڕەجەب تەیب ئەردۆگان، کە ماوێوە کوڵا دەسش بە هجوومی ئەرەگیرکاری کەردەن، دماو ١٢ ساڵا سەرێ عێراقیش دا.
دماو ئانەیە دەوڵەتو تورکی پانیشتو کوردستانینە بەتایبەت هەرێمەکاو پارێزنایی مەدیاینە هجوومێوی تازەی ئەرەگیرکارییش دەس پنە کەرد، ئەردۆگان سەرێ بەغدای و هەولێری مدۆ.
شاندی یاوەرو ئەردۆگانی وەزیرو بەری هاکان فیدان، وەزیرو دلێ عەلی یەرلیکایا، وەزیرو وەرگێری یاشار گولەر، وەزیرو بازرگانی عومەر پۆڵات، وەزیرو فاڕایوە عەبدولقادر ئورالۆغلو، وەزیرو کشتوکاڵی و دارستان ئیبراهیم یوماکلی، وەزیرو وزە و سەرچەمە سروشتییەکان ئاڵپ ئەرسەلان بایرەقدار، وەزیرو پیشەسازی و تەکنەلۆژیای محەمەد فاتیح کاجیر، ڕاوەبەرو ئەرەیاونای سەرۆککۆماری فەخرەدین ئاڵتون، ڕاوێژکارو سیاسەتوو بەری و ئاسایشو سەرۆککۆماری باڵیۆز عاکیف چاگاتای کیلیچ.
سەرۆککۆماری ئەرەگیرکەر قەرار پاسەن دمایی بلۆنە هەولێر و چەنی وەرپەرساو پەدەکەی کۆ بۆوە. پەدەکە وەڵێ سەردایەکەو ئەردۆگانینە گرد لایێو هەولێرینەعەلەمەو تورکیایش بەرزە کەردۆ، قەڵای تارێخییەو هەولێریش بە عەلەمەو تورکی ڕووپۆشە کەردە.
پەرسەی سەرەکییەو ڕۆی ئەرەگیرکاریین
چەمەڕوان مکریۆ، پەرسەی سەرەکییەو ڕۆی پەکەکە بۆ، دەوڵەتو تورک دەیان ساڵێن پانیشتو کوردستانینە بنکەی سەروازی منیۆرە، ئینە تا مێ زیاتەر مبۆنێ، حەرپاسە هجوومی ئەرەگیرکاری زیاتەر مکریۆ، ئا وەختە بەغدا ڕووبەڕوو فشارو دەوڵەتو تورکی بییۆ و پەی دژایەتیی کوردی، مانگەو ئادارینە وەزیرو وەرگێریی عێراقی سابت ئەلعەباسی ئەگەرو "ئۆپەراسیۆنی سەروازیی هامبەش"یش دژو پەکەکەی ڕەت کەردۆ و واتش، بەغدا و ئەنقەرە وەخت و یاگی گونجیانە هەرمانە مکەرانێ پەی ئەرەمەرزنای " ناوەندی هەماهەنگیی هەواڵگێری".
