ئارۆ شارو ڕانیەینە بە سەرمەشقایەتیی گرووپو کۆشیای پەی شەرمەزارکەردەی هەوڵە ئەرەگیرکارییەکاو دەوڵەتو تورکی و سەردایەکەو ئەردۆگانی جەمۆبییەێوە ناڕەزایەتیی کریا. جەخت کریاوە سەرو ئانەیە ئامانج جە سەردایە چەمەڕوانکریاکەو ئەردۆگانی زەمینەوەشکەردەین پەی ئۆپەراسیۆنی ئەرەگیرکاری دژو پانیشتو کوردستانی.

بەنامێ گرووپو کۆشانیوە ستار ڕەسوڵ ئەرەیاوناێوەش واناوە، تیشکەش وستە سەرو یادو شاڵاوو ئەنفاڵی و جینۆسایدو گەلو پانیشتو کوردستانی، ئەرەیاوناش تەنیا بە یۆگێرتەیی و هۆشیاری و یەکڕیزیی ئی برینێ ساڕێژێ مبانێوە.

جەختیچش کەردۆ سەرو ئانەی هەڵای ڕژێمە فاشیست و ئەرەگیرکارەکێ بە ڕای جیاواز بەردەوامێنێ جە قڕکەردەی گەلو کوردینە، واتش: "لاو گردلاێوە ڕۆشنا، کە پانیشتو کوردستانی ئینا وەردەمو هەڕەشێوی جیددیێنە، نەمەنەی هیچ ئەرەمەرزیێوی شەرعیی خەڵکی پاسەش کەردەن، هەڕەشەکێ زیاتەرێ با، عێراق سەوروەرییش لەکەدار کریان و پەوکای دەوڵەتو تورکی فاشیتی ویەردەنە چندین جارێ کۆکوشییش کەردەن".

هەرپاسە  تیشکە وزیا سەرو ئانەیە دەوڵەتو تورکی بە بەهانێ بێبنەمێ چندین کیلۆمەترێ خاکش پانیشتو کوردستانیش ئەرەگیر کەردەن و بەنیازو هجوومی ئەرەگیرکاریی تازەین، ستار واتش: "داوا وەنەو گردو  ئازادیوازامکەرمێ، دوور جە ئینتیمای حیزبی و ئایدۆلۆژی و خەتەی سیاسیێ، هەڵوێست و هەنگامەی عەمەلیێ بنیا پەی سەرکۆنەکەردەی ئا سەردایە چەمەڕوانکریایەو ئەردۆغانی، کە قەرارا پەی عێراقی بکەرۆش، بەنیازو زەمینەوەشکەردەی و وێستەیۆ پەشتیوانیین پەی ئا ئۆپەراسیۆنە  ئەرەگیرکارییە، پەوکای تەسەورما چانەن پێویسا گرد لاێو تەرسەکێ بەهەند ورگێرا و هەنگامەی درووسە بنیا پەی کۆدەنگیی نیشتیمانیی و بەرژەوەندیی نەتەوەیی".