ڕێکوزیاو یونسێفو زاڕۆڵا نەتەوە یۆگێرتەکا، سەبارەت بە هرووژمەکا ئیسرائیلی سەرو کەرتو غەززەی ئەرەیاونێوەش وەڵاکەردۆ. یونسێف ئاماژەش پانەیەدا دماو دمای ئاردەی بە ئایێربەسەکەی، گریمانەو ئانەیە مکەرا جە ئەنجامو بۆمبوارانەکانە ٣٢٢ زاڕۆڵێ کوشیێنێ و ٦٠٩ زاڕۆڵێ تەرێچ زامڏارێ بیێنێ.

یونسێف جە ئەرەیاوناکینە واتش: "ئینە با مانێ مێ جە ماوەو ١٠ ڕوانە، ڕوانە نزیکەو ١٠٠ زاڕۆڵێ کوشیانە  یان کەمئەندامێ بانە. فرەی ئا زاڕۆڵا کە ئینێ یاگێ و زێدو وێشانە و ئینێ خێمێنە ئینێ دۆخێ فرە سەختەنە مژیوا."

یونیسێف ئاماژەش پانەیەدا ئا زاڕۆڵێ جە هرووژمەکەو ٢٣ی ئادارینە جە دژو نەوەشخانەو ناسری جە پانیشتوو هەرێمەکەدینە گیانشا جەدەسدان، ژمارێوە فرەو زاڕۆڵا جە ئەنجامو هرووژمەکینە زامڏارێ بیێنێ.

ئیسرائیل دمایش با ئایێربەستەیە ئارد کە جە ١٩و کانوونو یوەمینە چنی حەماسی بەستەنش، دەرەنجام جە مانگەو ئادارینە بە بەردەوامی ئۆپەراسیۆنو زەمینی ئەنجام مڏۆنە و ناوچەکەی بۆمبواران مکەرۆ.

سەرۆکو یونسێفی کاسرین ڕۆسێل واتش: "ئایێربەستەی پەی زاڕۆڵا غەززەی ئاسایشش دابینکەردەن، بەڵام جە ئیسەنە جارێوە تەر زاڕۆڵێ ڕووبەڕوو توندوتیژی و هەژاری باوە."

بە پاو وەزارەتو تەندروسی حەماسی جە ڕۆو دەسپنەکەردەیۆ هرووژمەکاوە جە غەززەنە ١٠٠١ کەسێ گیانشا جەدەسدان. جە دەس پنەکەردەو جەنگیۆ بەمەڵامەتو هرووژمو حەماسی جە ٧و تشرینو یوەمی ٢٠٢٣ی جە دژو ئیسرائیلی، کۆو گرڏی مەردەی یاوا ٥٠ هەزارێ و ٣٥٧ کەسێ.