ماوێوەن جە ما بەینو ڕابەر ئاپۆی و لایەنە سیاسییەکا دۊڵەتو تورکینە بڕۍ چەمپنەکۊتەیۍ ئەنجام دریێنۍ، جە ئەنجامو ئی دیدارانە شاندێوە کە جە پەڕلەمانتاراو دەم پارتی پێک مەیا لوێنۍ دوورگەو ئیمراڵی و دماتەر جە ٢٧ی شوباتینە بانگەوازە تاریخیەکەو ڕابەر ئاپۆی ۋنیاوە. دماو بانگەوازییەکەو ڕابەر ئاپۆی پەی چەک نیایرەی، پەکەکەیچ بە شێوێوە ئەرێنی جوابو ئی بانگەوازییەیشە داوە.

حەرچڼە ماوێوەن شاندەکە ملۆ ئیمراڵی بەڵام هەڵای گۆشەگیری سەرو ڕابەر ئاپۆی بەردەواما. دەربارەو ئی مژاریە ئیبراهیم بیلمەز پارێزنەرو ڕابەر ئاپۆی جە نوسینگەو یاسایی سەدەی ئەرەیاۋناش، ئاڎۍ پەی ئەنجامدای دیداری حەفتانە بە پارێزنەر و بنەیانەکایچۆ داواکاریشا تۆمار کەردەن، بەڵام هەڵای حیچ جوبێوەشا نەدریانۆ. بیلمەز ئاماژەش پانەی دا جواب هۊرنەگېرتەی و ڕا گێرتەی جە ئەنجامدای گۆشەگیری گوزارشتا چانەی کە هەڵای گۆشەگیری سەرو ڕابەر ئاپۆی بەردەواما. ئاماژەش پانەیچ دا سەرەڕاو سەرۋنەدای شاندەکەی، بەڵام هەڵای گۆشەگیری سەرو ڕابەر ئاپۆی بەردواما و حیچ خاڵێوە یاسایی جە ئیمراڵیینە پەیڕەو نمەکریۆ و واتش: "مادام ئینایمۍ قۆناغێوە تاریخینە، مشۊم هەلومەرجو ڕەخسنای ئا پرۆسەیە بڕەخسیۆ. لاو کەمیۆ مشۆم پرسە یاساییەکۍ پېسە مافو ئەنجامدای دیداری چنی پارێزنەر و بنەیانەکا، مافو تەلەفون کەردەی و مافو ئەرەیاۋنای جابەجێ بکریۆ."

'ماوەو ١٠ ساڵان ئی هەموارکەردەیۆ ئەنجام نمەڎریۆ'

بیلەمەز جە بەردەوامیینە سەرنجش وست سەرو گرنگی دڎانیای بە 'مافو هیوا'یرە و ئەرەیاۋناس ئشیۍ ١٠ ساڵێن ئینە پەسەن کریابیۍ، مژارو دڎانیای بە مافو هیوایرە پرسێوە یاساییا و واتش: "پېوەس بە داواکاری ئێمەی پارێزنەراوە جە ساڵەو ٢٠١٤ینە دادگاو مافەکا مرۆڤو ئۊرووپای (DMME) دەربارەو دۆسییەیۍ بە نامۍ 'ئۆجالان ٢' ینە قەرارێش دا و جە قەرارەکەنە جەخت چانەی کریانۆ سزاو زینانی هەمیشەیی قورسی، پاشێلکەردەی قەڎەغەو ئەشکەنجەیا. پۊکەی ئینە ماوەو ١٠ ساڵان، یانی جە وەختو بەرشیەی ئی قەراریۆ تا ئیسە ئېژا ئۆجالان و هەزاران زینانیۍ تەرۍ کە سزاو زینانیکەردەی هەمیشەیشا سەرەرە سەپیان، ئینۍ چېرو ئەشکەنجەینە. پۊکەی ئشیۍ تورکیا ١٠ ساڵۍ چێوەڵی دەربارەو ئی مژاریە هەموارکەردەیۆ یاسایش ئەنجام دابیۍ؛ ئینەیچ عیلاقەش بە مژارەکا ئارۊی و پېوەس بە پرۆسەکەیۆ نییا. تورکیا ئەندام و ئیمزاکەرو پەیماننامە مېیاننەتەوەییەکان. گرڎو قەرارەکایچ تورکیا مگێراوە. هەرپاسە گرڎو ئی قەرارا بە زۆرەملێ سەرو تورکیایرە نەسەپیێنۍ، تورکیا بە ویست و ئیرادەو ۋێشۆ بیەن بە ئەندام. مشۊم پرسە یاساییەکا ئی مژاریە جابەجێ بکەرۆ. کەچی ماوەو ١٠ ساڵان پاشێلشا مکەرۆ."

بیلەمەز ئاماژەش بە قەرارو ١٧-١٩و ئەیلولو کۆمیتەو شالیارا ئۊرووپای کورد و جەختش کەردۆ چانەی کە مشۊم تورکیا جە ماوەو ساڵێوەنە ئی قەراریە جابەجۍ بکەرۆ.

'مشۊم هەموارکەردەیۆ یاسایی ئەنجام بڎریۆ'

ئیبراهیم بیلمەز ئاماژەش پانەی دا وەڵۍ گرڎ چێوێنە پەنەوازا هەموارکەردەیۆ یاسایی بکریۆ و دەسنیشانش کەرڎ ئی فاڕیایۍ پېوەسێنۍ بە نیشاندای ئیرادەی سیاسییوە و پی جۊرە دمایش بە قسەکاش ئاورد: "وەڵۍ گرڎ چێوێنە مشۆم ماددە یاساییەکۍ جابەجێکەردەی سزای، یاسایی سزاو تورکی (TCK) و یاساو ئەوەکۊشای تیرۆری (TMK) فاڕیا و هەموارکەردەیۊیۍ تازە بکریۆ و یاگۍ ئینەیچ پەڕلەمانا. ئینە هەرمانێوە قورسە نییەنە و پەنەوازا ئەنجام بڎریۆ. هەرپاسە ۋەرو ئانەی پرسێوە یاساییا، قەناعەتما هەن کە ئۆپۆزسیۆنیچ پاڵپەشتی ئینەی بکەرۆ. ئانەی فرە گرنگە ئانەنە کە پەنەوازا ئیرادەی ڕامیاری ئی ویستەشە بۆ".