چالاک و یاساشناس ئیبراهیم شێخۆ، ئاشکراشکەرد کە دەوڵەتوو ئەرەگیروو تورکی، بە زۆرە ملێ، تورک بیەی سەروو عەفرینیرە سەپنۆنە و جە وەختوو ئەرەگیرکەردەی عەفرینیوە زیاتەر جە ٩٠٠٠ کەسا ئەڕفیێنۍ.
ئیبراهیم شێخۆ ئاماژەش پانەی دا، تورکیا ئامانجش فاڕای دیمۆگرافیاین وحۆڵ مڎۆ عەفرینی کەرۆ بە هەرێمێوە تورکیای، ئا هجومێچە کە جە ٢٠ /١/ ٢٠١٨یۆ دەسشپنەکەردەن. شێخۆ ئانەش دەسنیشانکەرد گەر ئی ئاژەو سەروو عەفرینی پی جۆرە بەردەوامبۆ، هەرێمێوە کوردی بە نامۍ عەفرینیوە پۍ کوردا مەمەنۆوە.
ئیبراهیم شێخۆ جە سەرەتاو قسەکاشەنە ئانەش ویرئاردۆ کە جە ئاداروو ٢٠١٨ینە عەفرین جە تەرەفوو دەوڵەتوو تورکی و چەتەکاشۆ ئەرەگیرکریا و واتش: " وەڵێ ئی ئەرەگیریەینە عەفرین شارێوە ئارام بێ، پێ یووەم جار جە سەروو ئاستوو ۋەرنیشتوو کوردسانینە پەرەوەردە بە زۋانی کوردی بۍ، حەرپاسە ڕێژێوە فرە ئاوارێش جە ۋێش گرتۍ بێنۍ ئی دەسکۆت و وەڵێ کۆتەیە بە دڵوو تورکیای نەبۍ. عەفرین هەرێموو کوردان و ڕێژەو کوردی چا هەرێمەنەسەڎەنە ٩٧".
'جە ماوەو ٦ ساڵانە ٩٠٠٠ کەسۍ بڕفانیێنۍ و فاڕای دیمۆگرافی ئینا ئاستێوە ترسناکەنە'
جە درێژەو قسەکاشەنە ئیبراهیم شێخۆ باسش جە کۆچبەرکەردەی خەڵکە ڕەسەنەکەیش کەرد و واتش: "وەڵۍ ئەرەگیرکەردەو عەفرینینە سەرۆک کۆمارو تورکیای، ئەردۆغان ئاماژەش پانەی کەرد کە ڕێژەو کوردی عەفرینەنە سەڎەنە ٣٥. چا وەختۆ جە نیازوو بە تورک کەردەو عەفرینی یاوانینە جە تەرەفوو تورکیایۆ. ئەردۆغان پی مەرامۆ ئانەش گەرەک بێ کە دیمۆگرافیاو عەفرینی فاڕۆ. چونکی سەرووئاستوو ۋەرنیشتوو کوردسانی عەفرین فرەتەرین کوردش ئینا چنە و ئەرەنیشتۍ کوردۍ ڕەسەنێنۍ. دماو ئەرەگیرکەرڎەو عەفرینی جە ماوەو ٦ ساڵانە زیاتەر جە ٩٠٠٠ کەسا جە عەفرینەنە بڕفانیێنۍ، دلۍ ئی ژمارەینە زیاتەر جە ٢٠٠٠ شا ژەنینۍ و چارەنوویسوو ٣٠٠٠ کەسایچ دیار نیا. حەرپاسە چەتەکۍ سەر بە دەوڵەتوو تورکی حۊڵمڎا کناچا وەننگەکا ناچار کەرا شێوازوو جلوبەرگیشا فاڕا و ئا جلا کەرانە کە ئاڎیۍ بە دڵشانۍ ".
'ڕێژەو عەرەبی زیاڎش کەرڎەن'
ئیبراهیم شێخۆ جە بەردەوامی قسەکاشەنە باسش جە فاڕای ئەرەنیشتا عەفرینی کەرد و واتش: "پېسە ڕۊشنا یۊ جە ئامانجەکا تورکیای، فاڕای دیمۆگرافیاو عەفرینیا. جە وەختوو ڕاوەبەری خۆسەرینە ٩٧ جە سەڎوو ئەرەنیشتا عەفرینی کوردۍ بېنۍ، حەرپاسە نزیکەو ٢ جە سەڎیشا عەرەبۍ بێنۍ، وە بڕۍ جە نەتەوەکا مەسیحی و ئەرمەنیش چنەبێنۍ. پۊکەی دەوڵەتوو تورکی دماو ئەرەگیرکەرڎەو عەفرینی دەسشکەرد بە فاڕای دیمۆگرافیاو هەرێمەکەی، جە ڕاو بەرکەردەو کوردا و ئاردەی عەرەبی و تورکمانی پۍ ئا شارەیە. جە ئیسەنە ڕێژەو عەرەبی چا شارەنە بیەن بە سەڎەنە ٧٧ و جە یاگۍ کوردانە ئەرەنیشتۍ کریا. چا ماوەنە زیاتەر جە ٦٤٧ هەزار عەرەبا و تورکمانا ئەرەنیشتۍ کریېنۍ. ئینەیچ دیمۆگرافیاو هەرێمەکەیش فاڕان و ڕێژەو کوردی وەستەنەرە پۍ سەڎەنە ٢٣".
'زیاتەر جە ٣٥ گلېرگۍ ئەرەنیشتەبیەی جە عەفرینەنە وەشۍکریێنۍ'
شێخۆ باسش جە وەشکەردەی گلېرگەو ئەرەنیشتەبیەی و یانە ئەرەگیرکریایەکا عەفرینی کەرد و واتش: " چنی ئەرەگیرکەردەو عەفرینی، خەڵكێوە فرەو سەر بە چەتەکا تورکیای ڕوەشا جە عەفرینی کەردە. ئینەیچ پاسەش کەردەن بە سەڎان کامپۍ نا ڕێکوزیۍ چا شارەنە وەشۍ کریا، بە شێوێوە دارسانوو کۊڵانەو مەحمودیەی بڕیاوە و یاگۍ ئاڎینە کامپ و خێمۍ نریێرە. ئی کامپۍ بە هامکاری ڕێکوزیاکا دەوڵەتوو کەنداوی عەرەبی پېسە قەتەری و کوەیتی، حەرپاسە ڕێکوزیا فەلەستینیەکۍ سەر بە ئیخوان موسلمینی، کە جە تەرەفوو تورکیایۆ پەشتگیری کریا، وەش کریا. جە ماوەو ٦ سالانە نزیکەو ٣٥ گلېرگا ئەرنیشتەی وەشۍ کریېنۍ. گەر کێشەکۍ سوریای چارەسەر نەکریا وخەڵکوو تورکمانی و عەرەبی نەگێڵاوە مەنتیقەکا ۋێشا، ئانە چېوۍ مەمەنۊوە بە نامۍ کوردبیەی عەفرینیۆ".
'جە دماو ٢٠١٨یۆ تورکیا بیەن بە بەرهەمئاوەروو زەیتوو زەیتوونی'
شێخۆ سەرنجش وست سەروو دزیەی و تاڵانکەردەی زەیتوونی و واتش: "پېسە مزانمۍ وەڵۍ ئەرەگیرکەردەو عەفرینی نزیکەو ١٨ ملوێن دار زەیتوونۍ، ملوێنۍ دار هەنارۍ و بە سەڎان هێکتار دارستانۍ جە عەفرینەنە بێنۍ. بەڵام دماو ئەرەگیریەکا، سروشتوو عەفرینی بە ئامانج گیریا و زیاتەر جە ٥٠٠ هەزار دار زەیتوونۍ بڕیێوە و تاڵانکریۍ، کە تەمەنوو ئا دارا زیاتەر جە ١٠٠ ساڵا بێنۍ. ئا دارۍ جە ئیسەنە جە ئیدلیب و تورکیا و مەنتیقەی تەرەنە بە ١٥٠ دۆلارۍ ئەمریکی ورەشاوە. حەرپاسە بە دەیان دارسانۍ جە عەفرینەنە سۊتێنۍ. جە دماو ساڵەو ٢٠١٨ یۆ بەرهەموو زەیتوو زەیتوونی جە تورکیانە زیاڎش کەردەن، ئینەیچ بە بەڵگە سەلەمیان کە تورکیا جە ڕاو دزیەو زەیتونوو عەفرینیوە چنڎە بەرهەموو زەیتوو زەیتوونوو ۋێش زیاڎکەردەن".
جە دمادمایی قسەکاشەنە ئیبراهیم شێخۆ داواش جە گرڎوو مافناسا و چالاکا کەرد بە زوتەرین وەخت بە ئەرکوو ۋێشا هۊربێزا و هەرمانە پۍ عەفرینی کەرا و واتش: "فاڕای دیمۆگرافی جە سەردەموو ڕژێموو سوریاینە جە دەوروو سەڎەنە ٢٥ بۍ، بەڵام دماو ئانەی دەوڵەتوو تورکی و چەتەکێش هەرێموو عەفرینیشا ئەرەگیرکەرڎ، ڕێژەو فاڕیای دیمۆگرافی سەروو عەفرینی یاوان بە سەڎەنە ٨٠ ، ئینە ئاژێوە ترسناکا سەروو عەفرینی. گەر پی جۊرە بەردەوام بۊ ئانە چێوۍ مەمەنۊوە بەنامۍ کوردبیەی عەفرینی و عەفرینێوە پېسە ئەفغانستانی موینمۍ. هیواڎارەنا چالاکا، یاساشناسا، ڕێکوزیاکا مافوو مرۆڤی و سیاسەڎمەدارا هەنگامەی دەموودەسە بنیا و دمایی پی ئەرەگیریا بارا".
