واتەواچەو ئابووری کۆنگرە ستاروو سەرنیشتوو ۋەرکەوتوو سوریای گولێ مورادە ئانەش وست ڕووە کە مۆدێلوو ئابووری نیا سەرەتاکاشەنە، بەڵام جە ڕوو ڕێکوستە بیەی ئابوری ژەناوە دەسکۊتشا بیەن و واتش: "پۍ وەڵۍ وستەی و پارێزنای دەسکۊتەکا ژەنا، حۊڵ مڎەیمۍ هەرەوەزییە ئابووریەکاما جە ئاژەو جەنگینە وەڵۍ وزمۍ."

ژەنی بە وەشبیەو ئاخێزوو ۋەرنیشتی بەشدارۍ سیاسی، گلێرگەیی، سەروازی و ئابووری بیۍ. کۆنگرە ستاریچ سەرمەشقایەتی ئینەیش کەرد. بە شێوێوە ڕسمی جە ساڵەو ٢٠١٥ینە ئابووری ژەناش بە ڕێکوستەی کەرد. ئابووری ژەنۍ یۊن جە دەسکۊتەکا ئاخێزوو ۋەرنیشتی و ڕۆ دماو ڕۆی زیاتەر وەڵۍ گنۆ. جە  ۋەرنیشتەنە نزیکەو ٦٣ هەزار هێکتارا زەمینی هەن کە زیاتەر جە ٥٠٠ ژەنا هەرمانەش چنە کەرا. جە پرۆژە هامبەشەکانە پێسە فڕنی، واردنگەی و خەیاتی نزیکەو ١٣١ ژەنا بەشدارۍ هەرمانێنۍ. جە ٧٨ هەرەوەزیۍ ئابوورینە زیاتەر جە ٦٣١ ژەنا هەرمانە کەرا و بەشدارێنۍ. نزیکەو ٥١ کۆمەڵە هەرەوەزییاشا ئینۍ مەجال و چاندینە، ٢ ێشا ئینۍ مەجال و جە قوتوەنیای واردەینە، حەرپاسە ٢٥ ژەنیچ جە دوکانی ئاسایی و فڕنەکانە هەرمانەکەرا. واتە واچەو ئابوری ژەنا کۆنگرە ستاری جە سەرنیشتوو ۋەرکەوتوو سوریای گولێ مورادە پۍ ئاژانسوو هەواڵوو فوراتی (ANF) باسش جە گرنگی ئابووری ژەنا کەرد.

بەرئەنجاموو کۊشیایۍ گۊرەین

گولێ مورادە ئانەش یاڎ ئاردۆ کە ژەنی وەڵۍ ئاخێزوو ۋەرنیشتینە جە مێڎانوو ئابوورینە دوورە وزیێبێوە و واتش: "ئابووری تەنیا پێسە هەرمانەو پیایا وینیۍ. پۊکاتی ژەنی پێسە مێڎانێوە ژەنانەی تەماشەو ئابووری نەکەرێنۍ. پۊکەی دماو کۊشیایۍ فرەی ژەنیما ئاوردۆ دلۍ مێڎانوو ئابووری و یاوایمۍ بە ئارۊی. ژەنی تەنیا یانەنە بێنۍ و هەرمانەکاشا چا چوارچێوەنە ئەنجام دێنۍ. پۊکەی وەختۍ تەماشەو تاریخی کەرمۍ بە ڕۊشنی ئانەی ۋینمۍ کە ئاردەینەو ئابووری دەسوو ژەنێوە بیەن و مەرزیانەرە. بەڵام بە مرووروو زەمەنی ژەنی چا مەجالەنە دوورۍ کۊتێنۍ."

ڕا جە شەپۆلەو کۆچکەردەی ژەنا گیریۍ

گولی مورادە ئاماژەش پانەی کەرد کە هەرەوەزی ئابوری ژەنۍ بەشێوێوە ڕسمی جە ساڵەو ٢٠١٥ینە ۋێش بەڕێکوستەی کەرد  و پی جۊرە بەردەوامیش بە قسەکاش دا: "ئیتر ژەنی پرۆژەو ۋێشا بنیاڎ نیێنۍ، هەرەوەزی ئابووری بنیاڎ نیێنۍ. جە مەجالوو ئابوورینە پەیلووا و سەرمەشقیشا بۍ. ڕاگێرتەی جە کۆچکەردەو ژەنا ئامانجما بۍ، وە ئا ئامانجما بەدی ئارد و ژەنیما ئاوردۍ دلۍ مێڎانوو ئابووری، چونکی بە ئابووریۍ ئازاڎیی ژەنی تاوێنۍ کەسایەتیێوە ئازاڎشا بۆ. پۊکەی چی ڕووانگۆ دەسکۊتی گۊرەما بەدەسئارد."

مۆدێلوو ئابووری هەرەوەزی ئابووری

گولێ مورادە باسش چانەی کەرد ئامانجی بنەڕەتیما بەقوەتکەردەی هەرمانەکامانە و واتش: "وەڵۍ ئاخێزوو ۋەرنیشتینە ژەنی خەباتکارۍ بێنۍ، بەڵام گرڎ جە هەرمانوو کاروو دەوڵەتینە بێنۍ. چن سەعاتۍ هەرمانە کەرۍ و دماتەر گێڵێوە یانە. ئازاڎیی ئابووری نەبۍ، جە یانەیچەنە ساحیبەو قسێوە نەبۍ. جە سنوروو ویرکەردەیۆ نێرسالارینە بۍ. بەڵام دماو ئاخێزوو ۋەرنیشتی ژەنی بیۍ بە ساحیبوو ئابووری ئازاڎانەو ۋێشا و مۆدێلوو هەرمانکەردەی ۋێشا جە گلێرگەنە دەسوست و ئابووریێوە هەرەوەزییشا خوڵقنا."

ستراتیجوو کار و خەباتی

گولێ مورادە ئەرەیاۋناش بە ستراتیجیەتوو هەرمانێوە نزیکۍ ئابووری ژەنۍ بیمێوە و واتش: "وەڵتەر هەرمانەکێما تەنیا جە مەجال و چاندینە بێنۍ، پۊکەی حۊڵ دێنمۍ کە هەرمانەکاما وەڵۍ وزمۍ. پێسە ئابووری ژەنا گرنگی مڎەیمۍ بە هەرەوەزی ئابووری ژەنۍ، بەڵام گەرەکمانە زیاتەر وەڵۍ گنمۍ و ستراتیجوو هەرمانکەردەیما بۆ. هەستما بە پێویسی سیستموو وزەی ڕوەکی کەرد و سەروو ئی بنەمایۍ ستراتیجوو هەرمانکەردەیما بەهێزتەر کەرد. پۍ ئانەیچ بیرۍ ئاوێما جە فرەو شارەکانە دۍ ۋنە، زەحمەتی فرەما جە هەرمانەکانە وینا بەڵام جە ڕوو چاندیوە هەرمانەکێما وەڵۍ وستۍ. حەتا جە مەجالوو چاندیوە هەرمانەکاما وەڵۍ وزمۍ، بنەماو ئابووریما بەقووەتتەر بۆ."

هەرەوەزی ئابووری بەقووەت بی

گولێ مورادە ئانەیچش بەروست کە جە سالەو پاریوە بەقوەتتەر بیەن و واتش: " جە شەدادێ، تل تەمر، حەسەکە، دربێسیە و جزیرەنە جە ڕاو هەروەزی ئابوورییوە نزیکەو ٨ هەزار نەمامۍ میوەی نریێنۍ. ٢٥ دوکانۍ و فڕنێچ هەرمانەکێشا وەڵۍ کۊتێنۍ. حەرپاسە پۍ ئابووری خێزانیچ، خولوو پەرەوەردەی ئابووری پێشکەش کریۆ."

هجوومەکۍ مەبا بە ئاستەنگ

گولێ مورادە باسش چانەی کەرد دەوڵەتوو ئەرەگیروو تورکی ئامانجش خوڵقنای قەیرانەو ئابوورینە و واتش: "پێسە ئابووری ژەنۍ حەرچنڎە هجوومەکۍ زیاتەرۍ با، ئەما یاگەگیری حێقمما هەن. مۆدێلوو ئابووری ژەنا چێوۍ تازە نیا، بەڵام جە ڕوو بە ڕێکوستەکەردەی ئابوورییوە هەنگامێوە تازێنە. پۍ پارێزناو دەسکۊتەکا ئابووری ژەنا و وەڵۍ کۊتەیما، حۊڵ مڎەیمۍ هەرەوەزیی ئابووریما بەپاو ئاژەو جەنگی گونجنمۍ. سەرەڕاو هجوومە فرەکا، پۍ وەڵێکۊتەی ئابوری و هەرەوەزی ئابووری ژەنۍ، بە سەرمەشقایەتی ژەنۍ جە گلێرگەنە ئیسفاڎە بەخش بۆ، حۊڵ دای و هەرمانەکاما بەردەوام کەرمۍ."