د. ڕۊژین موکریانییە ئاماژەش پانەیە کەرد ئەنداماو مدرامانوو "ژەنی، ژیوای، ئازاڎی"ی هەڵای پەیوەندییەکێشا قەوەتۍ نەکەردێنۍ و واتش: "ئەگەر پەی چارەسەری ئاستوو نەتەوەی ئازاڎینە یۊبییەی بۊ، ئیتر سەبەبوو گردوو قۊرتەکاو ئیسەی، یانۍ دەوڵەت-نەتەوە چارەسەرۍ با".
کۊنفرانسوو "ژەنی، ژیوای، ئازاڎی"ی ستۊکهۊڵمنە بە سەرمەشقایەتیی کۊمەڵەو ئازاڎیی ژەناو کوردستانی (کژار) بەرڎەواما.
ئەرەنیشتەی ئارۊینە د. نەدا هۊشەنگە ئاماژەش پانەیە کەرڎە، کە دەوڵەتوو ئێرانی سرووشت و شارەکاو ئێرانی و کوردستانی وێرانۍ کەرۊ، ژیوای ملوێنا ئینسانا تا مۍ خراپتەر بۊ. بێگومان کاریگەریی تێکدای سرووشتی زیاتەر سەروو ژەناوە بییەن. پەوکای ژەنۍ ئینۍ ڕیزوو وەڵۍ مدرامانیوە. پەوکای چەمکوو "ئیکۊفیمینیزم"ی بییەن بە بابەتی سەرەکیی ژەنا ئێران و وەرکەوتوو کوردستانینە، ئی ئەنەیاواینە دماو شۊڕشوو "ژەنی، ژیوای، ئازاڎی" قەوەتتەر بییەن.
دمایی د. ڕۊژین موکریانییە دەربارەو ئەرەگیرکاری و نەتەوەپەرسی دوا.
موکریانییە واتش، وەختۍ باس جە مدرامانوو ژەنا کریۊ، پەنەوازا قسەوباس دەربارەو سیستموو دەوڵەت-نەتەوەی کریۊ، کە وێش سەروو قەیران و هجووم و ئەرەگیرکاری و تێکدای سرووشتی مەرزنانرە. ئەوەخوایش کەردۊ کە قۊرتەکاو ئارۊی جوگرافیاو ئێرانیوە گێڵاوە پەی دلۍ سیستموو دەوڵەت-نەتەوەی، سیستموو دەوڵەت-نەتەوە-پیاسالاری و سەرمایەداری بیێنۍ بایسوو قڕکەرڎەی نەتەوەیی و تندوتیژیی ڕەگەزی و وێرانکاری و ڕەنجوەری و تێکدای ژیوگەی.
د. ڕۊژین موکریانییە واتیچش، سەروەختوو شۊڕشوو "ژەنی، ژیوا، ئازاڎی"ینە گرد لایۍ باسوو یۊبییەی و مدرامانوو ژەناشا کەرد، وەلۍ لایەنەکاو ئی ئەم مدرامانەیە نەتاواشا خاس بەباشی پەیوەندییەکاشا قەوەت کەرا. چونکوم پەرسەو نەتەوەی قسێش سەر مەکریۊ. قەت باسوو پەرسەو کوردستانی و بەلوجستانی نەکریێنە، واتش: "کژار جە ئەرەیاوناکەیشنە بەڕۊشنی ئەوەخوایش کەرڎەنۊ، تەڤگەروو ئازاڎی پەی چارەسەروو پەرسەو نەتەوەیی داراو هەرمانۍ و پارادایمێوە ڕاس و گەشەسانین، کە پارادایموو عەبدوڵا ئۊجالانین. ئەگەر پەی چارەسەری سەروو بناغەو نەتەوەی ئازاڎی یۊی گێرمێ، ئا وەخت سەرچەمەو گردوو کێشە ئارۊییەکا دلێنە مشۊ، کە سیستموو دەوڵەت-نەتەوەین".
