رژێمو ئاکەپە-مەهەپەی جە ٩ ساڵی ۋېیەردەنە جە قڕکەردەی و کاولکەردەی ئیکۆلۆژینە سڵ جە حیچ رێسا و پیمەرێوە نمەکەرۆوە.

جە سەردەمو دەسەڵاتداری ئاکەپەینە جە کوردەسانەنە چێرو نامۍ "ئاژەو ئەمنی"نە جە ڕاو سازکەردەی بنکە و بارەگای سەروازی و بەنداویۆ ئیکۆلۆژی کاول مکریۆ. ئا سیاسەتا پېسە بەشێوە جە سیاسەتو قڕکەردەی سەرو گەلوو کوردی ڕاوەبەر مکەرا. جە پانیشتوو کوردەسانینە بە پەشتیوانی پەدەکەی ئاوارەیی، هەژاری و ستەم سەرو گەلوو کوردیرە مسەپیۆنە. دۆڵەتو تورکی کە بە ئەرەگیرکەردەی کوردەسانی سێر نمەبۆ، دلۍ ئەرەگیرینە ئەرەگیری، کۆچبەری و فاڕای دیموگرافیای مسەپنۆنە.

دۆڵەتو تورکی ئەرەگیری هەم سەرو ژیۋگەو کوردەسانی و هەمیچ سەرو گەلوو کوردەسانی تیرۆریزمی بەکاردبەرۆ. جە ساڵانی ۋېیەردەنە دارسانەکا جودی، گابار، بەستای و هەرێمەکا تەرو بۆتانی بڕیاوە و کاول مکریا و بە قەڎەغەکەردەکەیشا ئا ناوچۍ کە سەرچەمەو بژێوی گەلینۍ، دلێشانە بەرا. کۆمپانیاکۍ نەوتۍ یاگۍ خەڵکی چا ناوچانە مگێراوە.

بە ملیۆنان دارۍ بڕیێبێنێوە، بە سەڎان دەگۍ چۆڵێکریۍ

گرڎو هرووژمەکا جە کەشەکاوە تا تەوەنەکا کوردەسانی بە پاو سیاسەتو جەنگی تایبەتی و جەنگی ئەنجام مڎریا. دۆڵەتو تورک قڕکەردەی ئیکۆلۆژی پېسە قڕکەردەی کۆمەڵایەتی و ستراتیجی جەنگی جە سەرنیشتوو کوردەسانی ئارڎ ئاراوە، جە پانیشتوو کوردەسانیچ بە هەمان شێوە ئەنجامش مڎۆ. تەنیا جە ساڵۊو ٢٠٢٢ێنە پەی ئانەی ڕا پەی هەزاران ئەرەگیرا دۆڵەتو تورکی سازبکریۆ، لاو کەمیۆ ٤ ملیۆن دارۍ دلێنە بریێنۍ. ئا کاولکاریە، جە ساڵۊو ٢٠٢٣ێنە جە ئاستێوە بەرزتەرەنە رووەشدا و بەسەڎان دەگۍ چۆڵێکریۍ.

جە ڕاو هرووژمەکاشۆ، هەرێمەکەی جە مرۆڤەکا ماڵۊرە و چۆڵشا مکەرۊ

پېسە سەرنیشتوو کوردەسانی، جە پانیشتوو کوردەسانیچ بە هرووژمی هەمەلایەنە هەرێمەکەی جە مرۆڤەکا چۆڵمکەرۆ. شەو ڕۆ جە دژو گەریلاکاو ئازادیی هرووژمی کیمیاویی و بۆردومان ئەنجام مڎۆ، جە دژو ژیۋگەی و گەلیچ هرووژم ئەنجام مڎریۆ. سوپاو تورکی کە گرڎو هەرێمەکا بۆمبواران مکەرۆ، خاکو پانیشتوو کوردەسانی ژەعراوی مکەرۆ.