کانتۆنوو زیوریخی سویسرانە، فیستیڤاڵوو ژەناو ساکینە جانسزێ دەسش پەنە کەرد، فیستیڤاڵەکە پەی یادکەردەیوە یوە جە ئەرەمەرزناو پارتوو کرێکاراو کوردستان (پەکەکە)ی، سارا (ساکینە جانسز)ە، کە ٩ و کانوونوو دووەموو ٢٠١٣ پاریسی پایتەختوو فەڕەنساینە گەشمەردێ کریا، ساڵانە مکریۆ. فیستیڤاڵەکە بە سەرمەشقایەتیی یۆبییەی ژەناو کوردوو سویسرای (یەژەکە-سە) و بە پەشتگیریی نزیکەو ٣٠ ڕێکوزیا و دەسوەڵێوزیی ژەنا جە مەیدانوو کاسێرنێنارێلوو زیوریخینە بە درووشموو "بە ژەنی، ژیوای، ئازادیی، بەرەو شۆڕشوو ژەنا هەنگامە منیەیمێ" ملۆ ڕاوە.

مەیدانەکە بە ڕسماو ڕابەروو گەلوو کوردی عەبدوڵا ئۆجالانی و ژەنە گەشمەردە سەرمەشقەکا ڕازیابێوە. دماو دەیەقێوی ڕێزگێرتەی وەنەو گەشمەردا، ئەندامەو یەژەکە-سەی، سەلما سورەرە قسێش کەردێ. ئاماژەش پانەیە کەرد ژەناو جیهانی چی فیستیڤاڵەنە جەمێ مبانێوە و مکۆشیانە ژەناو کوردی نیشانەو ژەنە چەوسیاوا مدریانێ.

دمایی بە نامێ ناوی یەژەکە-سەیوە ئۆزەن ئایتاچە تیشکەش وستە سەروو گرنگیی ڕۆحوو کۆشیای ساکینە جانسزێ و زەینەب کیناجی، کۆشیای ئا دووە شۆڕشگێڵناشە پێسەو نەخشەڕاو ژەنا ئشناسا و واتش: " ساکینە جانسزە فەلسەفەو ژیوای گەریلاینە. یوە یوە گردوو قۆرتەکاو ژیوایش ویەرنێ و قەوەتە بییە. کۆشیای هەمیشە لاشۆ یاگێ شکۆی بێ. گرد یاگێوەنە بێ، بڕێ جارێ فەرماندە، بڕێ جارێ جەنگەوانە، بڕێ جارێ دیپلۆماتە، بڕێ جارێ واڵێ، بڕێ جار مدرامانکەرە و جە گردی گرنگتەر، بە هەڵوێست و ئیرادەو وێش ڕا نیشانە دێ. کۆشیای و مدرامانش میراتێوەن پەی ئێمەی ژەنا".

هەرپاسە ئایتاچە درێژەو قسەکاشنە گەشمەردێ زەینەب کیناجی (زیلان)ـەش یادە کەردۆ، کە ساڵەو ١٩٩٦ دێرسیمەنە چالاکیێوی فیداییش دژوو دەوڵەتوو تورکی کەرد و گەشمەردێ بییە، واتش: "چالاکییەکەو زیلانێ پەی ئێمە سەرەتێوی تازە بێ. کۆشیای هامڕا سارێ و زیلانێ پەی ئێمە نەخشەڕانە. کۆشیایەکەیشا جیهانەرە وەڵا بییەنۆ. ئێمەی ژەنا ئا میراتە کە چۆشاوە پەیما مەنەنۆ ئانەنە "بە ژەنی، ژیوای، ئازادیی، بەرەو شۆڕش هەنگامە منیەیمێ".

فیستیڤاڵەکە بە بەشداریی دەیان ڕێکوزیاو  ژەنا، بە چالاکیی کەلتووریی بەردەواما.