جە شارچەو سنونێی کە سەر بە قەزاو شەنگال-و هەرێمو ئێزیدخان-یەن، جارێتەر ئێزیدیەکێ بە پێشەنگی ئەنجومەنی ۋێڕاۋەبەری شەنگالی دژ بە ئەۋەگێڵای ئیدرای ۋەرینی کە سەر بە (پەدەکە)یەن پەی هەرێمەکەیشان بە وێنیشاندای و ڕاپیمای ناڕەزایەتیشان نیشان داۋە.

جە دمای وێنیشاندای و ڕاپیماکەی کۆبیەی ئەنجام دریا و بەیاننامە ونیاۋە کە دڵێشە ئامابێ: "شەنگالیێ و ئێزیدیەکێ جە مافی سیاسی، ئیداری و خزمەتگوزاری بێبەشێ کریێنێ و تا ئیسە ۷٤ جارێ قڕکریێنێ. ئێمە داۋاو مافەکانمان مەکەرمێنە و پەی مسۆگەرکەردیەشان مەکۆشمێنە و دەستبەرداێشان نمەبێمێنە. ئانێ کە هیزی ئاستێمێشان جیا و دایمێشان دەستو داعشی و دووچارو مەرگەساتیشان کەردێمێۋە، ئارۆ هەرگیز قبوڵ نمەکەرمێنە بگێڵاۋە شەنگاڵ و ببانێۋە بە دەسەڵاتدارێ. بەڵکو میشۆم دەستگیرێ و دادگایی بکریانە و سزا بدریانە".

ئێزیدیەکی چنڎ داۋاکاریشان ئاڕاستەو لایەنە پیەوەندیدارەکان کەردێ کە بریتیێن جە:

- ئیداره‌ی ۋەرین، کە سیاسەت و فەرمان-و مەسعود بارزانیش کەردەیی کەرد و بی بە هۆکارو ۷٤مین فەرمانی، هەرگیز نەگێڵۆۋە پەی شەنگالی.
 
- ئێمه‌ی شەنگالی و ئێزیدی وێمان ڕاۋەبەرێ وێمان بێ، نەک کەس و لایەن تەر.

- داۋا جە حكومه‌تی فیدڕاڵی جە ئێراق و ڕێکۋستەکانو مافو مرۆڤی مەکەرمێنە تا هامکارێمان بانە پەی ئانەیە جە ئەنجومەنو شارەوانی شەنگالیەنە ئێزیدیەکێ یاگێ بگێرانە.

- داۋا مەکەرمێنە کۆتایی بەسیاسەت و پیلانگێڵنای دژ بە شەنگالی و ئێزیدیەکان باۋریۆنە و ڕێز جە ئیرادەو ئێزیدیەکان بگێریۆە.