سزاکێ ئەمەریکای دژ بە ئێرانی ئارۆ سەرسەبای سەعات ٠٦:١٠ دەیەقێ کەردەیی کریێ و ئانێچە ماڕیای زیاتەر و تەمەنی و گرانی زیاتەرو بازاریش چەنی وێش ئاردەن.

 ئایاری ۋیەردە، دۆناڵد ترامپ، سەرۆک کۆمارو ئەمەریکای بڕیارش بە ئەۋەکێشای وڵاتەکێش جە ڕێککەوتە ئەتۆمیەکەو ئێرانی دابێ و بەڵێنش دابێ کە ئێرانی ڕووبەڕوو چەنڎین سزێ تنڎێ بکەرۆۋە.

ئارۆ سەرسەبای سەعات ٠٦:١٠ دەیەقێ، پێسەو کەردەیی کەردەی بەڵێنەکەو ترامپی، قۆناغی یەکەم جە سزا ئابوریەکا دژ بە ئێرانی دەسشا پنە کەرد. سزاکێ بوارەکێ، بازرگانی چەنی ئێرانی، ڕانەڎای بە بەردەی مادە خامەکا پەی ئێرانی، کەرتەکێ ماشینی و گەشتوگێڵی ئاسمانی مەگێراۋە.

پاسە چەمەڕا مەکریۆنە، دمای ٤ مانگێ تەریچ قۆناغی دووەم جە سزاکا ئەمەریکای دژ بە ئێرانی کەردەیی بکریۆنە و کە بوارەکا نەوتێ و گازی و بانکداری مەگێراۋە و بە هەر دۋێ قۆناغەکەی ئێران تووشو گێژاوی ئابوری ببۆۋە.

هیزی دۋەشەممە، حەسەن ڕۆحانی، سەرۆک کومارو ئێرانی، جە دیمانێ تەلەفزیۆنی-یەنە، جە گرنگی و کاریگەری سزاکاو ئەمەریکاشپەی سەرووڵاتەکەیش کەم کەردەۋە و واتەنش، گوایا هیچ کاریگەریێ نەرێنی جە ئابوری ئێرانی نمەکەرانە. ڕۆحانی جە دیمانەکەنە بە نەرمی ڕوو بە ئەمەریکای دۋان و زیاتەر باسش جە سەرکوت کەردەو وێنیشاندای و ناڕەزایەتیە جەماوەریەکا کەردەن و جیاتی سزاکا،  ناڕەزایەتیە جەماوەریەکێش بە مەتەرسی پەی سەرو ئێرانی و دەسەڵاتەکێش زانێنێ.

بەڵام بە پێچەۋانەو قسەکا ڕۆحانی، ئارۆ هەر دما بە دمای دەس پنە کەردەی سزاکا، تمەن ۋەراۋەر بە دۆلاری زیاتەر ماڕیان و هۆرماسای ئابوری بەرزتەر بیەن و جە بازارەنە کەلوپەل نرخ و بەهاش زیاتەر لۋان سەر. 

بە دیدو شارەزا سیاسی وئابوریەکا، چەمەڕا کریۆنە سزاکێ ئەمەریکای کاریگەری فرە خراپ تەر و نەرێنی تەر سەرو سیاسەت و ئابوری و گوزەران و ژیۋای خەڵکیو ئێرانی بنیارە و ئالۆزی و وێنیشاندای و ناڕەزایەتیە جەماوەریەکێچ زیاتەر پەرە بسانانە.