ئەنجومەنو ۋێڕاۋەبەری سەرنیشت و وەرهۆرزو سوریای مەرزیارە
ئارۆ جە شارو عەین عیسای بە ئامادەبییەی مەسەدە، نمایندەکانو عەشایری عەرەبەکان و ڕێکۋزیاکانو گلێرگەی مەدەنی، ئەنجومەنو ۋێڕاۋەبەری سەرنیشت و وەرهۆرزو سوریای مەرزیارە.
ئارۆ جە شارو عەین عیساو کانتۆنو گرێسپی سەر بە هەرێمو فوڕاتو ڕۆژئاڤا کوردستانی، کۆبیێۋی فرە گرنگ ئەنجام دریا، کە ئەنجومەنو سوریای دیموکراتی-مەسەدە، نمایندێ جە عەشایرە عەرەبەکان و ڕێکۋزیاکێ گلێرگەی مەدەنی ئامادێش بێنێ و دلێشەنە بڕیار دریا تا ۋێڕاۋەبەری سەرنیشت (باکور) و وەرهۆرز (ڕۆژهەڵات)و سوریای مەرزیۆرە.
جە کۆبیەکەینە، سیهام قریۆ و فه‌ریت ئه‌تته، پەی هامسه‌رۆكێ ئەنجومەنەکەی هۆرۋچنیێ و دماتەر هاوسه‌رۆکەو مەسەدەی ئه‌مینه عومه‌ر قسێش کەردێ و ۋاتش: مەسەدە جە ۳ مین کۆنفەڕانسشەنە بڕیارش جە ئەرەمەرزنای ئەنجومەنەکەی دان تا ببۆنە بە ڕێکۋز و هەماهەنگکەر میانو ۋێڕاۋەبەریەکانو ڕۆژئاڤا کوردستانی، باکور و ۋەرهۆرزو سوریایەنە و بۆشایی ئیداری، ئاساییشی و سیستمی پەڕ بکەرۆۋە و بە یەکسانی خزمەت بە گەلی بکەرۆنە.
هامسەرۆکەو مەسەدەی ئاشکراش کەرد: دمای گفتوگۆی چەنی وێڕاۋەبەریە دیموکراتیەکان و ئەنجومەنە سڤیلەکان، ئینجا بڕیارو ئەرەمەرزنای ئەنجومەنو ۋێڕاۋەبەری سەرنیشت و وەرهۆرزو سوریای دریان، کە ۷۰ ئەندامێ و ۲ هامسەرۆکێ جە وێ مەگێرۆنە.
یاگێ باسیەن، ئەنجومەنەکە پەی ڕۆژئاڤا کوردستانی و باکور و وەرهۆرزو سوریا ڕۆڵو پارلەمان-یش هەن و سەرجەم ئەتنیک و ئایین و ئایینزاکان نمایندەشان چنەش ببۆنە.
