سەعات ۰۷:٤٥ دەیەقێ ئارۆ سەرسەبای دلێ شارو هۆلێریەنە، بەقسێ ۋەرپەسە ئیداری و ئاساییشەکا شارەکەی، ۳ چەکدارێ هێرششا کەردەن سەرو باڵەخانەو پارێزگای. هرێشبەرەکێ سەرەتا تەقەشا جە پۆلیسە پاسەوانەکا کەردەن و جە ئاکامەنە ۱ پۆلیس بریندار بیەن و دماتەر دەربازێ دلێ باڵەخانەکەی بیێنێ و کۆنترۆڵشا کەردەن.

یاگەگیرو پارێزگارو هۆلێری، تاهیر عەبدوڵا جە بارەو هێرشەکەی بە دەزگاکا یاۋنەریش واتەن: هێرشبەرەکێ دمای دەربازبیەیشا پەی دلێ باڵەخانەو پارێزگا هۆلێری یەکسەر لۋێنێ نهۆمی یەرەم و کارمەندێۋی کارگوزاریشا بە بارمتە گێرتەن.

دما بەدمای هێرشەکەی، هێزەکێ ئاسایشی و دژە تەرۆری دەسۋەردایشا کەردەن و بەپاو زانیاری ئاڎیشا دمای ٤ سەعاتا تاۋانشا هەر یەرە چەکدارە هێرشبەرەکەی کوشانە و بە بارمتەگیریاکەی ئازاد بکەرانە.

تاق نوری، ڕاۋەبەرو ئاسایشیی گردی هولێری، زانیاری زیاتەرش بە دەزگاکا یاۋنەری دان و ئاشکراش کەردەن: هەر ۳ چەکدارە هێرشبەرەکێ کوردێ هۆلێریەنێ و دماتەر شناسنامەکێشا ۋەڵێ مەکەرمێۋە.

عەبدولخالق تەلعەت، ڕاۋەبەرو پۆلیسو هۆلێری، جە بارەو زیانە گیانیەکا هێرشەکەی زانیاریش دان و واتەنش: سەرەڕا کوشیای ۳ هێرشبەرەکەی، کارمەندێۋی کارگوزار کە کریستیان بیەن دمای برینداری گیانش سپاردەن و دۋێ یەرێ کەسێ بە سوکی بریندارێ بیێنێ.

تا ئیسە هیچ کەس و لایەنێ ۋەرپەرسیاری هێرشەکەیش جە ئەستۆ نەگێرتەن، بەڵام  جە تۆڕە کۆمەڵایەتیەکا و مەدیاکانە قسێ و باسێ جیاۋازێش سەر کریانە و هەنێ کە بەسینارێۆ دەسەڵاتی و هەنێچ بە هێرشی تەرۆرستی بەنامێش مەکەرانە.