ئامادەکاریێ پەی ئەنجامدای ۳۰ مین ئۆپەراسیۆنو بەرو سنوری، جە ١٤ کانوونو یەکەمو ٢٠١٧ی بە هێرش پەی سەرو برادۆست و خواکورکی دەسش پنەکەردەن و ئیسێچ تورکیا بە هامکاری پەدەکەی گەرەکشەن ئۆپەرسیۆنەکەی ئەنجام بدۆنە.
ڕژێمە داگیرکەرەکەو تورکیا، دژ بە جمیەری ئازادی کوردی و پەکەکەی دەیان ساڵێن ئینا جەنگەنە و گوایا پەی دلێنەبەردەی پەکەکەی ۲۹ جارێ ئۆپەراسیۆنی سەربازیش جە بەروسنورەکاش ئەنجام دان. جە ئۆپەراسیۆنەکانە، سەرەڕا هەزاران سەربازێ و تیمی تایبەتێ و هەزاران جاشێ، وەڵکەوتەتەرین چەک و تەنکنەلۆژی، تانکێ، تۆپێ، هەلیکۆپتەرێ و فڕۆکێ جەنگیێش بەکار ئاردێنێ، بەڵام دیسان ئەنجامش بەدەس نەوستەن و هەر ۲۹ جارەکە شکست دریان و قەفایەرە گێڵانەۋە.
ڕژێمو تورکیای جە ئیسێچەنە ئامادەکاری پەی ئەنجامدای ۳۰ مین ئۆپەراسیۆنی سەربازی مەکەرۆنە و بەکەردەییچ جە ١٤و کانوونو یەکەمو ٢٠١٧ی بە هامکاری پارتو دیموکرات و کوردستانی-پەدەکە، ئامادەکاریەکە دەسش پنە کەردە و سپا داگیرکەرەکەو تورگیای جە برادۆست، سیدەکان و خواکورک یاگەگیر کریان و گەرەکشەن داگیرکایەکەی هەمیشەیی بکەرۆنە.
ئامانج جە ۳۰ هەمین ئۆپەراسیونو بەرو سنوری، گوایا داگیرکەردەی قەندیل و پێسەو هەمیشەی بەحساب کۆتایی-ئاردەی بە پەکەکە-یەن. جەی چوارچێۋەنە، جە پانیشت(باشور)و کوردستانی سپاو تورکیا بەهامکاری پەدەکەی هێزێ سەربازیێ و سیخوڕیشیێش ناوچە ستراتیژیەکانە ۋەڵێ کەردێنێ و ژمارێۋی فرێ بارگە و سەربازگێش دروسێ کەردێنێ.
بەڵام سەرەڕا ئانەیە کە چنڎ مانگێن جە چوارچێۋە و ئامادەکاریەکانە هێرشێ قورسێ جە زەمین و ئاسمانەۋە کریا سەروهەرێمەکا پارێزانی مەدیای، بەڵام بە مدرامان و قارەمانی کەم ۋێنەو گەریلاکا هەپەگەی و ژەنە گەریلاکا یەژەئاستاری شکست بە هێرشەکا دریان و سپا بەزیاکەو تورکیای زەمینگیر کریان. جە ئەگەرو دەست پنەکەری ۳۰ مین ئۆپەراسیۆن جە بەرو سنوریچ پێسەو ۲۹ ئۆپەراسیۆنەکەی تەری ئیجاریچ چەمەڕایی شکستی قورسی پەی سپا و ڕژێمەکەو تورکیای کریۆنە و گەریلاچ ئینا ئامادەباشی تەمامەنە.
