پەیوەندیە دبلۆماسیەکێ تەڤگەری جڤاتی دیموكراتی-تەڤدەم،، جە وەڵامو قسەکاو نێچیرڤان بارزانى، سەرۆکو حکومەتو هەرێمی کە پەکەکەش بە "داگیرکەر" نامێ بەردەبێ و تورکیای داگیرکەرش پارێزنا بێ، ناڕەزایەتی تنڎش نیشانەدا و داۋا بەستەی کۆنگرەی نەتەوەیی مەکەرۆنە.
دلێگەو پەیوەندیە دبلۆماسیەکا جمیەرو گلێرگەی دیموکراتی(تەڤگەری جڤاتی دیموكراتی) -تەڤدەم، بە ۋەڵاکریێۋ ناڕەزایەتیش دژ بە قسەکاو نێچیرڤان بارزانى، سەرۆکو حکومەتو هەرێمو کوردستانی نیشانەدا، کە پەکەکەش بە "داگیرکەر" نامێ بەردەبێ و سپاو و ڕژێمە داگیرکەرەکەو تورکیاش پارێزنا بێ.
تەڤدەم ئاشکراش کەردەن: " تورکیا پەی ئانەیە وەڵکۆتەی کوردی ئاستەنگ بکەرۆنە، بە ئاشکرا و بێ درێخیکەردەی هەرچیش پنە کریا بۆنە کەردەنش. چنڎین ساڵێن دژایەتی هیواکا کوردی جە ڕۆژئاڤا-باکورو سوریای مەکەرۆنە. ڕۆی ڕۆشن پەشتیۋانیش جە تەرۆریستا کەردەن و ڕەۋانێش کەردێ تا دژ بە هەرێمەکێما گژیانە. دماتەریچ هێرشی فاشستانەش کەرد سەرو عەفرینی. هەڵبەتە دژبەری و دوژمنایەتی تورکیای بە ڕۆژئاڤاۋە سنوردار نەبیەن و گردو کوردستانیش گێرتەنەۋە. ئانێچە سەلمنۆنەش کە ئا ڕژێمە هەرگیز ۋەراۋەر بە کوردی و دۆزەکێش نمەفاڕیۆنە و هەنگامێۋە ڕوو بە دما مەنیۆنە. ئانێچە فرە خاستەر جە ۲۰۱۷ و سەروەختو ڕەفڕاندۆمەکەو پانیشتو کوردستانی بەرکەۆت ".
تەڤدەم، نامبەردەی جمیەری هەرە نیشتمانی کوردی کە پەکەکەن بە (داگیرکار)، جەلاو نێچیرڤان بارزانى، سەرۆکو حکومەتو هەرێمو کوردستانی، بە خزمەتکەردەی بە کوردی و جەمیەرەکێش نمەزانۆنە و دەستنیشانش کەردەن: "قسەکێ بارزانی خزمەتکەردەین بە دوژمنی و داگیرکەری. قسەکێش جە وەختێۋەنە کەردێنێش کە هەرێمو کوردستانی ڕووبەروو داگیرکاری تورکیای بیەنەۋە و ڕوانە سپاو تورکیای کوشت و بڕو گەل مەکەرۆنە و زیاتەر جە ۲۰ سەربازگێ و بارەگێش جە هەرێمنە هەنێ. ئانە کە ئارۆ تورکیا جە هەرێم ئەنجامش مڎۆنە، هیچش کەمتەر نییەن چانەیە کە هیزی جە عەفرین ئەنجامش دا. بەڵکو تەمامکەرو پیلانە دژە کوردیەکا تورکیایەن جە ناوچەکەنە. جە ڕاسیەنە قسەکێ نێچیرەوان بارزانى هاندەرێ تورکیایەنێ پەی داگیرکەردەو کوردستانی".
تەڤدەم ئاشکراچش مەکەرۆنە: " بشۆم دەسەڵاتدارێ هەرێمی دژ بە داگیرکاری تورکیای جە باشور هەڵوێستە نیشانە بڎانە و بزانانە کە ئاستەمەن ڕژێمو تورکیای ببۆنە بە دۆسشا. چونکە داگیرکاریەکە تەنها دژ بە لایەنێ یان بەشێ جە کوردستانی نییەن، بەڵکو دژو سەرجەم گەلو کوردی و هیواکاش و نیشتمانەکێشەن".
تەڤدەم ئاماژەش دان بە گرنگی یەکێتی و یۆگرتەی و هەڵۋستی نەتەوەیی و نیشتمانی کوردی جە ئارۆنە و جەختش کەردەنەۋە: " پەی پووچەڵ کەردەی پیلانەکا تورکیای کە کە خەبات و شناسنامەی کوردیش کەردەن ئامانج، گەرەکەن ناکۆکی و جیۋازیەکێ بنریا لاۋە و سەرجەم لایەنەکێ زیاتەر جە یەکتری نزیکێ باۋە و پێۋەرە هەنگامێ جددیێ پەی یەکێتی و یۆگرتەی بناینە و بەدیالۆگ کێشەکاشا چارەسەر بکەرانە و هیچ کەس و لایەنێۋ چەمپۆشی جە داگیرکاری و تاۋانەکا تورکیای نەکەرۆنە. هەنگامێ هەرە ژیرانێ جە ئیسەنە پەی کوردی ئەنجامدای کۆنگرەی نەتەوەییەن".
