بە بۆنەو ١١ هەمین دورەو دەسپەنەکەردەو مەجلسوو شوراو ئیسلامی ئیرانی دەسەو نویسکارا هۆرام.ئینفۆ-ی ئەرەیاونایێوش دان و ئاشکراش کەردەن: "جمهووری ئیسڵامی دما ڕوەکا دەسەڵاتیش مژمارۆ و مەجلسەکە مەبۆنە بە دمایین مەجلسو ڕژێمی".
ئارۆ پەنج شەممە، ١١هەمین دەورەو مەجلسوو شوراو ئیسلامی ئێرانی دەستبەکار بی و محەمەدباقر قالیباف بە ۲۳۰ بە سەرۆکو مەجلسەکەی دەستنیشان کریا. پەیوەست بە دەستبەکاربیەی مەجلسەکەی، دەسەو نویسکارا هۆرام.ئینفۆ-ی ئەرەیاونایێوش دان کە دەقەکەش بەی تەورەنە:
ئانە کە جە دەسەبەنڎی ئەندامە دەسنیشانەکا مەجلسو ١١ وینمێ، خەتوو دمائینوو (خامنەئی)ین کە تەنیا هۆکارو دەسنیشانکەردەیشا وەفان پێ وەڵایەتی فەقی و پسۆ هێزوو ڕاووەبەری کەشتیەکەو ئێرانی ئەرکدارێ کریەنێ. بە جیاوازتەر جە ٤٠ ساڵی ویەردە پەی یەکەم جاری نزیکەو ٨٠% ئا ئەنداما بیەنێ نمایندێ مەجلسی، جیای هۆرچنیای، دەسنیشانێ کریەنێ. هەر پاسە پسەوۆمەجلسی وەڵینی وانایۆ پەیاموو خامنەیی و دمایی قسەکا حەسەن ڕۆحانی سەرۆککۆمارو ئێرانی کە سەروو قسەکاش پێ کرداری کەردەو داواکاریەکا خامنەیی بێ، نیشانەشدا کە مەجلس مەجلسوو داواکاریەکا خامنەئی و سپاو پاسداران. هەر پاسە قاڵیباف کە جە لاو سەرانوو نیزامی بە لاوازتەرین کەس وینیۆ جە بەشوو ڕاوەبەری پسەو دما مۆهرەو خامنەیی لەبەیکش پەنە دریان تا پێ سەرۆکوو مەجلسی هۆرچنیۆ . یاگێ باسینە کە هێشتا سەرەراو ئانەی فرەو ئەنداما مەجلسی تائید کریە خەتوو خامنەئینێ بەلام قاڵیباف تەرسەو ئانەیش سەر نیشتێ بێ کە چاگەیچ باوەریش نەدریۆ پەنە.
بەڵام ئانە کە یاگێ سرنجێنە ئانەن کە دەسەڵاتوو جمهووری ئیسلامی کەسێ پاسەش نیا دەسەنە کە جارێ تەر تاو جە دلێنە خەڵکی و جە بەرەوە دەوڵەتەکاش پەنە خەڵەتنۆ. فرەو ئاکەسا کە ساڵانێ یاوەرێ خامنەئیی بێنی، ئیسە دوورێ وزیەنێوە. هەر پاسە جە چوار ساڵی ویەردێنە بە سەدان دەسەڵاتدارێ پلە بەرزێ بە ملیاردها تمەنێوە ئێرانشا جیا ئاستەن. فرەو نەیارا خامنەیی قۆڵبەسێ کریەنێ کە فرێشا بازنەو یەکەموو دەسەڵاتیەنە بییەنێ. جەنگوو بەشە جیاوازەکا دەسەڵاتی یاوانان بەرزایی وێش. هەر جە گۆشەگیرکەردەو کەڕووبی کە جەنازەو خومەینیش شۆردەبێ تا تیرۆرو هاشمی ڕەفسەنجانی کە پێسەو ئەندازیارو جمهووری ئیسلامی بێ و زینانی کەردەو فرەو نەیارەکا خامنەیی پاسەش کەردەن ئیتر سپاو پاسدارنی بە ڕابەری خامنەئیی یەکلایانە حۆکموو وەڵاتی کەرۆ.
ڕژێم جە ماوەو ساڵێ ویەردەێنە، جە دماو سەهۆرداکا نەورۆزو ١٣٩٨ کە جە میانشانە نزیکەو یەرێ هەزار نەفەرێ کوشیێ و زەخمیێ بیێ و بە هەزاران کەسێ دەسبەسەر کریێ، دما متمانەو وێش جە لاو خەڵکیوە جە دەسدا. واڕای دروشمەکا خەڵکی کە ئامانجشا لوای دەسەڵاتی و مەرگ و نەمەنەی پێ خامنەیی بێ و سۆچناو نمادەکا جمهووری ئیسڵامیش ونە کەوتەوە، سەرجەمشا نیشانەشدا کە ڕژێم بە تەمامی دیوارەکێش دەسەڵاتیش وڕێنێ. ئیتر خەڵکی جیای ڕیفۆرمی، داواو نەمەنەو دەسەڵاتی بە یەکجاری کەرا. هەر پاسە فرەو ئا کەسا کە جە دەسەڵاتەنە دوورێ وزیێنێ، تازە بە تازە گەرەکشانە چێروو نامێ فدرالیسمی یا مافوو شاروەندی یاگەپێوە پێ وێشا وەش کەرا.
ئەنجاموو هۆروچنای ساختەکارانەو ڕژێمی و بەشداری نەکەردەو خەڵکی چێروو تەماموو فشارەکانە پسۆ ڕفراندۆمێوی شاریاوە بێ پێ رەد کەردەو تەماموو چوارچێوەو جمهووری ئیسلامی ئێرانی. هەماهەنگ نەبیەو بەشە جیاوازەکا دەوڵەتی چەنی لایانە چەکدارەکا سەر بە خامنەیی فرەتەر بنەڕەتوو رژیمیش لەرزنان. پەی نموونە سەردانی فلادیمێر پووتین-ی سەرۆکو ڕووسیای و بەشار ئەسەدی سەرۆکو سوریای بە بێ ئاگاداری وەزارەتوو بەری پەی ئێرانی یاوا ئا ڕادە کە جەواد زەریف وەزیرو بەرو ڕژێمی دەس جە پۆستەکەیش کێشۆوە کە بە هەرەشێ جە وێش و خانەوادەیش پاشگەز بیوە. هەر پاسە وستەیرەو باڵەپڕە ئوکراینەکەی بە دەسوو سپاو پاسدارانی و کوشتەی نزیکەو ٣٠٠ سەرنیشناش، دیپلۆماسی ئێرانیش جە بەروو وەڵاتی ئاردەرە چێروو سفری.
ئیسەیچ جە دماو ئا گرفتا کە بە نونگەو سیاسەتە غەڵەتەکا ڕژێمی جە ٤٠ ساڵی ویەردێنە یێخێ ڕژێمیشا گێرتێنێ، جەمێ بیێنێوە. ئینێجە جە کاتێوەنە کریۆنە کە ڕژێم ڕۆ بە ڕۆ جە بەروو ئێرانینە زەمینگیر بیەن و سپاو قودسی بە کوشتەی فەرماندەکەیش قاسم سلێمانی شیرازەش تێکشیەن و سەدان کادرێ پلە بەرزێ سپاکەی بە کارێ تێرۆریستێ کەمێ بیێنێوە، ئانێچە نیشانەش مدۆنە کە ڕژێم و مەجلسەکەش جە ٤ ساڵێ ئایەندەنە ڕووبەڕووێ چن گرفتە گەورا مەبانێوە. دیسان ڕژێم ڕووبەڕوو دەورپێچی و سزایا بییەنەوە کە گرنگتەریێشا ئینێنێ:
١- حەسارە سەروو وەزارەتوو بەروو ئێرانی و کەسایەتیە سیاسەتوانەکێش.
٢- فرە کەردەو فشارە ئابووریەکا بە تایبەت جە بەشوو نەوتێ.
٣- بەرز بییەیەیۆ پڵێ گرانی و بێکاری و نەبیەی ئاوێ.
٤- جە گردی موهمتەر کەمی بوودجەو بەشە خەدەماتیەکا دەوڵەتی و زیادکەردەو بەشە بوودجەو هێزە چەکدارەکا.
پی شێوە رژیم جە بەشوو دیپلۆماسی، ئابووری و خەدەماتی تووشوو شەپۆلێێ تازا بۆوە. لاشەو بیماروو دەسەڵاتی کە دما هەناسەکێش مەنێنێ ئیتر جوابگوو گردوو ئا قەیرانا نمەدۆوە و ماوەێوە تەر وەنەش گرژێ باوە.
ئانەی کە تا ئیسە ڕژێمش جە دماو سەرهۆرداکا نەورۆز ٢٠١٩ -١٣٩٨ پارێزنان ئاژەو نەوەشی کۆرۆنای بیەن. بە جۆری دەسەڵات بە مۆدیریەتی ئەمنیەتی ئاژەو کۆرۆنایش پەی ماوەو ساڵێوی تەری وێش جە هۆرەترێشقەو دەنگو ناڕازیەکا پارێزنان. بەڵام هەر پاسە کە واتما ترکیبوو مەجلسوو ١١ نیشانێ ئانەینە کە دەسەڵات بە خرابتەرین گەمەکەرەکا وێش کە بە ساڵانا بایەخش نەڎان و گەرەکشا جەنگوو مۆدرنتەرین هێزەکا جیهانی جە بەشو دیپلۆماسی و ئابووریەنە کەرۆ. هەر پاسە ئا تیمە کە ئیسە فەرمانەو کەشتی ئێرانیش گێرتێنە دەس جە لاو خەڵکیوە هیچ شەرعیەتێشا نیا. جا پۆچی هەر یاسا و گوڕانکاریە ڕووە بدۆ، خەلکی بە هنوو وێش نمەزانۆ.
هووشیار بیەو ژەنا جە ماوە دە ساڵێ ویەردەیەنە و بەرزبییەی دەنگوو ناڕەزایەتیشا یۆتەر چا شەپۆڵانە کە جە دماو ئاژەو کۆرۆنای بنەڕەتوو جمهووری ئیسڵامی تەمام بلەرزنۆ. جە مەجلسێ ٢٩٠ نەفەری کە نزیکەو ٢٠ کەساش ژەنینێ، ئاڎێچێ ئا ژەنێ کە دژوو ئازادی و مافەکا ژەنانێ، قەیرانێ تایبەت جە بەروو قەیرانەکا پسۆ مافوو گەلا، مافوو کاریگەرا، ئابووری و مودیریەتی پەی جمهوری ئیسڵامی ئێرانی تاشۆرە. ڕژێم جە چن ساڵێ ویەردێنە فرە جارێ بە تاکتیک فرە هەنگامێش پەی خەڵەتناو کۆمەڵگای نیێنێ، بەڵام کۆمکۆشتەکەو دمایی گەلا و ئازادیوازا ئێرانی جە گردوو نەتەوەکا ڕووەی راسینەو دەسەڵاتیش بە یەکجاری بەرە وستە. جە گردی موهمتەر تاواش جە ئێرانەنە بەڕێوە مەدەنییەی تازێ جە بەینوو خەڵکوو یاگە جیاوازەکا و نەتەوەکا دلێ ئێرانی وەشە کەرۆ. هامدەنگی کوردا چەنی گەلەکا تەری و بە پێچەوانەوە تەرسێ گەورێش وستێنە دڵوو دەسەڵاتی.
دما جار مشۆم واچمێ کە عەمروو ڕژێمو جمهووری ئیسلامی دمائیش ئۆمان و دەسەڵات ڕوە دمائینەکا وێش مژماڕۆ بە جۆرێ کە دیارا مەجلسوو ١١ یانزەهەمینو جمهووری ئیسلامی دمایین مەجلسەن کە ئی دەسەڵاتە بە وێشۆ بوینۆش.
